អគ្គលេខាធិការរង IDEA បានថ្លែងបែបនេះ៖ «ខ្ញុំមានសំណូមពរ ក៏ដូចជាអនុសាសន៍ទៅរដ្ឋាភិបាល និងក្រសួងពាក់ព័ន្ធ គឺការកំណត់និយមន័យក្រុមសេដ្ឋកិច្ចក្រៅប្រព័ន្ធឲ្យវា ទូលំទូលាយបន្តិច រាល់ថ្ងៃនៅពេលកំណត់គាត់ចង្អៀតពេក ពួកគេអត់ទទួលបានសារៈប្រយោជន៍ពី ប.ស.ស ទេ!»។

 

ត្រង់ចំណុចនេះ កញ្ញា ពន្យល់ថា កន្លងមកក្រសួងធ្លាប់បានចែងថា ក្រុមអ្នកសេដ្ឋកិច្ចក្រៅប្រព័ន្ធ គឺធ្វើការមិនលើសពី៨ម៉ោងក្នុងមួយថ្ងៃ។ ប៉ុន្តែជាក់ស្ដែង មិនមែនបែបនេះទេ។ កញ្ញាបញ្ជាក់ថា ក្រុមសេដ្ឋកិច្ចក្រៅប្រព័ន្ធ គឺជាក្រុមដែលធ្វើការរកប្រាក់ចំណូលដោយខ្លួនឯង ដែលត្រូវបានអង្គការពលកម្មពិភពលោក កំណត់យ៉ាងច្បាស់ ។ ដូច្នេះការកំណត់ខុសគ្នា រវាងស្ថាប័នរដ្ឋ និងអង្គការពលកម្មពិភពលោកនេះ ទើបពិបាករកចំណុចរួម ដើម្បីឲ្យពួកគេទទួលបានអត្ថប្រយោជន៍ពីកិច្ចគាំពារសង្គម។ 

 

ជាមួយគ្នាដែរ អគ្គលេខាធិការរង IDEA ស្នើឲ្យក្រសួងការងារ និង ប.ស.ស បង្កើនការចុះអធិការកិច្ចការងារ លើរោងចក្រសហគ្រា ដែលពុំទាន់ចុះបញ្ជីក្នុងប្រព័ន្ធ ដើម្បីកុំឲ្យកម្មករខាតបង់ប្រយោជន៍ពីកិច្ចគាំពារសង្គម។ លើសពីនេះ ប.ស.ស ត្រូវផ្សព្វផ្សាយ ពីគោលនយោបាយឲ្យបានផុសផុលទៅដល់ក្រុមគោលដៅ។ 

 

ទន្ទឹមនឹងនេះ កញ្ញាឲ្យ ក្រុមសេដ្ឋកិច្ចក្រៅប្រព័ន្ធ នាំគ្នាលើកពីបញ្ហាប្រឈមទៅជជែក ឲ្យបានច្រើន ដើម្បីឲ្យមហាជន ឬអ្នកពាក់ព័ន្ធ ជាពិសេស រដ្ឋាភិបាល និងអ្នកតាក់តែងគោលនយោបាយ បានដឹងពីបញ្ហា និងដំណោះស្រាយ ឲ្យបានសមស្របសម្រាប់ពួកគេ៕