ភ្នំពេញ៖ យុវជនខ្មែរ លោក តាំង ហួងហាវ នឹងធ្វើស៊ីក្លូធំជាងគេបំផុតមួយ ដែលមានកម្ពស់ស្មើនឹងអាគារ៤ជាន់ ឬប្រហែល១២ ឬ១៣ម៉ែត្រ ដើម្បីដាក់បំបែកកំណត់ត្រា របស់ Guinness World Record នាខែវិច្ឆិកា ខាងមុខ។ គម្រោងយុវជននេះ ធ្វើឡើងក្នុងគោលបំណង អភិរក្សស៊ីក្លូ និងទាក់ទាញទេសចរ និងជាការរំឭកអនុស្សាវរីយ៍ខ្លួន និងជីដូន។
ដើម្បីជ្រាបច្បាស់សូមលោកអ្នកនាងទស្សនាកិច្ចសម្ភាសដូចខាងក្រោម៖
«ជិះស៊ីក្លូទៅផ្សារថ្មី ឃើញស្រីៗពាក់អាវផើម ខ្ញុំស្មានតែផើម មិនមែនផើមទេ...» ។ នេះជាអត្ថបទចម្រៀងមួយបទ មានចំណងជើងថា «ជិះស៊ីក្លូ» របស់លោក យស អូឡារាំង នាអំឡុងឆ្នាំ១៩៧៤ ។ តាមរយៈបទចម្រៀងនេះ បានបង្ហាញពីវត្តមាន និងការពេញនិយម នៃការជិះស៊ីក្លូនៅជំនាន់នោះ។
ប៉ុន្តែស៊ីក្លូ នាពេលបច្ចុប្បន្នមិនពេញនិយមទៀតឡើយ ខណៈអ្នកធាក់ស៊ីក្លូក៏បានថយចុះ។ ដោយបារម្ភពីការបាត់បង់វត្តមានស៊ីក្លូពីកម្ពុជា និងចង់ជួយដល់អ្នកធាក់ស៊ីក្លូ យុវជនខ្មែរមួយរូប គឺលោក ហួងហាវ បានបង្កើត ឡូខលហ្វ័រឡូខល (Local4Local) ដែលជួយដល់អ្នកធាក់ស៊ីក្លូនៅរាជធានីភ្នំពេញ តាមរយៈធុង «អ្នកមានដាក់ អ្នកខ្វះដក» និងការស្វែងរកអតិថិជនដើម្បីជិះស៊ីក្លូជាដើម។
មានអនុស្សាវរីយ៍ជ្រាលជ្រៅជាមួយស៊ីក្លូ និងចង់ចូលរួមអភិរក្ស បច្ចុប្បន្នយុវជនរូបនេះ កំពុងសិក្សាគម្រោងធ្វើស៊ីក្លូធំជាងគេបំផុត ដែលមានកម្ពស់ប្រហែលអាគារ៤ជាន់ ដើម្បីដាក់បំបែកកំណត់ត្រាពិភពលោក របស់ Guinness World Record។
លោក តាំង ហួងហាវ បានបញ្ជាក់ថា ស៊ីក្លូ ដែលនឹងដាក់បំបែកកំណត់ត្រាក្នុងខែវិច្ឆិកា ឆ្នាំ២០២៣ គឺមានកម្ពស់ចន្លោះ ១២ ទៅ១៣ម៉ែត្រ, បណ្ដោយចន្លោះ១៨ ទៅ២០ម៉ែត្រ។ ស៊ីក្លូធំជាងគេនេះ គឺមិនត្រឹមតែមានទំហំធំប៉ុណ្ណោះទេ តែស៊ីក្លូនេះគឺបន្លាស់ទីដូចជាស៊ីក្លូធម្មតាដែរ។
បើតាមសម្ដីលោក តាំង ហួងហាវ ដើម្បីអាចក្លាយជាត្រីចក្រយានធំជាងគេ គឺត្រូវគោរពតាមលក្ខខណ្ឌមួយចំនួន របស់ Guinness World Record។ លក្ខខណ្ឌទាំងនោះរួមមាន ស៊ីក្លូត្រូវមានទំហំធំជាង ត្រីចក្រយានដែលធ្លាប់ត្រូវបានបំបែកកំណត់ត្រា នាពេលកន្លងមក, ស៊ីក្លូត្រូវមានរូបរាងដូចស៊ីក្លូធម្មតា និងអាចដំណើរការ, ស៊ីក្លូ ត្រូវបង្ហាញនៅសាធារណៈ ដើម្បីឱ្យសាធារណជនបានដឹងពីស៊ីក្លូនោះ។
ពាក់ព័ន្ធនឹងកន្លែងដាក់តាំងបង្ហាញនោះ លោក ហួងហាវ មិនទាន់អាចបញ្ជាក់បាននៅឡើយ ។ លោកគ្រាន់តែអាចបញ្ជាក់បានថា មានខេត្ត៣ដែលអាចនឹងត្រូវជ្រើសរើស ក្នុងការដាក់តាំងបង្ហាញត្រីចក្រយាននេះ ក្នុងនោះរាជធានីភ្នំពេញ, ខេត្តសៀមរាប និងបាត់ដំបង។
លោក ហួងហាវ មានភាពជឿជាក់យ៉ាងមុតមាំថា ក្រុមខ្លួននឹងអាចសម្រេចជោគជ័យ ក្នុងការបំបែកកំណត់ត្រាពិភពលោក របស់ស្ថាប័ន Guinness World Record។
ជាគម្រោងអនាគត លោក ហួងហាវ ក៏ចង់បង្កើតសារមន្ទីរមួយ សម្រាប់ដល់បង្ហាញស៊ីក្លូនេះ រួមនឹងយានជំនិះដទៃៗដែលមានវត្តមាននៅក្នុងប្រទេសកម្ពុជា។ គម្រោងសារមន្ទីរនេះ លោកបានហៅវាថា «សារមន្ទីរនៃយានជំនិះ និងស៊ីក្លូ»៕