ដោយ៖ សែម ប្រាក់ដាវ
រដ្ឋបាលខេត្តកំពត កែប និងព្រះសីហនុនឹងរៀបចំព្រឹត្តិការណ៍សង្រ្កាន្តរយៈពេល៣ថ្ងៃ ចាប់ពីថ្ងៃទី ១៤-១៦ ខែមេសា ខាងមុខនេះ ។
កម្មវិធីសង្ក្រាន្តខេត្តទាំង៣នេះ ត្រូវបានធ្វើឡើងដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំខាល ឈានចូលឆ្នាំថោះ ពុទ្ធសករាជ២៥៦៦។
ខេត្តកំពត នឹងរៀបចំសង្រ្កាន្ត របស់ខ្លួន នៅទីរួមខេត្ត ត្រង់ចំណុច រង្វង់មូលទុរេន រយៈពេល៣ថ្ងៃ ដែលមានការប្រគំតន្រ្តីបុរាណ-សម័យ រាំកម្សាន្ត លេងល្បែងប្រជាប្រិយជាច្រើន និងការតាំងពិព័រណ៍ផលិតផល និងម្ហូបអាហារផងដែរ។
រូបភាពពី៖ មន្ទីរទេសចរណ៍ខេត្តកំពត
លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឱ្យដឹងថា មន្ទីរទេសចរណ៍ខេត្ត កំពុងរៀបចំហេដ្ឋារចនាសម្ព័ន្ធក្នុងខេត្ត និងតាមរមណីយដ្ឋានទេសចរណ៍ នឹងរៀបចំលម្អភ្លើងពណ៌នៅតាមផ្លូវ និងតាមតំបន់ទេសចរណ៍ ដើម្បីស្វាគមន៍ទេសចរក្នុងថ្ងៃសង្ក្រាន្ត។
ប្រធានមន្ទីរទេសចរណ៍ខេត្តកំពត លោក សយ ស៊ីណុល ក៏រំពឹងថា ឆ្នាំនេះខេត្តកំពត នឹងអាខទទួលបានភ្ញៀវទេសចរច្រើនជាងឆ្នាំមុន។ លោក សយ ស៊ីណុល បញ្ជាក់ថា៖ « ភ្ញៀវនឹងមកលេងច្រើនជាងឆ្នាំមុនពីព្រោះខេត្តយើងសម្បូរ តំបន់គោលដៅទេសចរណ៍ជាច្រើន ជាពិសេសឆ្នាំនេះយើងមានព្រឹតិត្តការណ៍សង្រ្កាន្ត។
លើសពីនេះ ក្រៅពីកន្លែងស្នាក់នៅ ខេត្តកំពត ក៏មានជាកន្លែងបោះតង់សម្រាប់សម្រាកលំហែកាយដែរ »។
រដ្ឋបាលខេត្តកែប ក៏នឹងរៀបចំសង្ក្រាន្ត រយៈពេល៣ថ្ងៃ ចាប់ពីថ្ងៃទី ១៤-១៦ ខែមេសា ឆ្នាំ២០២៣ នៅបរិវេណសួនច្បារខាងមុខសាលាខេត្តកែប។ ព្រឹត្តិការណ៍នេះ ក៏នឹងក្លាយជាទីតាំងនៃការជួបជុំ ការលេងល្បែងប្រជាប្រិយ និងរាំលេងកម្សាន្តចង្វាក់ប្រពៃណីខ្មែរផងដែរ។
នៅពេលរាត្រី ភ្ញៀវទេសចរ នឹងអាចរាំលេងកម្សាន្ត ទស្សនាការប្រគំតន្ត្រីខ្នាតធំ ការតាំងពិព័រណ៍ផលិតផល នៅទីតាំងសួនច្បារខាងមុខសាលាខេត្តកែប និងមានការបាញ់កាំជ្រួច អបអរសាទរព្រឹត្តិការណ៍សង្ក្រាន្តទៀតផង។
លោក សោម ចិន្តា ប្រធានមន្ទីទេសចរណ៍ខេត្តកែប លើកឡើងថា រដ្ឋបាលខេត្តកែបកំពុងពង្រឹងសន្តិសុខ សណ្ដាប់ធ្នាប់ អនាម័យ និងការពង្រឹងសេវាកម្មម្ហូបអាហារឱ្យកាន់តែមានភាពល្អប្រសើរ។ «ចូលឆ្នាំខ្មែរខ្ញុំគិតថាទេសចរនឹងមកកម្សាន្តនៅខេត្តកែបច្រើនជាងឆ្នាំមុន»។ នេះជាការរំពឹងរបស់លោក សោម ចិន្តា។
ចំណែកឯ ខេត្តព្រះសីហនុវិញ ក៏នឹងរៀបចំសង្រ្កាន្តរយៈពេល៣ថ្ងៃនៅទីរួមខេត្តដែលមានការប្រប្រគំតន្រ្តីបុរាណ-សម័យ រាំកម្សាន្តលេងល្បែងប្រជាប្រិយជាច្រើន និងការតាំងពិព័រណ៍ផលិតផល និងម្ហូបអាហារផងដែរ។
លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានប្រាប់សារព័ត៌មានThmeyThmey25 ថា ក្នុងឱកាសពិធីបុណ្យចូលឆ្នាំខ្មែរខាងមុខនេះ លោករំពឹងថា ខេត្តព្រះសីហនុ នឹងទទួលបានទេសចរច្រើន ជាពិសេស ភ្ញៀវទេស នឹងរីករាយជាមួយកម្មវិធីជាច្រើនដែលខេត្តបានរៀបចំ។
លោក តាំង សុចិត្តគ្រឹស្នា បញ្ជាក់ដូច្នេះ៖«ភ្ញៀវទេសចរភាគច្រើនចូលចិត្តដើរកម្សាន្តតាមតំបន់ទេសចរណ៍ឆ្នេរ និងកោះដែលមានអំណោយផលពីធម្មជាតិទាំងនោះរួមមាន ឆ្នេរអូរឈើទាល ឆ្នេរឯករាជ្យ ឆ្នេរសុខាកោះរ៉ុង កោះរ៉ុងសន្លឹម កោះសង្សារ និងកោះពស់ជាដើម»។
ជាមួយគ្នានេះ ប្រធានមន្ទីរទេសចរណ៍ខេត្តទាំង៣ក៏បានអំពាវនាវដល់អាជីវករទាំងអស់ឱ្យរក្សាតម្លៃ និងគុណភាពម្ហូបអាហារកុំដំឡើងថ្លៃក្នុងពិធីបុណ្យចូលឆ្នាំខ្មែរខាងមុខ៕