កញ្ញា សុង សុធាវី៖  ដោយសារតែវាជះឥទ្ធិពលដល់ក្មេងជំនាន់ក្រោយ នឹងជាការបំពុលសង្គម តើមានវិធីធ្វើទីផ្សារបែបណាខ្លះជំនួសឱ្យការបង្ហាញភាពសិចស៊ីហួសហេតុដូចរាល់ថ្ងៃ របស់ស្រ្តីលក់អនឡាញន៍មួយចំនួន?
 

អ្នកស្រី លឹម វិរិយ៉ា៖ ផលិតផលមួយ អាចលក់ដាច់បាន ទាល់តែអ្នកទិញ បានទទួលចំណេះដឹង អត្ថប្រយោជន៍ពីផលិតផលនោះ! ទោះបីជាផលិតយើងល្អឥតខ្ចោះបែបណាក៏ដោយ តែបើយើងគ្មានសមត្ថភាពនិយាយពន្យល់ពីអត្ថប្រយោជន៍នៃផលិតផលហ្នឹងទេ នោះយើងមិនអាចអន្ទងចិត្តគេឱ្យមកទិញបានឡើយ។ បើសិនយើងគ្មានសមត្ថភាពផ្សាយដោយខ្លួនឯងទេ នោះយើងត្រូវតែជួលអ្នកជំនាញមកជួយ។ 

 

កញ្ញា សុង សុធាវី៖ សម្រាប់ការផ្សព្វផ្សាយផលិតផលហ្នឹង តើមានរូបភាពបែបណាខ្លះអ្នកស្រី?
 

អ្នកស្រី លឹម វិរិយ៉ា៖ ក្រុមអ្នករកស៊ីធ្វើទីផ្សារ អ្នកបង្កើតមាតិការ អ្នកសរសេរអត្ថបទ អ្នកនិយាយផ្សព្វផ្សាយ អ្នកសម្តែង។ល។ ទាំងនេះ វាបែងចែកទៅតាមទេពកោសល្យរបស់មនុស្ស ម្នាក់ៗ ដែលយើងអាចស្វែងរកបាន ប្រសិនបើចិត្តយើងពិតជាចង់មែន។ គ្រាន់តែនិយាយពីគ្រឿងសម្អាងមួយ គឺមានមាតិការរាប់រយក្នុងការពិពណ៌នាបាន តែបើថាល្ងង់ណាស់ សូមបើកមើល យូធូប ហ្គូហ្គល ទៅស្រាវជ្រាវបន្តិចទៅថាគេធ្វើមិចទើបលក់ផលិតផលរបស់គេដាច់? ហើយយើងត្រូវយកគំនិតទាំងអស់ហ្នឹងទៅច្នៃប្រឌិតឡើងមក។ ធ្វើជាវីដេអូខ្លីៗ ហើយពន្យល់ប្រាប់គេ ថាផលិតផលហ្នឹងផ្សែផ្សំពីអ្វីខ្លះ? តើផលិតផលហ្នឹងមានគុណភាពបែបណាខ្លះ? ក្នុងការពន្យល់ប្រាប់គេ។ រួចយើងយកវាទៅផ្សព្វផ្សាយក្នុង Media ណាមួយ ដែលអតិថិជនគោលដៅរបស់យើងបានមើលឃើញ។ ខ្ញុំជឿថា គ្រាន់តែហ្វេសប៊ុកផេកតែមួយក៏មាន toll ឱ្យផ្សាយពាណិជ្ជកម្មបាន ដល់អតិថិជនគោលដៅដែរ។ នេះយើងមិនទាន់និយាយដល់មធ្យោបាយផ្សេងៗទៀតទេ។ ទម្រង់ off line ទោះបីជាវាមិនទាន់ហួសសម័យ តែវាមិនសូវមានប្រសិទ្ធភាព ដូចជាការចុះទស្សាវដ្តី ធ្វើខិតបណ្ណចែកចាយ។ល។ តែវាក៏មានខ្លះដែរ​ ដូចជាការលើកផ្ទាំងពាណិជ្ជកម្មធំៗ គ្រាន់តែថាវាចាយដើមទុនអស់ច្រើន។ តែសម្រាប់អ្នករកស៊ីតូចតាច  ត្រូវងាកមករកស៊ីលើអនឡាញន៍ ដែលវាមានទម្រង់ នៅលើបណ្តាញសង្គមដូចជា Instagram , You tube , Tik Tok ក៏យើងអាចប្រើវា ដើម្បីកើបប្រាក់ចំណេញបានដែរ។ តែសំខាន់លើមាតិការ ដែលត្រូវតែបង្កប់ដោយការអប់រំ។ ឬ ការបង្កើតរឿងកំប្លែង តែក៏មិនមែនកំប្លែងបែបអាសអាភាសដែរ ហើយក៏មិនចាំបាច់ទាល់តែស្រាតខោ ឬ ក៏ដោះអាវទេ។ 

 

កញ្ញា សុង សុធាវី៖ យើងមើលឃើញថា​ រឿងទាំងហ្នឹងកើតឡើងហើយ ពេលមានការចាត់វិធានការណ៍ក៏ស្ងាត់ទៅវិញមួយរយៈ តែក៏ឃើញមានការកើតឡើងដដែលៗទៀត តើអ្នកស្រីយល់ឃើញបែបណា?
 

អ្នកស្រី លឹម វិរិយ៉ា៖ អាហ្នឹងវាដូចវែកចក វាដូចចាប់ក្តាមដាក់ចង្អេរ ហើយវាដូចយើងប្រដៅក្មេងតូចៗ អ៊ីចឹង! បើថ្ងៃក្រោយគាត់ខុសទៀតត្រូវតែនិយាយទៀត និង ចាត់វិធានការណ៍។  អ៊ីចឹងហើយ ទើបគេបង្កើតស្ថាប័នមានសមត្ថកិច្ច ដើម្បីចាត់វិធានការណ៍ លើរឿងអស់ហ្នឹង។ រដ្ឋាភិបាលគួរមានវិធានការណ៍ណាមួយលើរឿងទាំងអស់នេះ! ក្រែងរដ្ឋាភិបាលយើងចំណាប់ណាស់តើ រឿងតាមដាន សើបអង្កេតរឿងសកម្មជននយោបាយ អ្នកបរិស្ថានអីហ្នឹង! ចុះរឿងចង្រៃបែបនេះ មិចបានជាធ្វើដូចជាមើលមិនឃើញអ៊ីចឹង? សូមកុំប្រាប់ថាសិទ្ធអី តែវាចូលលក្ខណៈបៀតបែន សីលធម៌សង្គមហើយ។ វាបំផ្លាញដល់តម្លៃស្រ្តីទូទៅផ្សេងទៀត ហើយជះឥទ្ធិពលអាក្រក់ជាច្រើនដល់ក្មេងៗរាប់មិនអស់។ ក្រសួងកិច្ចការនារី គួរតែបង្កើតគណៈកម្មាធិការមួយ ហៅពួកគាត់មកអប់រំ ណែនាំ ហើយបើលើកទី១មិនរៀង លើកទី២ បញ្ជូនទៅប៉ុស្តិ៍នគរបាលទៅ។ ខ្ញុំធ្លាប់ទៅចូលរួមកម្មវិធីស្រុកគេ គេមានក្រុមគណៈកម្មការនគរបាលសីលធម៌ តែស្រុកយើងមិនទាន់មានទេ។ នគរបាលសីលធម៌ហ្នឹង ធ្វើកិច្ចការងារពាក់ព័ន្ធរឿងបែបហ្នឹង! ហ្នឹង វាមិនមែនជាទោសធ្ងន់ធ្ងរដែលដល់ថ្នាក់យកទៅដាក់គុក ឬ ច្រវ៉ាក់អីទេ។ តែវាជាទោសមួយ ដែលអ្នកធ្វើខុសគួរតែបញ្ជូនឱ្យយកទៅធ្វើការអប់រំពិសេស កសាងខ្លួនឱ្យបានថ្លៃថ្នូរមកវិញ។ មនុស្សដែលចូលចិត្តធ្វើអ្វីមួយពីកំណើតហើយ យើងទៅផ្លាស់ប្តូរ ឧប្បនិស្ស័យគេ វាជារឿងលំបាកណាស់ ព្រោះគេចង់បែបហ្នឹង! បើអ្នកដែលចូលចិត្តសិចស៊ីក៏ដោយចុះ តែត្រូវឋិតក្នុងក្រមសីលធម៌ មានន័យថា លក្ខខណ្ឌមួយ ដែលសង្គមអាចទទួលយកបាន។ តែបើគាត់មានះចង់ថតសិចស៊ី បែបស្រាត ហើយរោលរាលអ៊ីចឹង មានវិធីមួយគឺ បង្វែកាមេរ៉ាពួកគេទៅគេហទំព័រ បែបអាសអាភាសហ្នឹងទៅ ព្រោះកន្លែងហ្នឹង វាមានរនាំងឧបសគ្គដែលក្មេងៗ តូចៗ មិនទាន់គ្រប់អាយុមិនអាចចូលទៅមើលបាន។ កន្លែងហ្នឹងហើយ ដែលក្នុងនាមអាជ្ញាធរមានសមត្ថកិច្ចត្រូវតែប្រើវិធីសាស្រ្ត ចំណេះដឹងដែលយើងរៀនចេះដឹងមកហ្នឹង ទៅបង្រ្កាបអ្នកអស់ហ្នឹង ឱ្យសង្គមយើងមានសណ្តាប់ធ្នាប់។

 

គួរបញ្ជាក់ផងដែរថា នៅក្នុងឆ្នាំ២០២៣នេះ ក្រសួងកិច្ចការនារី ក្នុងកិច្ចសហការជាមួយក្រសួង-ស្ថាប័ន អង្គការសង្គម​ស៊ីវិល    ដៃគូអភិវឌ្ឍន៍ វិស័យឯកជន រួមទាំងបណ្តាញផ្សព្វផ្សាយ និងដៃគូពាក់ព័ន្ធ នឹងរៀបចំយុទ្ធនាការអបអរសាទរទិវា​អន្តរជាតិនារី ៨ ​មីនា​ ខួបទី​១១២ ក្រោមមូលបទ «ស្រ្តីរួមគ្នា រក្សាសុខសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល» ក្នុងគោលបំណងបន្តរំលេចពីតម្លៃនៃការចូលរួមរបស់ស្រ្តីដែលមិនអាចកាត់ថ្លៃបានក្នុងការថែរក្សាសុខសន្តិភាព ក៏ដូចជាកំពុងចូលរួមយ៉ាងសកម្ម ក្នុងការពន្លឿនកិច្ចអភិវឌ្ឍលើគ្រប់វិស័យ ។

ក្នុងភាពជាដៃគូ ប្រជាពលរដ្ឋកម្ពុជា ទាំងស្រ្តីនិងបុរស នឹងចូលរួមដោយស្មើភាពនិងស្មើសិទ្ធិជាមួយប្រជាពលរដ្ឋនៃបណ្តាប្រទេសនានា ទាំងក្នុងតំបន់និងសកលលោក ជាពិសេសនៅក្នុងយុគសម័យឌីជីថល និងនៅក្នុងរបៀបវារៈស្តារសេដ្ឋកិច្ច-សង្គមក្រោយវិបត្តិកូវីដ-១៩ ក៏ដូចជាការកសាងភាពធន់ រឹងមាំ និងការអភិវឌ្ឍប្រកបដោយចីរភាព។

 

ក្នុងបរិការណ៍នេះ ការយកចិត្តទុកដាក់និងការពង្រឹងសមភាពយេនឌ័រ នៅតែបន្តជាកិច្ចការអាទិភាព ដើម្បីធានាថា ស្រ្តីនិងក្មេងស្រីគ្រប់រូបទទួលបានសមភាពនៅក្នុងគ្រប់ទិដ្ឋភាព ទាំងនៅក្នុងវិស័យនយោ​បាយ   សេដ្ឋកិច្ច និងសង្គមកិច្ច ព្រមទាំងអនុវត្តនូវ​សិទ្ធិ ​ចូលរួមដោយស្មើភាព ជាធនធានដ៏មានតម្លៃ និងជាដៃគូមិនឤចខ្វះបានជាមួយ​បុរស ក្នុងការ​អភិវឌ្ឍប្រទេសជាតិ និងរស់នៅក្នុងសង្គម ដោយភាពថ្លៃថ្នូរ ជីវភាពល្អប្រសើរ និងប្រកបដោយសុខុមាលភាព៕