ត្រីទឹកសាបមានច្រើនប្រភេទណាស់នៅក្នុងប្រទេសកម្ពុជា មានទាំងក្នុងទន្លេ និងបឹង។ ត្រីប្រភេទខ្លះមានទំហំធំ ឬតូចតាមប្រភេទរបស់វា នោះអាចអាស្រ័យលើរបបអាហារនៅធម្មជាតិផងដែរ។ បច្ចុប្បន្ន ត្រីធម្មជាតិមិនសម្បូរឡើយ ដូច្នេះទម្ងន់និងទំហំកំណត់របស់វាអាចមានកម្រិត ដោយសារតម្រូវការនៃការនេសាទច្រើន។

ត្រីក្អែក មានមាឌធំគួរសម អាចមានទម្ងន់លើស៥គីឡូក្រាមក៏មាន ភាគច្រើនសម្បូរនៅក្នុងទឹកសាប នៅក្នុងខេត្តស្ទឹងត្រែង។ ប្រសិនបើពលរដ្ឋចង់ទិញត្រីធំៗ នេសាទមកពីតាមទន្លេ អាចរកទិញបាននៅខេត្តស្ទឹងត្រែង ក្រចេះ រតនគិរី និងមណ្ឌលគិរីជាដើម។ ត្រីក្អែករស់នៅក្នុងទន្លេអាចមានទំហំជាងត្រីក្អែករស់នៅក្នុងបឹង។ ចំណែកឯរសជាតិវិញ ប្រហាក់ប្រហែលគ្នា។


 ត្រីក្អែក

ត្រីប៉ាវ៉ាមុខពីរ អាចមានទំហំដល់ទៅ១០គីឡូក្រាម។ ត្រីប្រភេទនេះអាចមាននៅតាមទន្លេមេគង្គផ្នែកខាងលើ ទន្លេសេកុង និងសេសានជាដើម។ ចំណែកឯនៅតាមទន្លេមេគង្គក្រាមត្រីប្រភេទនេះកម្រចរាចរទៅណាស់។ មកដល់ពេលបច្ចុប្បន្ននេះ មានប្រជាពលរដ្ឋមួយចំនួន មិនធ្លាប់ឃើញត្រីប្រភេទនេះផ្ទាល់ភ្នែកឡើយ។​ មូលហេតុដោយសារត្រីនេះ មិនសម្បូរនៅក្នុងធម្មជាតិ នេសាទបានតាមរដូវ និងពេលខ្លះមានលក់តែនៅក្នុងផ្សារស្ទឹងត្រែងប៉ុណ្ណោះ។​
  

ត្រីព្រួល  ក៏ជាប្រភេទត្រីមានទំហំធំដែរ។ ត្រីប្រភេទនេះ កាន់តែធំពណ៌ស្រកា និងមុខមាត់ របស់វាកាន់តែទាក់ទាញ។ ត្រីព្រួលធំៗ ភាគច្រើនត្រូវបានអ្នកនេសាទនៅក្នុងខេត្តស្ទឹងត្រែងនាំមកលក់លើទីផ្សារជាញឹកញាប់។ ពលរដ្ឋភាពច្រើននៅក្នុងខេត្តស្ទឹងត្រែង និយមច្នៃម្ហូបចេញពីសាច់ត្រី។ ពិសេសជាងនេះ គឺមុខម្ហូបធ្វើបែបសាច់ត្រីឆៅៗ ដូចជាភ្លា ឡាប និងត្រីស្រស់ជ្រលក់ទឹកត្រី បែបឡាវជាដើម។ 
 

ត្រីត្រសក់ ៖ ជាត្រីមានមាឌធំជាងត្រីបីប្រភេទខាងលើដាច់។ វា​អាច​​លូត​លាស់​រហូតដល់​ទម្ងន់​ជាង​៩០​គីឡូក្រាម ​ប្រវែង​ដងខ្លួន ១,៥ ម៉ែត្រ។  បើនិយាយពីកម្លាំងវិញ ត្រឹមទម្ងន់៧គីឡូក្រាម យកមនុស្សមានកម្លាំងល្មមៗ ចាប់ត្រីប្រភេទនេះ មិនឈ្នះឡើយ។  ប្រសិនលោកអ្នកចង់ឃើញត្រីប្រភេទនេះ អាចធ្វើដំណើរចុះទៅមើលតាមផ្សារក្នុងទីរួមខេត្តស្ទឹងត្រែងបាននៅរដូវត្រីត្រូវ ចន្លោះខែតុលា និងវិច្ឆិកា។  
 

ត្រីឆ្កោក  ត្រីប្រភេទនេះមានទម្ងន់ចាញ់ត្រីក្អែកបន្តិច ប៉ុន្ដែវាអាចមានទំហំធំជាងត្រីមានស្រកាមួយចំនួនរស់នៅក្នុងទឹកសាប។ នៅក្នុងផ្សារត្រីខេត្តស្ទឹងត្រែង សម្រាប់ត្រីធំដូចជាត្រីក្អែក ព្រួល ឆ្កោក អាចមានតម្លៃជាងមួយម៉ឺនរៀលប៉ុណ្ណោះ ប៉ុន្ដែត្រីល្អិតៗលាយជាមួយកំពឹសតូច មានតម្លៃ២ម៉ឺនទៅ៣ម៉ឺនរៀលឯណោះ៕