ការស្រេលាញ់ គួបផ្សំនឹងការខំប្រឹងប្រែងរបស់អ្នកស្រី សុវណ្ណថន បានធ្វើឱ្យអតិថិជនយល់ពីគុណតម្លៃនៃផលិតផលដោយដៃរបស់សិប្បករខ្មែរ និងទទួលបានគាំទ្រជាច្រើន។ ការណ៍នេះ បានជួយឱ្យអ្នកស្រីកាន់តែមានទឹកចិត្តបន្តអភិរក្សកេរដូនតាខ្មែរ ជាពិសេសអ្នកស្រីក៏បានជួយឱ្យជីវភាពសិប្បករមានភាពល្អប្រសើរ។
 

គួរឱ្យសោកស្តាយ ការដាក់លក់មិនទាន់បានប៉ុន្មានផង ស្ថានភាពកាន់តែលំបាកខ្លាំងនៅពេលបិទខ្ទប់ប្រទេស និងបានប៉ះពាល់យ៉ាងធ្ងន់ធ្ងរដល់អាជីវកម្មអ្នកស្រី រួមទាំងសិប្បករ ដែលជាដៃគូសហការខ្លួនផងដែរ។ មិនមានទេសចរ កម្សោយអតិថិជនក្នុងស្រុក ចំណូលធ្លាក់ចុះ គួបផ្សំនឹងទំនួលខុសត្រូវចំពោះអ្នកតម្បាញផងនោះ អ្នកស្រី សុវណ្ណថនបានបង្ខំចិត្តលក់ឡៃឡុងអីវ៉ាន់ ដើម្បីមានថវិកាផ្តល់ឱ្យផលិតករ ។
 

«ពេលខាតលុយកូវីដរាប់ម៉ឺន ហូលរបស់ខ្ញុំ ដែលទុន១០០ភាគរយ នៅសល់តែ១០ភាគរយ ហើយ១០ភាគរយនេះអត់យកពីណាទេ គឺយកពីឡៃឡុងអីវ៉ាន់លក់ ឡៃឡុងអីវ៉ាន់ខាតដើម្បីដើរទៅមុខ។ ខ្ញុំគិតតែពេលហ្នឹង ខាតអីខាតទៅ គិតតែថាយកមកដេរច្នៃ ដាក់លក់ ឱ្យបានលុយយកមកជួយក្រុមការងារ។ ប្រជាពលរដ្ឋក្នុងតំបន់ហ្នឹង រស់ដោយសារអាជីវកម្មមួយហ្នឹង។ បើសិនអាជីវកម្មមួយនេះអត់ដើរ ឬមួយក៏ដួល អ៊ីចឹងស្មើនឹងពួកគាត់អត់មានការងារធ្វើហើយ»។ នេះជាការលើកឡើងរបស់អ្នកស្រី ង៉ែត សុវណ្ណថន។
 

បញ្ហានៃជំងឺកូវីដ-១៩ បានធ្វើឱ្យអាជីវកម្មនេះ បាត់បង់ចំណូលស្ទើរទាំងស្រុង ព្រោះមិនមានភ្ញៀវទេសចរ។ ទន្ទឹមនោះ អ្នកស្រីក៏បានផ្តល់ដំណឹងទៅខាងសិប្បកម្មផលិតសូត្រដង្កូវនាងឱ្យផ្អាកការងារ ប៉ុន្តែទឹកចិត្តស្រលាញ់ គឺមិនចង់ឱ្យបាត់បង់ឡើយ។ 
 

«ករណីទី១ យោងទៅតាមកេរដូនតា ជាពិសេសបងស្រីនិងបងប្រុស ដែលលោកឪពុកអ្នកម្តាយគាត់ជាអ្នកចិញ្ចឹមដង្កូវនាងតាំងពីបុរាណមកដល់បច្ចុប្បន្ន។ ករណីទី២ ការតម្បាញសូត្ររបស់យើងមិនមានការគាំទ្រទេ ប្រជាជនមានតែជាង១០គ្រួសារដែលចិញ្ចឹម[ដង្កូវនាង] ហើយដោយសារផលលំបាកទីផ្សារ អត់មានអ្នកទិញ ហើយអត់មានអ្នកជួយលក់ទៀត គឺយើងប្រឈមនឹងបិទអាជីវកម្មមួយនេះ បាត់បង់កេរដំណែលមួយហ្នឹង។ អ៊ីចឹងម្នាក់ៗតាំងពីដូនតាមក យើងម៉េចសុខចិត្ត យើងនៅទឹកចិត្តស្រលាញ់ តស៊ូ។ យើងត្រូវតែរកយុទ្ធសាស្រ្តលក់ ដើម្បីឱ្យដំណើរការងារនេះ»។ នេះជាការលើកឡើងរបស់ម្ចាស់ហាង អម្ពររាជិនី កាត់ដេរ។ 
 

អតិថិជនអ្នកស្រី សុវណ្ណថន ភាគច្រើនជាភ្ញៀវទេសចរ ហើយក៏យល់ពីគុណតម្លៃនៃផលិតផលសូត្រដង្កូវនាង និងវត្ថុធាតុដើមធម្មជាតិនេះដែរ។
 

វិបត្តិកូវីដ ជំរុញឱ្យមានការកៃច្នៃផលិតផលថ្មីដោយសារមិនដាច់ចិត្តឈប់ត្រឹមនេះ អ្នកស្រី សុវណ្ណថន និងប្តីប្រពន្ធមួយគូរខាងលើ បានសាកល្បងដានរុក្ខជាតិ និងផ្កា លើអាវ ដើម្បីឱ្យមានការប្រើប្រាស់សូត្រដង្កូវនាងកាន់តែច្រើន និងទាក់ទាញអតិជនបន្ថែមលើកន្សែងសូត្រ។ ដោយសារមានបទពិសោធន៍ពីការផលិតកន្សែងសូត្ររួចហើយ ការដានរូបភាពធម្មជាតិលើអាវ បានធ្វើទៅដោយរលូន និងបានដាក់ឈ្មោះសមិទ្ធិផលថ្មីនេះថា សូត្រផ្កាដង្កូវនាង។