អន្តរជាតិ
ក្រុមប្រឹក្សាសិទ្ធិមនុស្ស UN បើកកិច្ចប្រជុំប្រចាំឆ្នាំដោយមានវិបត្តិអ៊ុយក្រែនជាប្រធានបទសំខាន់ 28, Feb 2023 , 9:52 am
× ក្រុមប្រឹក្សាសិទ្ធិមនុស្សអង្គការសហប្រជាជាតិ បើកកិច្ចប្រជុំប្រចាំឆ្នាំរបស់ខ្លួននៅថ្ងៃទី២៧ ខែកុម្ភៈ ជាមួយនឹងការថ្កោលទោសការលុកលុយរបស់រុស្ស៊ី នៅអ៊ុយក្រែន។ ក្នុងកិច្ចប្រជុំនេះ បណ្តាប្រទេសនានា នឹងត្រួតពិនិត្យបន្ថែមទៀត លើឧក្រិដ្ឋកម្មសង្រ្គាមនៅអ៊ុយក្រែន ក្រុងមូស្កូ និងបញ្ហាជនមូស្លីមវីហ្គ័រ នៅស៊ីនជាំងផង។
ក្នុងថ្លែងសុន្ទរកថា ទៅកាន់សមាជិកក្រុមប្រឹក្សាទាំង៤៧ប្រទេស នាទីក្រុងហ្សឺណែវ ឧត្តមស្នងការសិទ្ធិមនុស្សអង្គការសហប្រជាជាតិ Volker Turk ព្រមានពីការធ្លាក់ចុះការគោរពសិទ្ធិមនុស្ស និងការកើនឡើងការបង្ក្រាបផ្នែកសិទ្ធិមនុស្ស ដោយលោកបានលើកឡើងពីការឈ្លានពានរបស់រុស្ស៊ី លើអ៊ុយក្រែនជាឧទាហរណ៍ចំៗតែម្ដង។
ចំណែកអគ្គលេខាធិការអង្គការសហប្រជាជាតិ អាន់តូនីញ៉ូ ហ្គូតេរ៉េស បាននិយាយនៅក្នុងសុន្ទរកថាដាច់ដោយឡែកមួយដែរថា សង្រ្គាមបានបង្កឱ្យមានការរំលោភសិទ្ធិយ៉ាងច្រើន។
អំឡុងកិច្ចប្រជុំដែលនឹងត្រូវធ្វើរហូតដល់ថ្ងៃទី៤ ខែមីនា រដ្ឋសមាជិកប្រទេសជាច្រើនស្វែងរកការបន្ត អាណត្តិនៃស្ថាប័នស៊ើបអង្កេតរបស់ UN ដែលបង្កើតឡើងដើម្បីស៊ើបអង្កេតអំពើឃោរឃៅ នៅអ៊ុយក្រែន។ ក្រុងកៀវដែលបានអំពាវនាវឱ្យមានការបង្កើតសាលាក្តីពិសេសមួយ ដើម្បីកាត់ទោសមេដឹកនាំរុស្ស៊ី ជុំវិញការឈ្លានពាននោះ បាននិយាយថា ស្ថាប័ននេះមានសារសំខាន់ ក្នុងការធានាឱ្យរុស្ស៊ីទទួលខុសត្រូវ ចំពោះទង្វើរបស់ខ្លួន។
ជុំវិញកិច្ចប្រជុំដដែល អ៊ុយក្រែន និងសម្ព័ន្ធមិត្តលោកខាងលិច មិនពេញចិត្តចំពោះការចូលរួមរបស់អនុរដ្ឋមន្ត្រីការបរទេសរុស្ស៊ី លោក Sergei Ryabkov ដែលនឹងថ្លែងទៅកាន់ក្រុមប្រឹក្សា នៅថ្ងៃទី២ ខែមីនានោះទេ។ នេះជាលើកទីមួយហើយ ដែលមន្ត្រីរុស្ស៊ី បានចូលរួមផ្ទាល់ចាប់តាំងពីសង្គ្រាមឆ្នាំមុន។ រុស្ស៊ី ដែលបដិសេធមិនប្រព្រឹត្តឧក្រិដ្ឋកម្មសង្គ្រាម ឬកំណត់គោលដៅលើជនស៊ីវិលនៅអ៊ុយក្រែន ត្រូវបានព្យួរសមាជិកភាពពីក្រុមប្រឹក្សា កាលពីខែមេសា ប៉ុន្តែនៅតែអាចចូលរួមជាអ្នកសង្កេតការណ៍។
ក្រៅពីរឿងអ៊ុយក្រែន បញ្ហានៅស៊ីនជាំង នៅតែជាប្រធានបទសំខាន់ដែរ។ ប្រទេសនានា ក៏នឹងតាមដានយ៉ាងដិតដល់ ពីរបៀបដែលលោក Turk នឹងចាត់ចែងចំពោះបញ្ហា សិទ្ធិមនុស្សនៅតំបន់ស៊ីនជាំង បន្តពីលោកស្រី Michelle Bachelet ។
ក្រុមសិទ្ធិមនុស្ស បានចោទក្រុងប៉េកាំង ពីការធ្វើទុក្ខបុកម្នេញជនភាគតិចវីហ្គ័រ ដែលជាភាគតិចមូស្លីម ទៅតាមអ្វីដែលពួកគេចាត់ទុកជាជំរំបង្ខំពលកម្ម។ អាម៉េរិក និងសភាបរទេសមួយចំនួន ថែមទាំងចោទពីការប្រឆាំងពូជសាសន៍ថែមទៀត។
ក្រុមប្រឹក្សាសិទ្ធិមនុស្ស ដែលមានមូលដ្ឋាននៅទីក្រុងហ្សឺណែវ ជាស្ថាប័នតែមួយគត់ដែលបង្កើតឡើងដើម្បីការពារសិទ្ធិមនុស្សនៅទូទាំងពិភពលោក ប៉ុន្តែមិនមានអំណាចផ្លូវច្បាប់ទេ។ ទោះជាយ៉ាងណាក៏ដោយ ការជជែកដេញដោលរបស់ស្ថាប័នមួយនេះច្រើន អាចជំរុញដល់ការស៊ើបអង្កេត ដែលផ្តល់ភស្តុតាងដល់តុលាការជាតិ និងអន្តរជាតិ៕
© រក្សាសិទ្ធិដោយ thmeythmey.com