ក្នុងសន្និបាតបូកសរុបការងារឆ្នាំចាស់ និងលើកទិសដៅការងារឆ្នាំថ្មីរបស់ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៤ ខែមីនា លោក ឌិត ទីណា បានលើកឡើងថា បច្ចុប្បន្ន វិស័យកសិកម្មកម្ពុជា បានជួបបញ្ហាប្រឈមមួយចំនួនរួមមាន ថ្លៃដើមផលិតកម្មខ្ពស់, ហេដ្ឋារចនាសម្ព័ន្ធគាំទ្រផលិតកម្មនៅមានកម្រិតដូចជា កង្វះផ្ទះសំណាញ់ ប្រព័ន្ធស្រោចស្រពដែលចំណាយទាប ឡសម្ងួត ឃ្លាំងស្តុក ទូត្រជាក់ និងពាណិជ្ជូបនីយកម្មលើកសិផលគន្លឹះនៅមិនទាន់ត្រូវបានជំរុញឱ្យអស់សក្តានុពល។

 

ទន្ទឹមនេះ តុល្យភាពរវាងការអភិរក្ស និងការអភិវឌ្ឍប្រកបដោយនិរន្តរភាព ដើម្បីកាត់បន្ថយសម្ពាធមកលើធនធានព្រៃឈើ និងជលផល នៅតែជាប្រធានបទមួយដែលត្រូវបង្កើនការយកចិត្តទុកដាក់បន្ថែមទៀត។ ដើម្បីឆ្លើយតបនឹងបញ្ហាប្រឈម ក្រសួងកសិកម្ម បានដាក់ចេញទស្សនទានទៅអនាគត ដោយមានការធានាស្ថិរភាពថ្លៃកសិផលក្នុងស្រុក កាត់បន្ថយថ្លៃដើម និងការបង្កើនតម្លៃបន្ថែមនៃផលិតផលកសិកម្មសម្រាប់ការនាំចេញ។ ការបង្កើតជាផលិតផលប្រណិត នឹងក្លាយជាគោលដៅអាទិភាព ដើម្បីបង្កើនប្រាក់ចំណូលដល់កសិករ និងអ្នកចូលរួមក្នុងខ្សែច្រវាក់តម្លៃនៃផលិតផលកសិកម្មទាំងមូល។ 

 

នៅឆ្នាំ២០២៣នេះ ក្រសួងនឹងអនុវត្តយុទ្ធសាស្រ្ត កាត់បន្ថយថ្លៃដើម ដោយប្រើពូជសុទ្ធល្អ បច្ចេកទេសទំនើប និងសន្សំសំចៃថាមពល។ ចំពោះ ហេដ្ឋារចនាសម្ព័ន្ធគាំទ្រផលិតកម្ម ក្រសួងនឹងផ្ដល់ឥណទានមានការប្រាក់ទាប និងកិច្ចសហប្រតិបត្តិការជាមួយដៃគូអភិវឌ្ឍន៍ដើម្បីបង្កើតហេដ្ឋារចនាសម្ព័ន្ធផលិតកម្ម សម្រាប់ផ្ទះសំណាញ់បន្លែ។ 

ដោយឡែក ពាណិជ្ជូបនីយកម្ម ដែលជាការចងក្រងជាបណ្ដាញកសិករ ដល់អ្នកកែច្នៃ និងអាជីវករ នឹងត្រូវបានជំរុញឱ្យអនុវត្តផលិត- កម្មតាមកិច្ចសន្យា ដោយផ្អែកលើផែនការទីផ្សារជាក់លាក់។ ការរៀបចំចងក្រង ជាបណ្តាញខាងលើនឹងផ្អែកលើគោល- ការណ៍ស្ម័គ្រចិត្ត និងគោលការណ៍ទីផ្សារសេរី។

 

លោក ឌិត ទីណា បញ្ជាក់ថា ឥណទានការប្រាក់ទាបនឹងត្រូវបានប្រើប្រាស់ជាមធ្យោបាយលើកទឹកចិត្ត និងតម្រង់ទិសតួអង្គទាំងឡាយ ដែលអនុវត្តការចងក្រងជាបណ្តាញពីកសិករដល់ទីផ្សារ និងការអនុវត្តផលិតកម្មតាមកិច្ចសន្យា។ ពាក់ព័ន្ធនឹងការផ្តល់ឥណទានការប្រាក់ទាបនេះដែរ ធនាគារអភិវឌ្ឍន៍ជនបទ និងកសិកម្ម (ARDB) បានផ្តល់ឥណទានប្រមាណ ៣៨០លានដុល្លាររួចហើយ ដល់កសិករ និងអ្នកកែច្នៃផលិតផលកសិកម្ម ដែលជាង៦០ភាគរយ នៃឥណទាននេះ មានអត្រាការប្រាក់ប្រចាំឆ្នាំក្នុងរង្វង់ត្រឹមតែ ៥ ទៅ ៥,៥ភាគរយ ប៉ុណ្ណោះ។ 

 

លោក ឌិត ទីណា សង្ឃឹមថា នៅឆ្នាំ ២០២៣ ទំហំឥណទានការប្រាក់ទាបបែបនេះនឹងកើនឡើង ហើយផ្តល់ចំគោលដៅអាទិភាពដែលបានកំណត់។ ចំពោះ តុល្យភាពរវាងការអភិរក្ស និងការអភិវឌ្ឍ ក្រសួងនឹងខិតខំបង្កើតជម្រើសផ្សេងៗ ដោយតម្រង់ទិស គម្រោងអភិវឌ្ឍន៍នានា ឱ្យមកគាំទ្រការបង្វែរមុខរបរប្រជាជន ពីការពឹងពាក់លើធនធានជលផល និងព្រៃឈើ ទៅប្រកបមុខរបរផ្សេងដែលមាននិរន្តរភាពសេដ្ឋកិច្ច៕