ទោះនៅឆ្ងាយពីរាជធានីភ្នំពេញ ខេត្តប៉ៃលិន មានតំបន់ទេសចរណ៍ធម្មជាតិ និងប្រវត្តិសាស្ត្រដែលទាក់ទាញជាច្រើន។ ជាពិសេសរមណីយដ្ឋានទេសចរណ៍ទាំងនោះនៅជិតទីរួមខេត្តតែម្ដង។
  

 

ក្នុងសន្និសីទសារព័ត៌មាន ស្ដីពី «ភាពជោគជ័យក្នុងរយៈពេល ៥ឆ្នាំកន្លងមក» របស់រដ្ឋបាលខេត្តប៉ៃលិន នៅថ្ងៃទី២៣ កុម្ភៈ លោកស្រី បាន ស្រីមុំ អភិបាលខេត្តប៉ៃលិន លើក​ឡើងថា បច្ចុប្បន្ន ខេត្តប៉ៃលិនមាន​រមណីយដ្ឋាន និងកន្លែងកម្សាន្តបែបធម្មជាតិ ៨ កន្លែង ដែលអាចទាក់ទាញភ្ញៀវទេសចរជាតិ-អន្តរជាតិឱ្យមកទស្សនាកាន់តែច្រើន។ 
 

ចំណែកឯគោលដៅទេសចរណ៍ទាំងនោះរួមមាន រមណីយដ្ឋានភ្នំខៀវ, រមណីយដ្ឋានកែច្នៃរហាត់ទឹក, រមណីយដ្ឋានទឹកធ្លាក់ចម្ការខ្នុរ, រមណីយដ្ឋានវប្បធម៌ប្រវត្តិសាស្ត្រភ្នំយ៉ាតជាដើម, រមណីយដ្ឋានធម្មជាតិអូរទុរេន, រមណីយដ្ឋានស្ទឹងកុយ, រមណីយដ្ឋានធម្មជាតិអូរតាអែម និងរមណីយដ្ឋានទឹកធ្លាក់ក្បាលដំរី។ ទន្ទឹមនឹងនេះ ទេសចរភាគច្រើនចូលចិត្តដើរកម្សាន្តនៅតាម ភ្នំខៀវ ភ្នំយ៉ាត និងទឹកធ្លាក់ចម្ការខ្នុរ ជាគោលដៅទាក់ទាញភ្ញៀវទេសចរជាតិ និងអន្តរជាតិច្រើនជាងគេ។
  

 

យ៉ាងណាមិញ រមណីយដ្ឋានភ្នំយ៉ាត ក៏ប្រៀបដូចជានិមិត្តរូបទេសចរណ៍ក្នុងខេត្តប៉ៃលិន និងជាទីទេសចរណ៍សក្តានុពលផងដែរ។ រមណីយដ្ឋានមួយនេះ ជាតំបន់ទេសចរណ៍បែបសាសនា ប្រវត្តិសាស្ត្រ និងធម្មជាតិ។ បន្ថែមពីនេះ ទេសចរអាចចូលបន់ស្រន់ និងគយគន់សម្រស់ធម្មជាតិនៅភ្នំមួយនេះផងដែរ។ ពេលឡើងដល់លើភ្នំទេសចរនឹងអាចមើលឃើញក្រុងប៉ៃលិនផងដែរ។ 
 

ក្រៅពីរមណីយដ្ឋានភ្នំយ៉ាត  រមណីយដ្ឋានទឹកធ្លាក់ចម្ការខ្នុរ ក៏ជាតំបន់ទេសចរណ៍ធម្មជាតិកែច្នៃមួយ ដែលស្ថិតនៅជាប់ជើងភ្នំ មានទឹកធ្លាក់ និងមានផ្ទះស្នាក់យ៉ាងទាក់ទាញដែលទេសចរអាចសម្រាកនៅជាប់ជើងភ្នំផងដែរ។ លោកស្រី បាន​ ស្រី​មុំ បន្តថា បច្ចុប្បន្ននេះ ខេត្តប៉ៃលិន កំពុង​នឹងប្រឈមការខ្វះខាតផ្ទះស្នាក់នៅ។ អភិបាល​ខេត្ត​រូបនេះ អះអាងថា រដ្ឋបាលខេត្ត​កំពុង​ធ្វើ​យ៉ាងណា​ទាក់ទង​វិនិយោគិនមក​អភិវឌ្ឍន៍ខេត្ត​ប៉ែលិនបន្ថែម​ទៀត​។​
 

សូមបញ្ជាក់ដែរថា ៥ឆ្នាំកន្លងមក ខេត្តប៉ៃលិនទទួលបានទេសចរចំនួន ៩៧០ ៥៤៩នាក់ ក្នុងនោះទេសចរជាតិចំនួន ៩៦៣ ៤២៤នាក់ និងទេសចរអន្តរជាតិចំនួន ៧ ១២៥នាក់៕