ជាតិ
កម្ពុជា នឹងស្នើដាក់ “ក្រមា” ក្នុងបញ្ជីបេតិកភណ្ឌពិភពលោក 05, Mar 2023 , 12:00 pm
រូបពីក្រសួងវប្បធម៌និងវិចិត្រសិល្បៈ
× ភ្នំពេញ៖ កម្ពុជាគ្រោងស្នើទៅអង្គការយូណេស្កូ សុំដាក់ “ក្រមា” ក្នុងបញ្ជីសម្បត្តិបេតិកភណ្ឌវប្បធម៌អរូបីនៃមនុស្សជាតិ។ គិតត្រឹមថ្ងៃទី៥ ខែមីនាឆ្នាំ២០២៣នេះ កម្ពុជាបានរៀបចំឯកសារស្នើនោះ បាន៧០ភាគរយហើយ។
លោក ស៊ីយ៉ុន សុភារិទ្ធ អគ្គនាយកនៃអគ្គនាយកដ្ឋានបច្ចេកទេសវប្បធម៌នៃក្រសួងវប្បធម៌ និងវិចិត្រសិល្បៈ បានប្រាប់សារព័ត៌មានថ្មីៗថា នៅថ្ងៃទី១៧ខែមីនា ឆ្នាំ២០២៣នេះ ក្រសួងវប្បធម៌និងវិចិត្រសិល្បៈ នឹងធ្វើសិក្ខាសាលាមួយនៅខេត្តសៀមរាប ដើម្បីបង្ហាញឯកសារត្រៀមស្នើសុំទាំងឡាយ ទៅកាន់អ្នកភូមិ ក៏ដូចជាសហគមន៍ពាក់ព័ន្ធ ដើម្បីជួយពិនិត្យ និងស្វែងរកការឯកភាព មុនពេលបញ្ចូនឯកសារទាំងនោះ ដាក់ស្នើទៅអង្គការយូណេស្កូ។
រូបពីហ្វេសប៊ុក Preap Chnamara
ទោះជាយ៉ាងណា លោក ស៊ីយ៉ុន សុភារិទ្ធ ពុំបានបញ្ជាក់ពីថ្ងៃដែលនឹងបញ្ជូនឯកសារទាំងនោះ ទៅអង្គការយូណេស្កូជាក់លាក់ឡើយ ដោយលោកគ្រាន់តែបញ្ជាក់ថា និងដាក់ទៅនៅក្នុងខែមីនានេះ។
លោក សុភារិទ្ធ បន្ថែមថា ក្រសួងវប្បធម៌ មិនអាចទៅបង្ខំអ្នកភូមិ ឬសហគមន៍ឱ្យដាក់របស់អ្វីមួយ (មរតកវប្បធម៌អរូបី) ស្នើចុះបញ្ជីក្នុងអង្គការយូណេស្កូឡើយ។ លោក មានន័យថា អ្នកភូមិឬសហគមន៍ គឺជាអ្នកចង់ដាក់ឬចង់ស្នើរបស់ទាំងនោះ ទៅអង្គការយូណេស្កូ ដោយខ្លួនឯង។ រដ្ឋាភិបាល ដែលមានក្រសួងវប្បធម៌ ជាសេនាធិការ គ្រាន់តែជួយសម្របសម្រួលលើកិច្ចការងារនោះប៉ុណ្ណោះ។
«ក្រសួងវប្បធម៌ ដើរតួជារដ្ឋភាគីជួយសម្របសម្រួល ព្រោះឯកសារគតិយុត្តិមួយចំនួន អ្នកភូមិមិនចេះ ឬមិនដឹងពីរបៀបធ្វើ ទើបបានជារដ្ឋជួយ។ ប៉ុន្តែរដ្ឋមិនអាចទៅបង្ខំអ្នកភូមិថា ត្រូវតែដាក់របស់នេះឬរបស់នោះឡើយ»។ នេះជាការបញ្ជាក់របស់លោក ស៊ីយ៉ុន សុភារិទ្ធ៕
សូមអញ្ជើញអស់លោក លោកស្រី អ្នកនាងកញ្ញា ស្ដាប់បទសម្ភាស រវាងកញ្ញា ប៉ូ សាគុន អ្នករាយការណ៍របស់សារព័ត៌មានថ្មីៗ ជាមួយលោក ស៊ីយ៉ុន សុភារិទ្ធ អគ្គនាយកនៃអគ្គនាយកដ្ឋានបច្ចេកទេសវប្បធម៌ ខាងក្រោម៖
Tag:
វប្បធម៌
សិល្បៈ
ក្រមា
អង្គការយូណេស្កូ
អរូបី
បេតិកភណ្
© រក្សាសិទ្ធិដោយ thmeythmey.com