របាយការណ៍ស្តីពីស្ថានភាពស្ថានភាពឥណទាននៅកម្ពុជាសម្រាប់ឆ្នាំ២០២២ ដែលចេញផ្សាយដោយក្រុមហ៊ុនក្រេឌីតប្យួរ៉ូ ខេមបូឌា (CBC) បង្ហាញថា ក្នុងចំណោមអ្នកខ្ចីប្រាក់ជាង៤,៨លាននាក់ទូទាំងប្រទេស អ្នកខ្ចីជាស្ត្រី មានលើស៥០ភាគរយ នៅស្ទើរគ្រប់បណ្តាខេត្ត លើកលែងតែរាជធានីភ្នំពេញ និងខេត្តរតនគិរីប៉ុណ្ណោះ ដែលតួលេខជាខ្ចីជាបុរស មានចំនួនច្រើនជាង។
របាយការណ៍របស់ CBC ផ្អែកលើទិន្នន័យដែលទទួលបានពីសមាជិករបស់ខ្លួនចំនួន១៨៥ស្ថាប័ន ដោយរួមបញ្ចូលទាំងធនាគារ គ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យា និងគ្រឹះស្ថានឥណទានជនបទ។ ទឹកប្រាក់ដែលពលរដ្ឋប្រមាណ ៤,៨លាននាក់ទូទាំង២៥រាជធានី-ខេត្ត បានខ្ចី មានចំនួន១៩៥ ៤៣៩ ២៣៤លានរៀល (៤៨ពាន់លានដុល្លារអាម៉េរិក)។
ពាក់ព័ន្ធនឹងស្ថានភាពឥណទានតាមរាជធានី-ខេត្តនៅទូទាំងប្រទេសកម្ពុជា CBC ពិនិត្យឃើញអត្រានៃការប្រើប្រាស់សេវាឥណទានជាលក្ខណៈបុគ្គល ដែលភាគច្រើនជាស្ត្រី សម្រាប់តម្រូវការបង់រំលោះលើសម្ភារប្រើប្រាស់ អាជីវកម្មខ្នាតតូច កសិកម្ម ទិញផ្ទះ និងបណ្ឌឥណទាន។
ខេត្តដែលមានភាគរយអ្នកប្រើប្រាស់ឥណទានជាស្ត្រីច្រើនជាងគេ គឺពោធិ៍សាត់ (៥៤,៨ភាគរយ) បន្ទាប់មក មាន តាកែវ (៥៤,៧ភាគរយ), កំពង់ស្ពឺ (៥៤,៦ភាគរយ), កំពង់ចាម (៥៤,៥ភាគរយ) និងកំពង់ឆ្នាំង (៥៤,៤ភាគរយ)។ បណ្តាខេត្តផ្សេងទៀត មានភាគរយអ្នកប្រើប្រាស់ឥណទានជាស្ត្រី ពី៥១ ទៅជាង៥៣ភាគរយ ដោយលើកលែងតែរាជធានីភ្នំពេញ ដែលមានត្រឹម៤៨,៦ភាគរយ និងរតនគិរី មាន៤៩,៧ភាគរយ។
គ្រប់ក្រុង-ស្រុក នៅចំនួន១៩ខេត្ត សុទ្ធតែមានចំនួនស្ត្រីជាង៥០ភាគរយជាអ្នកប្រើប្រាស់ឥណទាន។ នៅបន្ទាយមានជ័យ មានតែក្រុងប៉ោយប៉ែត មានបុរស និងស្ត្រី ៥០ភាគរយដូចគ្នា។ នៅមណ្ឌលគិរី អ្នកខ្ចី៥០ភាគរយស្មើគ្នានៅក្រុងសែនមនោរម្យ និងបុរសមាន៥១ភាគរយនៅស្រុកអូររាំង។
នៅរាជធានីភ្នំពេញ បុរស-ស្ត្រី មាន៥០ភាគរយដូចគ្នាលើការប្រើប្រាស់សេវាឥណទាននៅខណ្ឌព្រែកព្នៅ រីឯខណ្ឌផ្សេងទៀត ចំនួនបុរសដែលខ្ចីលុយមានច្រើនជាងស្ត្រី ដោយលើកលែងតែខណ្ឌកំពូល និងពោធិ៍សែនជ័យ ប៉ុណ្ណោះ ដែលចំនួនស្ត្រីមាន៥២ភាគរយ។
នៅរតនគិរី អត្រាអ្នកកម្ចីមាន៥០ភាគរយស្មើគ្នានៅស្រុកកូនមុំ ក្រុងបានលុង និងលំផាត់។ ស្រ្តីមានចំនួនច្រើននៅបរកែវ ខណៈ៥ស្រុកផ្សេងទៀត មានអ្នកខ្ចីជាងបុរសច្រើនជាង។ ក្នុងខេត្តព្រះសីហនុ ក្នុងចំណោម៥ក្រុង-ស្រុក ក្រុងកោះរ៉ុង និងក្រុងព្រះសីហនុ មានអត្រាបុរសច្រើនជាងស្ត្រី ដូចជានៅស្រុកសៀមប៉ាង ខេត្តស្ទឹងត្រែងយ៉ាងដូច្នោះដែរ។
តាមរបាយការណ៍ដដែល ខេត្តចំនួន១៦ រួមមាន បន្ទាយមានជ័យ បាត់ដំបង កំពង់ចាម កោះកុង ក្រចេះ មណ្ឌលគិរី ព្រះវិហារ រតនគិរី សៀមរាប ព្រះសីហនុ ស្ទឹងត្រែង ស្វាយរៀង ឧត្តរមានជ័យ កែប ប៉ៃលិន និងត្បូងឃ្មុំ ប្រើប្រាស់សេវាឥណទានធនាគារ ច្រើនជាងគ្រឹះស្ថានហិរញ្ញវត្ថុផ្សេងទៀត។
រីឯអ្នកនៅរាជធានីភ្នំពេញ ខេត្តកំពង់ឆ្នាំង កំពង់ស្ពឺ កំពង់ធំ កណ្តាល ព្រៃវែង និងតាកែវ ប្រើប្រាស់សេវាឥណទានមីក្រូហិរញ្ញវត្ថុ ច្រើនជាងធនាគារ និងសេវាផ្សេងទៀត ខណៈខេត្តពោធិ៍សាត់ ប្រើប្រាស់សេវាឥណទានធនាគារ និងមីក្រូហិរញ្ញវត្ថុចំនួន១២ស្មើគ្នា។ ក្រុមហ៊ុនភតិសន្យា និងគ្រឹះស្ថានឥណទានជនបទ ជាសេវាឥណទានផ្សេងទៀតដែលពលរដ្ឋ បានខ្ចីប្រាក់៕