អន្តរជាតិ
ហ្វីលីពីន ចេញយុទ្ធសាស្ត្រថ្មីបង្ហាញសកម្មភាពបំពានរបស់ចិននៅសមុទ្រចិនខាងត្បូងជាសាធារណៈ 09, Mar 2023 , 10:29 am
× កងឆ្មាំឆ្នេរសមុទ្រហ្វីលីពីនបានចាប់ផ្តើមអនុវត្តយុទ្ធសាស្រ្តថ្មីដោយផ្សព្វផ្សាយជាសាធារណៈអំពីសកម្មភាពឈ្លានពានរបស់ចិននៅក្នុងសមុទ្រចិនខាងត្បូង សំដៅជំរុញឱ្យមានការយកចិត្តទុកដាក់លើទីក្រុងប៉េកាំងខ្លាំងជាងមុន។
ជាមួយការកើនឡើងសកម្មភាពរបស់ចិន ឆ្មាំឆ្នេរសមុទ្រហ្វីលីពីនក៏បានបង្កើនការល្បាតនៅក្នុងដែនទឹកដែលមានជម្លោះនៃសមុទ្រចិនខាងត្បូង ហើយបានខិតខំចងក្រងឯកសារដើម្បីផ្សព្វផ្សាយជាសាធារណៈអំពីអាកប្បកិរិយាឈ្លានពានរបស់ចិននៅក្នុងផ្លូវទឹកយុទ្ធសាស្ត្រនេះ រាប់ទាំងឧបទ្ទវហេតុថ្ងៃទី៦ ខែកុម្ភៈពេលដែលនាវាឆ្មាំសមុទ្ររបស់ចិនបានតម្រង់ឡាស៊ែរយោធាដាក់នាវិកហ្វីលីពីន។
ឆ្មាំឆ្នេរសមុទ្រហ្វីលីពីន បានតវ៉ា និងបញ្ចេញវីដេអូនៃឧបទ្ទវហេតុនេះដែលធ្វើឱ្យប្រទេសក្រៅតំបន់បង្ហាញក្ដីបារម្ភ។ ប្រធានាធិបតីហ្វីលីពីន Ferdinand Marcos Jr បានកោះហៅអគ្គរដ្ឋទូតចិនប្រចាំទីក្រុងម៉ានីលទៅជួបទៀតផង ។
បើតាមឆ្មាំសមុទ្រហ្វីលីពីន ការបង្ហាញទង្វើរបសចិន ជាមធ្យបាយមួយក្នុងការលាតត្រដាងអ្វីដែលកើតឡើងនៅសមុទ្រចិនខាងត្បូង។ មន្រ្តីជើងទឹកហ្វីលីពីន Jay Tarriela លើកឡើងថា តួនាទីរបស់ឆ្មាំឆ្នេរសមុទ្រហ្វីលីពីនជាឧបករណ៍មួយប្រឆាំងនឹងការឈ្លានពានរបស់ចិន និងអនុញ្ញាតឱ្យរដ្ឋដែលមានទស្សនៈដូចគ្នាអាចថ្កោលទោស និងរិះគន់ទង្វើរបស់ចិនច្រើនជាងមុន។
លោក Tarriela បានបញ្ជាក់ផងដែរថា ការបង្ហាញជាសាធារណនូវវីដេអូនិងរូបថតនៃសកម្មភាពរបស់ឆ្មាំសមុទ្រចិនដែលមិនមានការកែសម្រួលនេះ នឹងអាចកែប្រែមតិសាធារណម្តងទៀតដើម្បីថ្លឹងថ្លែងបញ្ហាផ្អែកលើការពិត និងមិនមែនគ្រាន់តែជាការឃោសនានោះទេ៕
© រក្សាសិទ្ធិដោយ thmeythmey.com