គម្រោងអច្ឆរិយភាពនៃទន្លេគង្គ បានឱ្យដឹងថា អ្នកនេសាទឧស្សាហកម្មដាយត្រី នៅគន្លងទី៤ដេ បានបរិច្ចាគត្រីគល់រាំង ចំនួន៤ក្បាល មកឱ្យគម្រោងអច្ឆរិយភាពនៃទន្លេគង្គ។ ត្រីគល់រាំងទាំង៤ក្បាលនោះ មានទម្ងន់ខុសៗគ្នា ដោយមានចាប់ពីទម្ងន់ ១៥គីឡូក្រាម ចំនួនពីរក្បាល ទម្ងន់ ១៧គីឡូក្រាម១ក្បាល និងទម្ងន់២១គីឡូក្រាម១ក្បាល។

 

 

ទន្ទឹមពេលបច្ចុប្បន្នជារដូវទឹកស្រក ត្រីទាំង៤នោះមិនអាចលែងភ្លាមៗបានឡើយ។ ជាមួយគ្នានេះ គម្រោងខាងលើ បានសហការជាមួយវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប និងមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មទឹកសាប របស់រដ្ឋបាលជលផល បានដឹកជញ្ជូនត្រីទាំងនោះ ទៅថែបំប៉ននៅក្នុងស្រះ នៅមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មទឹកសាប ស្ថិតនៅក្នុងឃុំពាមរក៏ ស្រុកពាមរក៏ ខេត្តព្រៃវែង។ 

 

បើតាមការបញ្ជាក់របស់គម្រោងអច្ឆរិយភាពនៃទន្លេមេគង្គ ត្រីគល់រាំងទាំងបួនក្បាលនេះ នឹងត្រូវលែងចូលទៅក្នុងធម្មជាតិវិញ នៅពេលសមស្រប ក្នុងរដូវទឹកឡើងនាឆ្នាំក្រោយ។ 

 

ត្រីគល់រាំង និងត្រីត្រសក់ក្រហម ត្រូវបានចាត់ថ្នាក់ជាប្រភេទទទួលរងគ្រោះជិតផុតពូជបំផុតទាំងនៅលើសកលលោក និងនៅក្នុងប្រទេសកម្ពុជា។ ចំណែកឯ ត្រីក្របី ត្រីខ្លា និងត្រីត្រចៀកដំរី ត្រូវបានចាត់ថ្នាក់ជាប្រភេទរងគ្រោះជិតផុតពូជ ក្នុងប្រទេសកម្ពុជា៕