ជាតិ
តើយុវជនបានដឹងអ្វីខ្លះពី «ទិវាសិទ្ធិនារី»? 08, Mar 2023 , 9:29 am
× ថ្ងៃ៨មីនា ជាថ្ងៃរំលឹកខួបលើកទី១១២ នៃសិទ្ធិនារីនៅលើពិភពលោក ដែលបានទាមទារសិទ្ធិស្មើបុរស។ ដើមទងនៃរឿងនេះ បានកើតឡើងកាលពីចុងសតវត្សរ៍ទី១៩ ដែលនារី និងកុមារក្រីក្ររាប់លាននាក់ ត្រូវបានថៅកែរោងចក្រកៀបសង្កត់ បង្ខំឱ្យធ្វើការលើសម៉ោងជារៀងរាល់ថ្ងៃ តែប្រាក់ឈ្នួលបានតិចតួចបំផុត។
ដោយសារតែមានការកៀបសង្កត់ពីមួយថ្ងៃទៅមួយថ្ងៃបែបនេះ នៅថ្ងៃទី ៨មីនា ឆ្នាំ១៨៩៩ កម្មការិនីផ្នែកតម្បាញ និងកាត់ដេរនៅទីក្រុងស៊ីកាហ្គោ និងញូវយ៉ក សហរដ្ឋអាមេរិក បានសាមគ្គីឯកភាពគ្នាក្រោកឈរឡើងតស៊ូយ៉ាងប្ដូរផ្ដាច់ទាមទារឱ្យបន្ថយម៉ោងធ្វើការ និងដំឡើងប្រាក់បៀវត្ស។
ចលនាដ៏ស្វិតស្វាញនេះ បានជះឥទ្ធិពលយ៉ាងខ្លាំងទៅលើនារីជាពលករនៅប្រទេសអាល្លឺម៉ង់ ដោយពេលនោះ ក៏មានយុវនារី៣រូបដ៏ល្បីល្បាញ គឺ អ្នកស្រី ក្លារ៉ា ហ្សេតគិន ជនជាតិអាល្លឺម៉ង់ និង រ៉ូសា លូហ្សេមប៊ើក ជនជាតិប៉ូឡូញ ដែលបានរួមគ្នាជាមួយអ្នកស្រី គ្រុបស្កាយ៉ា (ភរិយាលោកឡេនីន) ក្នុងការបំផុសចលនាបង្កើតបានជាគណៈលេខាអន្តរជាតិដើម្បីដឹកនាំចលនានារី។
រហូតដល់ឆ្នាំ១៩១០ ក៏បានធ្វើសន្និបាតអន្តរជាតិនារី នៅទីក្រុងកូប៉ែនហាក រដ្ឋធានីនៃប្រទេសដាណឺម៉ាក ដែលមានប្រទេស ១៧ ចូលរួម ហើយបានសម្រេចយកថ្ងៃ ៨ មីនា ជាថ្ងៃ “ទិវានារីអន្តរជាតិ” ។ ចាប់តាំងពីថ្ងៃនោះមក ថ្ងៃ៨មីនា បានក្លាយទៅជាថ្ងៃបុណ្យអន្តរជាតិនារី ដែលរំឭកអំពីការតស៊ូរបស់នារីពលករទូទាំងសកលលោក ដែលប្រឹងប្រែងដើម្បីរំដោះនារី និងទាមទារឱ្យអនុវត្តសិទ្ធិស្មើភាពរវាងបុរស និងនារី។
នាងខ្ញុំ ញឹក សំអូន សហការីសារព័ត៌មានឌីជីថលថ្មីៗ បានសួរពីចាប់ណាប់អារម្មណ៍របស់សិស្សនារីៗ និងយុវជន ដើម្បីចង់ដឹងថា តើពួកគេបានដឹងអ្វីខ្លះ ដែលទាក់ទងការប្រារព្ធឡើងនៃសិទ្ធិនារីអន្តរជាតិ? ដូច្នេះសូមទស្សនាវីដេអូដូចតទៅ៖
© រក្សាសិទ្ធិដោយ thmeythmey.com