នាយកគ្រប់គ្រង និងជានាយកប្រតិបត្តិនៃការិយាល័យជាតិជំរុញការវិនិយោគឥណ្ឌា (Invest India) លោក Deepak Bagla បានព្យាករថា ឥណ្ឌានឹងត្រៀមខ្លួនរួចជាស្រេចក្នុងការយកឈ្នះប្រទេសអាល្លឺម៉ង់ដើម្បីក្លាយជាប្រទេសដែលមានសេដ្ឋកិច្ចធំជាងគេទីបួននៅលើពិភពលោកនាចុងឆ្នាំនេះ។

 

ចាប់ពីឆ្នាំ២០១៥ ដល់បច្ចុប្បន្ន ឥណ្ឌាបាននាំមុខប្រេស៊ីល អង់គ្លេស រុស្ស៊ី អ៊ីតាលី និងបារាំង លើទំហំផលិតផលក្នុងស្រុកសរុប ( GDP )។ ប្រទេសឥណ្ឌាគឺជាប្រទេសដែលមានសេដ្ឋកិច្ចធំជាងគេទី៥​ នៅលើពិភពលោក។

 

បើតាមលោក Deepak Bagla  ផលិតផលក្នុងស្រុកសរុបរបស់ឥណ្ឌាបច្ចុប្បន្ន មានទំហំ ៣,៥ទ្រីលានដុល្លារ។ ចំនួន២ភាគ៣នៃ GDP របស់ឥណ្ឌាត្រូវបានជំរុញដោយតម្រូវការក្នុងស្រុក និងបច្ចុប្បន្នតម្រូវការកំពុងលើសពីការផ្គត់ផ្គង់។ 

 

បច្ចុប្បន្ននេះ ឥណ្ឌា​បាន​ទទួល​ការ​វិនិយោគ​ផ្ទាល់​ពី​បរទេស​ (FDI) សរុប​ចំនួន៩៥០ ពាន់​លាន​ដុល្លារ​ចាប់​តាំង​ពី​ឆ្នាំ ១៩៤៧ ដែល​ក្នុង​នោះ៥៣២ពាន់​លាន​ដុល្លារ​បាន​មក​ក្នុង​រយៈពេល ៩០ ខែ​កន្លង​មក​ពី​ប្រទេស​ចំនួន ១៦២ ។ សម្រាប់រយៈពេល៨ឆ្នាំចុងក្រោយនេះ ឥណ្ឌាបានបង្កើតកំណត់ត្រាថ្មីសម្រាប់ FDI ជារៀងរាល់ឆ្នាំ។

 

បរិមាណនៃការវិនិយោគផ្ទាល់ពីបរទេសដែលទទួលបានគ្របដណ្តប់លើវិស័យចំនួន ៦១ នៅក្នុងរដ្ឋ និងដែនដីសហព័ន្ធចំនួន ៣១ ដែលជាកំណត់ត្រាពិភពលោកជាថ្មីម្តងទៀតដែលបង្ហាញថាកំណើនថ្មីរបស់ប្រទេសឥណ្ឌាគឺមានលក្ខណៈទូលំទូលាយ។

 

នៅក្នុងលក្ខខណ្ឌនៃការផ្លាស់ប្តូរឌីជីថលនៅឆ្នាំ ២០២២ ឥណ្ឌានឹងកត់ត្រាចំនួន ៤១ភាគរយនៃចំនួនប្រតិបត្តិការឌីជីថលតាមពេលវេលាជាក់ស្តែងសរុបនៅក្នុងពិភពលោក ដោយជាប់ចំណាត់ថ្នាក់លេខ១ ទាក់ទងនឹងចំនួនប្រតិបត្តិការមានចំនួន ៤៨ពាន់លានប្រតិបត្តិការ ដោយនាំមុខប្រទេសចិនមានត្រឹមតែ១៨ ពាន់លានប្រតិបត្តិការ ៕