ក្រុមកីឡាបាល់ទាត់ឈុតស៊ីហ្គេម អាយុក្រោម ២២ឆ្នាំកម្ពុជា ត្រូវប្រកួតជាមួយម្ចាស់ផ្ទះសិង្ហបុរី ដើម្បីប្រជែងយកចំណាត់ថ្នាក់ទី៣ ពានរង្វាន់ Merlion Cup 2023 នៅថ្ងៃទី២៦ ខែមីនា។ ម៉ាឡេស៊ី និងហុងកុង ដែលយកឈ្នះ កម្ពុជា និងសិង្ហបុរី ត្រូវប៉ះគ្នានៅវគ្គផ្តាច់ព្រ័ត្រ។

ចុចទីនេះដើម្បីទទួលបានព័ត៌មានរហ័ស

 

U-22 កម្ពុជា ប្រកួតចាញ់ម៉ាឡេស៊ី ៤-២ ក្នុងការប្រកួតវគ្គពាក់កណ្តាលផ្តាច់ប្រ័ត្រពានរង្វាន់ Merlion Cup 2023 នាថ្ងៃទី២៤ ខែមីនា នៅកីឡដ្ឋាន Jalan Besar ប្រទេសសិង្ហបុរី មុនពេលហុងកុងយកឈ្នះម្ចាស់ផ្ទះសិង្ហបុរី ១-០ ។ 
 

សម្រាប់ឈុត U-22 កម្ពុជា នេះជាបរាជ័យលើកដំបូងក្នុងការជួបគ្នាជាមួយម៉ាឡេស៊ី៣លើកចុងក្រោយ។ តាមរយៈជ័យជម្នះនេះ បានជួយម៉ាឡេស៊ី បន្តទៅជួបហុងកុងដែលយកឈ្នះសិង្ហបុរី នៅវគ្គផ្តាច់ព្រ័ត្រ Merlion Cup 2023។

 

ឈុតស៊ីហ្គេមកម្ពុជាក្រោមការដឹកនាំរបស់លោក Keisuke Honda  នៅសល់មួយប្រកួតទៀតផងដែរ ដោយត្រូវដណ្តើមយកចំណាត់ថ្នាក់ទីលេខ៣ ទល់នឹងសិង្ហបុរី។

ការប្រកួតដណើមចំណាត់ថ្នាក់លេខ៣ Merlion Cup 2023 រវាងកម្ពុជា-សិង្ហបុរី នឹងត្រូវធ្វើឡើងនៅថ្ងៃទី២៦ ខែមីនា វេលាម៉ោង៤រសៀល [ម៉ោងនៅកម្ពុជា] មុនការជួបគ្នាវគ្គផ្តាច់ព្រ័ត្ររវាង ម៉ាឡេស៊ី-ហុងកុង ដែលនឹងធ្វើឡើងនៅម៉ោង ៧:៣០នាទីយប់។
 

នេះជារដូវកាលទី៩ហើយ ដែលពានរង្វាន់ Merlion  បានប្រព្រឹត្តទៅ បន្ទាប់ពីការប្រកួតដំបូងនាឆ្នាំ១៩៨២។ 

 

ចាប់តាំងពីបង្កើតនាឆ្នាំ១៩៨២ ពានរង្វាន់ Merlion បានធ្វើជារៀងរាល់ឆ្នាំ រហូតដល់ឆ្នាំ១៩៨៦ ហើយក៏បានខកខាន។ លុះមកដល់ឆ្នាំ១៩៩២ ព្រឹត្តិការណ៍នេះ ក៏ត្រូវបានចាប់ធ្វើម្ដងទៀត ហើយក៏ខកខានម្ដងទៀត រហូតដល់ឆ្នាំ២០០៩។ បន្ទាប់ពីឆ្នាំនោះមក ពានរង្វាន់ Merlion ត្រូវបានផ្អាក់ការប្រកួតអស់រយៈពេល ១ទសវត្យ ហើយក៏ចាប់បន្ដប្រកួតវិញ នៅឆ្នាំ២០១៩។ 

 នាចុងឆ្នាំ២០១៩ ដោយសារតែបញ្ហាកូវីដ-១៩ ពានរង្វាន់មួយនេះ ត្រូវបានលើកពេល រហូតមកដល់ឆ្នាំ២០២៣ ដែលមានវត្តមានជម្រើសជាតិអាយុក្រោម២២ឆ្នាំកម្ពុជា ចូលរួមប្រកួត៕