ជាតិ
ស្រ្តីរងគ្រោះរំលូតនៅពេទ្យដើមអង្ក្រង បានស្លាប់ ក្រោយក្រុមគ្រូពេទ្យព្យាយាមជួយអស់លទ្ធភាព
16, Mar 2023 , 1:59 pm
ស្ត្រីរងគ្រោះ ដែលបានបាត់បង់ជីវិត។ រូបពី ហ្វេសប៊ុក ច័ន្ទ រ៉ា
×![]()
ដោយ: ឡាយ សុភាវតី
ស្ត្រីម្នាក់ដែលយកសពកូនចេញពីផ្ទៃ៤ខែ នៅពេទ្យដើមអង្ក្រង បានបាត់បង់ជីវិតពេលបញ្ជូនចេញមន្ទីរពេទ្យកាលម៉ែតនៅយប់ថ្ងៃទី១៦មីនា ទៅផ្ទះជនរងគ្រោះ។ 
មុននឹងស្ត្រីជនរងគ្រោះទទួលមរណភាព គឺធ្លាប់ចូលព្យាបាលពេទ្យនៅខ្មែរជាច្រើនកន្លែង ហើយក៏ធ្លាប់បានបញ្ជូនទៅព្យាបាលនៅថៃ កាលពីចុងខែធ្នូ ឆ្នាំ២០២២ផងដែរ។ ក្រោយមក ក៏ត្រឡប់មកខ្មែរវិញ ប៉ុន្តែស្ថានភាពស្ត្រីរងគ្រោះនាពេលនោះ ពុំធូរស្រាលទេ គឺបានវិលទៅសម្រាកនៅពេទ្យកាលម៉ែត្រវិញ។
លុះដល់យប់ឈានចូលថ្ងៃទី១៦មីនានេះ ជនរងគ្រោះក៏បានបាត់បង់ជីវិត។ លោក សា វឿន ប្ដីរបស់ជនរងគ្រោះប្រាប់សារព័ត៌មានថ្មីៗ ប្រពន្ធខ្លួនស្លាប់ពេលក្រុមគ្រូពេទ្យបញ្ជូននាងទៅផ្ទះនៅខេត្តកំពត។
លោក សា វឿន បញ្ជាក់យ៉ាងដូច្នេះ៖ «គាត់(អ្នកស្រ្តីរងគ្រោះ)អស់ខ្យល់នៅមន្ទីរពេទ្យកាលម៉ែត្រ តែចង្វាក់បេះដូងគាត់ពុំទាន់អស់ ហើយក៏ដឹកចេញមកប្រមាណ១០គីឡូម៉ែត្រ គាត់ក៏ផុត(ទទួលមរណភាព)»។ ពាក់ព័ន្ធនឹងករណីនេះ លោក សា វឿន ពន្យល់ថា ក្រុមគ្រូពេទ្យនៅកាលម៉ែត បានដឹងពីលទ្ធផលមុន ទើបសម្រេចឱ្យបញ្ជូនជនរងគ្រោះទៅផ្ទះ ដើម្បីឱ្យសាច់ញាតិទាំងអស់បានជួបនៅគ្រាចុងក្រោយ។ ប៉ុន្តែ ស្ត្រីរងគ្រោះបានបាត់បង់ជីវិតនៅពាក់កណ្ដាលផ្លូវ។
ពាក់ព័ន្ធនឹងពេទ្យដើមអង្ក្រងនេះ ក្រសួងសុខាភិបាល បានសម្រេចបិទ និងដកហូតអាជ្ញាបណ្ណ ជាផ្លូវការ ក្រោយមានករណីព្យាបាលខុសបច្ចេកទេសលើស្ត្រីម្នាក់រំលូតកូនដែលស្លាប់ក្នុងផ្ទៃខាងលើ។ ការសម្រេចបិទមន្ទីរសម្រាកព្យាបាលដើមអង្ក្រង នេះ ដោយសារការប្រើប្រាស់បុគ្គលិកគ្មានការបណ្ដុះបណ្ដាល គ្មានការចុះបញ្ជីគណៈវិជ្ជាជីវៈ និងការផ្លាស់ប្ដូរទីតាំង ដោយគ្មានការជូនដំណឹងដល់ក្រសួងសុខាភិបាល។
កាលពីថ្ងៃទី១០វិច្ឆិកា ស្ត្រីរងគ្រោះបានរំលូតកូនដែលស្លាប់ក្នុងផ្ទៃ ហើយកូននោះមានអាយុ១៨សប្ដាហ៍នៅពេទ្យដើមអង្ក្រង។ លុះដល់ថ្ងៃទី២២វិច្ឆិកា ស្ត្រីរងគ្រោះ បានទៅពេទ្យដដែលម្ដងទៀត ព្រោះមានសញ្ញា មិនស្រួលក្នុងខ្លួន ហើយពិនិត្យឃើញមានសល់កំទេចសុកក្នុងស្បូន។ បន្ទាប់ពីព្យាបាល លើកទី២ហើយ ស្ត្រីរងគ្រោះមានអាការៈធ្ងន់ធ្ងរ ខាងក្រុមមន្ទីរពេទ្យ ក៏បញ្ជូនស្ត្រីនោះទៅ ព្យាបាលនៅមជ្ឈមណ្ឌលជាតិគាំពារមាតា និងទារក រាជធានីភ្នំពេញ។ សម្រាកនៅមជ្ឈមណ្ឌលជាតិគាំពារមាតា និងទារក ក្រុមគ្រូពេទ្យពិនិត្យឃើញមានបញ្ហាប៉ះពាល់ធ្ងន់ធ្ងរដល់ពោះវៀន ហើយក៏បញ្ជូនទៅអ្នកជំងឺទៅព្យាបាលបន្តនៅព្រះកេតុមាលា នៅថ្ងៃទី២៣វិច្ឆិកា។ សម្រាកនៅ ពេទ្យព្រះកេតុមាលា មិនបានមួយថ្ងៃផង នៅថ្ងៃដដែល ខាងសាច់ញាតិ ស្នើសុំបញ្ជូនទៅព្យាបាលនៅវៀតណាម។ លុះដល់ថ្ងៃទី២៤ អ្នកជំងឺបានត្រឡប់ពីវៀតណាមវិញ និងសម្រាកនៅផ្ទះ អស់រយៈពេល២ថ្ងៃ។ ហើយដល់ថ្ងៃទី២៦ សាច់ញាតិក៏បញ្ជូនទៅសង្គ្រោះនៅកាល់ម៉ែត្រ ព្រោះឃើញមានសភាពអ្នកជំងឺឈឺខ្លាំង។
© រក្សាសិទ្ធិដោយ thmeythmey.com
