ជាតិ
សម្ដេច ហ៊ុន សែន ស្នើគ្រប់វត្ត ជួយបណ្ដុះបណ្ដាលនិងអភិរក្សវង់ភ្លេងពិណពាទ្យ
04, Mar 2023 , 4:00 pm
រូប_ពីផេក Samdech Hun Sen, Cambodian Prime Minister
×![]()
ដោយ: ប៉ូ សាគុន
ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានស្នើដល់ព្រះចៅអធិការវត្តនៅទូទាំងប្រទេស ឱ្យបង្កើតវង់ភ្លេងពិណពាទ្យប្រចាំវត្តនីមួយៗ យ៉ាងហោចណាស់មួយវត្តមានមួយវង់ និងបើកវគ្គបណ្ដុះបណ្ដាលវង់ភ្លេងនេះ ទៅដល់យុវជនឬក្មេងៗដែលចង់រៀន។
ក្នុងពិធីជំនួបជាមួយសិល្បករ សិល្បការិនីប្រមាណ៤ពាន់នាក់ ក្នុងទិវាវប្បធម៌ជាតិ លើកទី២៥ កាលពីថ្ងៃទី២ ខែមីនា ឆ្នាំ២០២៣ សម្ដេច ហ៊ុន សែន មានប្រសាសន៍ថា វត្តអារាមគួរជាទីកន្លែង ជួយអភិរក្ស ថែរក្សា និងបណ្ដុះបណ្ដាលវង់ភ្លេងពិណពាទ្យ ដែលជាតន្ត្រីបុរាណខ្មែរ។ បន្ថែមលើវង់ភ្លេងពិណពាទ្យ វង់ភ្លេងឆៃយ៉ាំ ក៏ត្រូវបានសម្ដេចស្នើព្រះចៅអធិការវត្ត បង្កើតថ្នាក់បណ្ដុះបណ្ដាល និងបង្កើតវង់ភ្លេងនេះប្រចាំវត្តផងដែរ។
សម្ដេច មានប្រសាសន៍ថា៖«ទីអារាម យ៉ាងហោចណាស់ជួយ២រឿង ទាក់ទងនឹងភ្លេងពិណពាទ្យ និងឆៃយ៉ាំ។ ភ្លេងពិណពាទ្យ អត់មានស្ថានភាពខាងក្រៅរក្សាបានទេ។ ភ្លេងពិណពាទ្យភាគច្រើនទុកនៅទីអារាម។ ដូច្នេះចំណុចនេះគួរតែលើកទឹកចិត្ត ពុទ្ធបរិស័ទជួយដល់ព្រះសង្ឃ ដើម្បីទីអារាមយើងមានភ្លេងពិណពាទ្យ»។
សំឡេងសម្តេច ហ៊ុន សែន
វត្តក្នុងប្រទេសកម្ពុជាមានប្រមាណជាង៤ពាន់វត្ត ហើយសម្ដេចនាយករដ្ឋមន្ត្រី មើលឃើញថា បើមានវត្តតែពាក់ណ្ដាល មានវង់ភ្លេងពិណពាទ្យ ក៏អាចបណ្ដុះបណ្ដាលយុវជន និងក្មេងជំនាន់ក្រោយនៅតាមមូលដ្ឋាន បានច្រើនដែរ។
សម្ដេងបន្តថា នោះគឺជាការថែមរតកដូនតា ហើយសម្ដេចបានអំពាវនាវ ដល់ព្រះចៅអធិការវត្តគ្រប់ព្រះអង្គ ក៏ដូចជាគណៈកម្មការអាចារ្យវត្ត បង្កើនការយកចិត្តទុកដាក់ ទាក់ទាញការចូលរួមជួយឧបត្ថម្ភពីសប្បុរសជន ពុទ្ធបរិស័ទចំណុះជើងវត្ត ដើម្បីឱ្យទីអារាមទាំងនោះមានភ្លេងពិណពាទ្យ។
«ភ្លេងពិណពាទ្យមិនមែនមានតម្រូវការតែក្នុងទីអារាមទេ ប៉ុន្តែមានតម្រូវការពេលបុណ្យទាន ទាំងបុណ្យសព បុណ្យបច្ច័យបួន ឬបុណ្យទានផ្សេងៗ នៅតាមគេហដ្ឋានផងដែរ។ ពលរដ្ឋអាចទៅសុំខ្ចី ឬព្រះសង្ឃអាចចូលរួមជួយដល់ពលរដ្ឋ ប្រើប្រាស់ភ្លេងពិណពាទ្យ ជំនួសឱ្យការចាក់តាមឧគ្ឃោសនសព្ទ»។ នេះជាការលើកឡើងរបស់ប្រមុខរដ្ឋាភិបាលដដែល៕
Tag:
សិល្បៈ
វប្បធម៌
សម្ដេច ហ៊ុន សែន
ទិវាវប្បធម៌ជាតិ
© រក្សាសិទ្ធិដោយ thmeythmey.com
