ជាតិ
សង្គមជាតិ
សមត្ថកិច្ចស្នើឱ្យឈប់យកករណីអវិជ្ជមាននៅខេត្តតាកែវ មកចែករំលែកឡើងវិញ ដែលជាការបំពុលសង្គម 02, Mar 2023 , 3:38 pm
លោក ឈាង ផាន់ណារ៉ា ស្នងការនគរបាលខេត្តតាកែវ នាសន្និសីទសារព័ត៌មាន នៅថ្ងៃទី០២ ខែមីនា ឆ្នាំ២០២៣។ រូបភាព អង្គភាពអ្នកនាំពាក្យរាជរដ្ឋាភិបាល។
× ភ្នំពេញ៖ បទល្មើសឃាតកម្ម និងបទល្មើសគប់កញ្ចក់ឡានជាដើម ដែលបង្កដោយអនិតិជន ក្នុងខេត្តតាកែវ បានធ្វើឱ្យខេត្តនេះក្លាយជាប្រធានបទជជែកមិនដាច់នាដើមឆ្នាំនេះ។ ជាមួយគ្នានេះ គេក៏ឃើញមានសាធារណជនមួយចំនួន បានយករឿងចាស់ៗមកបង្ហោះឡើងវិញនៅលើបណ្ដាញសង្គម។ ការណ៍នេះត្រូវបាន លោក ឈាង ផាន់ណារ៉ា ថាជាការបំពុលសង្គម។
ករណីដែលកំពុងកើតមាននៅលើបណ្ដាញសង្គម ជាពិសេសហ្វេសប៊ុកនោះ ត្រូវបានស្នងការនគរបាលខេត្តតាកែវរូបនេះ ចាត់ទុកថា ជាសកម្មភាពមួយដែលវាយប្រហារដល់អ្នកខេត្តតាកែវ។ លោក ផាន់ណារ៉ា លើកឡើងដូច្នេះ នាសន្និសីទសារព័ត៌មានស្ដីពីភាពជោគជ័យរយៈពេល៥ឆ្នាំ របស់រដ្ឋបាលខេត្តតាកែវ។
ជុំវិញករណីខាងលើនេះ លោកស្នើឱ្យបញ្ឈប់សកម្មភាពចែករំលែករឿងចាស់ៗទាំងនោះ ដោយវាជាសកម្មភាពបំពុលសង្គម។ លោកសង្កត់ធ្ងន់ដូច្នេះ៖«តាមរយៈបណ្ដាញសង្គមយើង យើងមាន២ ឬ៣រឿងសុទ្ធតែយើងបង្ក្រាបបានទាំងអស់ គាត់ទាញយកអារឿងតាំងពីឆ្នាំមុន តាំងពី១០ខែមុន ទាញមកឱ្យជារឿងថ្មីទាំងអស់ បានន័យថាគាត់បំពុលព័ត៌មាន»។
គួរជម្រាបផងដែរ ក្នុងរយៈពេល៥ឆ្នាំ ចាប់ពីឆ្នាំ២០១៨មក កម្លាំងស្នងការខេត្តតាកែវ បានចុះបង្ក្រាបកក្មេងទំនើងបង្កអសន្តិសុខក្នុងខេត្តបានចំនួន៦៦ករណី ឃាត់ខ្លួនបានចំនួន១៩៣នាក់ ក្នុងនោះសមត្ថកិច្ចបានអនុវត្តវិធានការរដ្ឋបាល អប់រំ ទៅលើជនបង្កចំនួន១៧៣នាក់ (៥៧ករណី) និងអនុវត្តតាមវិធានការច្បាប់ចំនួន២០នាក់(៩ករណី) កសាងសំណុំរឿងបញ្ជូនទៅតុលាការ។ នេះបើតាមរបាយការណ៍របស់ស្នងការនគរបាលខេត្តតាកែវ បញ្ជាក់ដោយ លោក ឈាង ផាន់ណារ៉ា ស្នងការនគរបាលខេត្តតាកែវ៕
Tag:
ThmeyThmey
សន្តិសុខខេត្តតាកែវ
ក្មេងទំនើង
ឈាង ផាន់ណារ៉ា
© រក្សាសិទ្ធិដោយ thmeythmey.com