ប្រតិបត្តិការបោសសម្អាតគ្រាប់យុទ្ធភណ្ឌមិនទាន់ផ្ទុះ និងសំណល់ជាតិផ្ទុះពីសង្រ្គាមនេះ បានចាប់ផ្តើមនៅថ្ងៃទី១៥ ខែមករា ឆ្នាំ២០២៣ ដោយបានរំដោះផ្ទៃដី ពីគ្រាប់យុទ្ធភ័ណ្ឌមិនទាន់ផ្ទុះចំនួន ៦៩៦,០៣៥ម៉ែត្រក្រឡា ស្មើរនឹង ៦១ភាគរយ។ គម្រោងនេះ អនុវត្តក្រោមមូលបទ «ផ្តល់ដីមានសុវត្ថិភាព បង្កើតស្នាមញញឹម» និងឆ្ពោះទៅរកកម្ពុជាគ្មានមីនឆ្នាំ២០២៥។
 
លោក សែម រតនា អគ្គនាយករងនៃមជ្ឈមណ្ឌលជាតិរក្សាសន្តិភាព បានថ្លែងនៅការដ្ឋានបោសសម្អាតមីនភូមិសាស្រ្តកោះស្តេចឱ្យដឹងថា ក្នុង​ប្រតិបត្តិការនេះ កម្លាំងជំនាញបានរកឃើញគ្រាប់មីនប្រឆាំងថ្មើរជើងចំនួន៧គ្រាប់ គ្រាប់យុទ្ធភណ្ឌមិនទាន់ផ្ទុះ៤៨គ្រាប់ និងអំបែង១៩២ដុំផងដែរ។ ដោយឡែក សម្រាប់ផ្ទៃដីនៅសេសល់ចំនួន ៤៤៣,៦០១ម៉ែត្រក្រឡា គ្រោងនឹងបញ្ចប់ជាស្ថាពរ ក្នុងខែមេសា ឆ្នាំ២០២៣ តាមផែនការកំណត់។
 

ជាមួយគ្នានោះ លោក សែម សុវណ្ណនី អនុប្រធានទី២ អាជ្ញាធរមីន បានក្រើនរម្លឹកដល់កងកម្លាំងបោសម្អាតគ្រាប់មីន នៅមូលដ្ឋានភូមិសាស្ត្រកោះស្តេច ត្រូវបង្កើនការយកចិត្តទុកដាក់ និងអនុវត្តឱ្យបានល្អចំពោះភារកិច្ចទៅតាមស្តង់ដារបច្ចេកទេស និងមិនត្រូវមើលស្រាលជាដាច់ខាតចំពោះគ្រាប់យុទ្ធភណ្ឌមិនទាន់ផ្ទុះជាដាច់ខាត។ លោកបានលើកឡើងថា៖«ព្រោះគ្រាប់មីនអាចធ្វើឱ្យយើង ១វិនាទីរស់  ១វិនាទីស្លាប់ និង ១វិនាទីអាចសុវត្ថិភាព»៕