អ្នកជំនាញប្រពៃណី និងទំនៀមទម្លាប់ លោក ញាណ ភឿន ស្លាប់មួយចំហៀងខ្លួន ដោយសារលើសឈាម

ជាតិ

អ្នកជំនាញប្រពៃណី និងទំនៀមទម្លាប់ លោក ញាណ ភឿន ស្លាប់មួយចំហៀងខ្លួន ដោយសារលើសឈាម

28, Mar 2023 , 8:59 am

រូបភាព

(រូបផ្ដល់ឱ្យ)

ដោយ: ប៉ូ សាគុន

ភ្នំពេញ៖ លោក ញាណ ភឿន រដ្ឋលេខាធិការក្រសួងធម្មការនិងសាសនា មានជំងឺលើសឈាម បណ្ដាលឱ្យស្លាប់មួយចំហៀងខ្លួន អស់រយៈពេលប្រមាណ៥ខែមកហើយ។ រហូតមកដល់ពេលនេះ លោកបានធូរស្បើយបន្តិចវិញហើយ។

ចុចទីនេះដើម្បីទទួលបានព័ត៌មានរហ័ស

អ្នកស្រី ព្រឹម ហាយ អាយុ៦៣ឆ្នាំ ត្រូវជាភរិយារបស់លោក ញាណ ភឿន បានប្រាប់សារព័ត៌មានថ្មីៗ តាមទូរសព្ទថាប្ដីរបស់អ្នកស្រី ត្រូវបានបញ្ជូនទៅមន្ទីរពេទ្យព្រៃនគរ ឯប្រទេសវៀតណាម នៅថ្ងៃទី២ ខែវិច្ឆិកា ឆ្នាំ២០២២កន្លងទៅ ដើម្បីព្យាបាល។ ពេទ្យនៅប្រទេសវៀតណាម បានបញ្ជាក់ប្រាប់អ្នកស្រី ព្រឹម ហាយ ថា អាការជំងឺរបស់លោក ញាណ ភឿន ស្ថិតក្នុងដំណាក់កាលធ្ងន់ធ្ងរខ្លាំង ដោយសារតែឈាមបុកឡើងស្ទើរតែពេញខួរក្បាល ដែលពិបាកនឹងជួយសង្គ្រោះ។

ជាមួយគ្នានោះ ពេទ្យបានបញ្ជាក់បន្ថែមថា បើទោះបីជាអ្នកជំងឺអាចដឹងខ្លួនវិញក្ដី ក៏ពិបាកនឹងព្យាបាលជា ហើយភាគច្រើននៃអ្នកជំងឺប្រទេសនេះ ច្រើនតែដឹងខ្លួនមកជាមួយនឹងការវង្វេងស្មារតី ហើយនឹងបាត់ការចងចាំ។

អ្នកស្រី ព្រឹម ហាយ ពន្យល់បន្ថែម៖«ពេទ្យនៅវៀតណាម គេថាគាត់ធ្ងន់ធ្ងរខ្លាំង។ ឈាមបុកឡើងធ្វើឱ្យជាំក្បាល ស្ទើរតែទាំងស្រុងទៅហើយ។ ពេទ្យថាជំងឺនេះ បើទោះបីជាដឹងខ្លួនវិញ ក៏ពិបាកនឹងជាដែរ។ ហើយអ្នកជំងឺភាគច្រើន ក្រោយដឹងខ្លួន ទៅជារងេរងើ(វង្វេងស្មារតី) បាត់បង់ការចងចាំដែរ។ ប៉ុន្តែគាត់នៅចងចាំដូចពីមុន គាត់អត់វង្វេងទេ។ ពេទ្យថាមិនដែលឃើញទេ មានតែគាត់មួយ ដែលដឹងខ្លួនមកវិញស្មារតីនៅដដែល»។

អ្នកស្រី ហាយ រំលឹកពីហេតុការណ៍ដែលលោក ញាណ ភឿន ធ្លាក់ខ្លួនឈឺដំបូង។ អ្នកស្រីថា ក្នុងអំឡុងខែវិច្ឆិកា ឆ្នាំ២០២២ ប្ដីរបស់អ្នកស្រី បានទៅធ្វើជាអាចារ្យសម្រាប់ពិធីមួយ។ លោកមានអាការដើរមិនត្រង់ផ្លូវ ហើយជ្រុលទៅទាត់ជើងតុ ប៉ុន្តែបានកូនទប់ជាប់មិនធ្វើឱ្យលោកដួលឡើយ។

ក្រោយពីបានជំនួយភ្លាមៗពីគ្រូពេទ្យ លោកអាចបន្តបំពេញតួនាទីជាអាចារ្យបានធម្មតា។ ប៉ុន្តែប្រហែលមួយម៉ោងក្រោយ លោកចាប់ផ្ដើមធ្វើទុក្ខម្ដងទៀត ហើយក្រុមគ្រួសារក៏បានបញ្ជូនលោកទៅសង្គ្រោះបន្ទាន់ នៅមន្ទីរពេទ្យឯកជនមួយ។ លោកក៏ត្រូវបានបញ្ជូនទៅស្កែនខួរបាល នៅមន្ទីរពេទ្យឯកជនមួយផ្សេងទៀត នៅថ្ងៃបន្ទាប់។ ក្រោយព្យាបាលនៅក្នុងប្រទេសកម្ពុជា បានប្រមាណមួយសប្ដាហ៍ លោកក៏ត្រូវបានបញ្ជូនទៅមន្ទីរពេទ្យ ឯព្រៃនគរក្នុងប្រទេសវៀតណាម។

«គាត់(លោក ញាណ ភឿន) វាស់ឈាមរហូត មិនដែលឃើញលើសឈាមទេ។ ប៉ុន្តែថ្ងៃកម្មវិធីនោះ កូនឃើញគាត់ដើរមិនត្រង់ផ្លូវ គេក៏រត់ទៅឱបចង្កេះគាត់ទាន់ មិនធ្វើឱ្យគាត់ដួលទេ។ យើងយកគាត់ទៅឆ្លុះខួរក្បាល។ ពេទ្យនៅខ្មែរ ថាមើលមិនសូវច្បាស់ ឱ្យនៅតាមដានមួយអាទិត្យសិន។ ដល់មួយអាទិត្យហើយ គាត់នៅតែមិនប្រសើរ យើងក៏យកគាត់ទៅវៀតណាម»។ នេះជាការបញ្ជាក់របស់អ្នកស្រី ព្រឹម ហាយ

ទោះជាយ៉ាងណា គិតត្រឹមខែមីនា ឆ្នាំ២០២៣នេះ លោក ញាណ ភឿន បានធូរស្បើយបន្តិចហើយ ដោយលោកអាចទទួលទានបបរបានច្រើនជាងមុន ហើយសុខភាពក៏ប្រសើរឡើងដែរ។ យ៉ាងណាក៏ដោយ លោកនៅតែស្លាប់មួយចំហៀងខ្លួន។

«ពីមុនហូបបានតិច ប៉ុន្តែពេលនេះបានបបរមួយចានដែរ។ ពេទ្យឱ្យទៅពិនិត្យមួយខែម្ដង ប៉ុន្តែដោយសារអាការគាត់ធូរស្រាល គេគ្រាន់តែឱ្យទៅបើកថ្នាំប៉ុណ្ណោះ» ។ នេះបើតាមភរិយាលោក ភឿន ។

យ៉ាងណាក៏ដោយ លោក ញាណ ភឿន បានអះអាងប្រាប់សារព័ត៌មានថ្មីៗថា លោកនៅតែអាចផ្ដល់បទសម្ភាស ឱ្យដល់ប្រព័ន្ធផ្សព្វផ្សាយនានាបានដដែល។

លោក ញាណ ភឿន៖«ជួយប្រាប់គេតគ្នាផងថាខ្ញុំឈឺ ប៉ុន្តែខ្ញុំនៅតែអាចផ្ដល់សម្ភាសបាន។ ចង់សួរអីក៏បានដែរ(ទាក់ទងនឹងប្រពៃណី ទំនៀមទម្លាប់។ ខ្ញុំអាចនិយាយបានទាំងអស់»។

សូមបញ្ជាក់ថា អ្នកជំនាញប្រពៃណី និងទំនៀមទម្លាប់ លោក ញាណ ភឿន បច្ចុប្បន្នមានជន្មាយុ៧២ឆ្នាំ។ លោកមានកូនចំនួន៨នាក់ ស្រី៤នាក់។ ថ្លៃព្យាបាលប្រមាណ៥ខែមកនេះ លោកបានចំណាយអស់ខ្ទង់២ម៉ឺនដុល្លារ៕

Tag:

ក្រសួងធម្មការនិងសាសនា

ប្រពៃណី

ទំនៀមទម្លាប់

ជំងឺ