លោក គង់ សំនៀង មើលឃើញថា សេដ្ឋកិច្ចកម្ពុជាកើនឡើង ដោយសារការហូរចូលរបស់អ្នកជំនួញចិន ពិសេសក្នុងខេត្តព្រះសីហនុ ដែលវាជារឿងមិនអាចប្រកែកបានទេ។ «ភាសាចិនគឺជាភាសាមួយដែលគ្រប់គ្នាគួរចាប់យក​ ជាពិសេសក្មេងជំនាន់ក្រោយ ប្អូនៗសិស្សានុសិស្សជំនាន់ក្រោយ ដែលយើងគិតថា វាជាទីផ្សារធំមួយ ហើយសមាជិកសហព័ន្ធរបស់យើងភាគច្រើនគឺគាត់បានអនុវត្តន៍រួចហើយ។ តែក៏នៅមានសាលារៀនមួយចំនួនដែលគាត់មិនទាន់បានដាក់បញ្ចូល ហើយសាលារៀនអន្តរជាតិមួយចំនួនទៀតបានអនុវត្តន៍ភាសាជាបីភាសាគឺ ភាសាខ្មែរ ភាសាអង់គ្លេស និង ចិន។ ដោយឡែក សាលារៀនដែលមានការបញ្ចូលកម្មវិធីសិក្សាថ្មាក់ជាតិ ក៏មានអនុវត្តន៍ភាសាចិនដែរ តែនៅក្រៅម៉ោង ឬ ហៅថាជាកម្មវិធីបន្ថែម»។ នេះជាការបញ្ជាក់របស់ លោក គង់ សំនៀង ។

 

តាមការអង្កេតរបស់អគ្គនាយករងនៃក្រុមហ៊ុន វេសឡាញ អេឌ្យូខេសិន គ្រុប រូបនេះ ឃើញថា សិស្សានុសិស្សមួយចំនួន ក៏ចូលចិត្តរៀនមុខវិទ្យាភាសាចិននេះដែរ ដូច្នេះសាលារៀន ដែលនៅមិនទាន់បានដាក់កម្មវិធីភាសាចិនចូលក្នុងកម្មវិធីសិក្សា គួរពិចារណាលើចំណុចនេះ។ 
 

« ការពិតយើងឱ្យគាត់រៀនភាសាទូទៅ មានន័យថា ចំណុចទី១ យើងត្រូវឱ្យគាត់រៀនភាសាទូទៅសិន។ គំនិតមួយចំនួន ខាងសហព័ន្ធធ្លាប់បានពិចារណា និងអនុវត្តន៍បានខ្លះដែរ ដោយត្រូវការបញ្ចូលមុខវិទ្យា សហគ្រិនភាព។ ជាក់ស្តែង ថ្ងៃដែល ឯកឧត្តម ហ៊ុន ម៉ាណែត លោកបានចូលរួមក្នុងកម្មវិធីរបស់សហព័ន្ធ ក៏លោកបានលើកពី STEM. ដែលក្នុងហ្នឹងមានទាំងកម្មវិធី សហគ្រិនភាព ការបណ្តុះបណ្តាលលើផ្នែកហិរញ្ញវត្ថុ ហើយសាលាជាច្រើនគួរតែពិចារណាក្នុងការដាក់ចូល ដើម្បីជាទុនមួយ សម្រាប់ក្មេងដែលគាត់ចប់វិទ្យាល័យ ក្នុងចាប់យកជំនាញជាក់ស្តែង នៅមហាវិទ្យាល័យ ហើយភាសាចិនជាយានមួយ ដើម្បីចំលងរឿងទាំងនេះទៅរកភាពជោគជ័យ សម្រាប់អាជីពការងារនាពេលខាងមុខ»។  នេះបើតាមបុរសសម្បុរស្រអែមស្រស់ ដែលជាអ្នកមកពីខេត្តបាត់ដំបងរូបនេះ។ 

 

លោក សំនៀង បានបន្ថែមថា ការសិក្សាភាសាចិន មិនជារឿងលំបាកពេកទេ សម្រាប់កុមារកម្ពុជា ដោយសារជនជាតិខ្មែរមួយចំនួន ក៏មានជាប់សែស្រឡាយចិនស្រាប់ហើយ ព្រមទាំងការបណ្តុះបណ្តាលភាសាចិន តាមសមាគមជាច្រើនក្នុងប្រទេសកម្ពុជាផងដែរ។ 
 

លោក គង់ សំនៀង បានសង្កត់ធ្ងន់ថា៖ « រឿងនេះវាមិនមែនទើបតែពុះកញ្រ្ជោលឥឡូវនេះទេ តែវាមានយូរណាស់មកហើយ យើងមើលតាមខេត្តមួយចំនួន ដូចជាបាត់ដំបង កំពង់ចាម កណ្តាល ( កោះធំ) គឺមានសាលាភាសាចិនហ្នឹងយូរហើយ។ រីឯនៅភ្នំពេញវិញ ភាគច្រើនកូនកាត់ចិនហើយ។ ជំនាញភាសាចិននៅស្រុកខ្មែរ ខ្ញុំគិតថាមិនយឺតយ៉ាវទេ ព្រោះយើងបានចាប់ផ្តើមដោយរលូនរួចហើយ ដែលរួមផ្សំនឹងសាលាជាច្រើនគាត់បានដាក់បញ្ចូលភាសាចិនថែមទៀត។ លើសពីនេះសមាគមចិនមានច្រើនណាស់ សម្រាប់ការបណ្តុះបណ្តាល ដែលផ្លែផ្កា យើងទទួលបានបណ្តើៗហើយ បើនិយាយទៅ»។ 
 

ជាចុងក្រោយ ប្រធានសហព័ន្ធសេវាអប់រំនៅកម្ពុជា ដែលមានវ័យប្រហែល ៤០ឆ្នាំរូបនេះ បានបន្ថែមទៀតថា ភាសាគ្រាន់តែជាយាន តែជំនាញត្រូវតែប្រឹងទៅបន្ត ដូចជាជំនាញផ្នែកសហគ្រិនភាព ផ្នែក STEM, ចំណេះជំនាញគ្រប់គ្រងហិរញ្ញវត្ថុ ដែលកំពុងតែពុះកញ្ជ្រោល។ លោកបន្តថា  ជំនាញទាំងអស់នេះ នឹងជួយសិស្ស និស្សិតនៅកម្ពុជា មានជំនាញជាក់លាក់តែម្តង ដើម្បីអាចទទួលបានឱកាសការងារល្អពី វិនិយោគិនចិន មកកម្ពុជា៕