ពីមួយថ្ងៃទៅមួយថ្ងៃ ស្ថានការណ៍នៅឧបទ្វីបកូរ៉េ កាន់តែក្តៅឡើង ដោយសារតែការបញ្ចេញសាច់ដុំដាក់គ្នាទៅវិញទៅមករវាងកូរ៉េខាងត្បូង អាម៉េរិក និងកូរ៉េខាងជើង តាមរយៈសមយុទ្ធយោធា និងការបាញ់មីស៊ីលឥតដាច់។ ស្របពេលកំពុងមានភាពចម្រូងចម្រាសបែបនេះ លោកគីម ជុងអ៊ុន មេដឹកនាំកូរ៉េខាងជើង នៅថ្ងៃទី២៧ ខែមីនា បានទៅត្រួតពិនិត្យគម្រោងសម្រាប់អាវុធនុយក្លេអ៊ែរ នៅវិទ្យាស្ថានអាវុធនុយក្លេអ៊ែរ។ 

 

ក្នុងដំណើរទស្សនកិច្ចនោះ លោកគីម បានអំពាវនាវ ត្រៀមខ្លួនឱ្យបានរួចរាល់សម្រាប់ការប្រើប្រាស់អាវុធនុយក្លេអ៊ែរនៅគ្រប់ពេល និងគ្រប់កន្លែងទាំងអស់។ 

 

ទន្ទឹមនេះ មេដឹកនាំកូរ៉េខាងជើង បានលើកឡើងពីភាពចាំបាច់ក្នុងការពង្រីកច្រវាក់ផលិតកម្មនៃសារធាតុសម្រាប់ផលិតអភិវឌ្ឍអាវុធនុយក្លេអ៊ែរ និងពង្រឿនការបន្តការផលិតអាវុធនុយក្លេអ៊ែរ ដើម្បីសម្រេចបាននូវគោលដៅរបស់ប្រទេសក្នុងការបង្កើនចំនួនអាវុធនុយក្លេអ៊ែរផង។ 

 

ការអំពាវនាវនេះ ធ្វើឡើងស្របពេលអាម៉េរិក និងកូរ៉េខាងត្បូងកំពុងធ្វើសមយុទ្ធបញ្ជូនកងទ័ពឡើងគោករហូតដល់សប្តាហ៍ក្រោយ។ ទន្ទឹមនេះ អាម៉េរិក ក៏បានបញ្ជូននាវាដឹកយន្តហោះចម្បាំងដើរដោយថាមពលនុយក្លេអ៊ែរ USS Nimitz ដែលនឹងត្រូវចតនៅកំពង់ផែប៊ូសានផង៕