ក្នុងពេលបច្ចុប្បន្ន ក្រុមហ៊ុន បាននឹងកំពុងធ្វើការវិនិយោគយ៉ាងសកម្មលើផ្នែកហេដ្ឋារចនាសម្ព័ន្ធបណ្តាញ ដើម្បីបង្កើនការតភ្ជាប់ និងគាំទ្រដល់ការរស់នៅបែបទំនើបរបស់អតិថិជនរបស់ខ្លួន។ ក្រោមការដឹកនាំរបស់ក្រសួងប្រៃសណីយ៍ និងទូរគមនាគមន៍ និងនិយ័តករទូរគមនាគមន៍កម្ពុជា ក្រុមហ៊ុន Smart កំពុងសហការជាមួយក្រុមហ៊ុន Huawei ដើម្បីបង្កើនគុណភាពបណ្តាញ តាមរយៈការសាងសង់បន្ថែមនូវស្ថានីយ៍អង់តែនមូលដ្ឋានចំនួន ៣៥៧ បន្ថែមទៀតនៅទូទាំងរាជធានីភ្នំពេញ ដែលក្នុងនោះស្ថានីយមូលដ្ឋានចំនួន ៧០ សម្រាប់គម្រោងបុរីចំនួន ៦៥ កន្លែងផងដែរ។ គម្រោងពង្រឹងគុណភាពទាំងនេះទទួលបាននូវជោគជ័យយ៉ាងខ្លាំង ជាពិសេស ការពង្រឹងគុណភាពសេវានៅ​ បុរី​ ប៉េងហួតបឹងស្នោរ ដ៏ល្បីល្បាញ  ដែលគុណភាពសេវាកម្មមានភាពប្រសើរឡើងរហូតដល់ ៧០% នៅក្នុងឆ្នាំនេះ។

 

លើសពីនេះ ក្រុមហ៊ុនកំពុងធ្វើការពង្រីកសមត្ថភាពគ្របដណ្តប់នៃស្ថានីយអង់តែនមូលដ្ខាននីមួយៗ ដោយផ្អែកលើតម្រូវការ និងចំនួនប្រជាជននៅក្នុងតំបន់នីមួយៗ របស់ស្ថានីយអង់តែនមូលដ្ឋាន ដើម្បីបំពេញតម្រូវការអតិថិជន ជាពិសេសនៅតំបន់ដែលមានកំំណើនប្រជាជនខ្ពស់។
 

ក្រុមហ៊ុនទូរគមនាគមន៍មួយនេះ​​ ក៏​កំពុង​បង្កើន​ការ​គ្របដណ្តប់​បណ្តាញ​របស់​ខ្លួន​​នៅ​តាម​ទីតាំង​ផ្សេងៗ​នៅ​ទូទាំង​ប្រទេស​កម្ពុជា។ ស្ថានីយអង់តែនមូលដ្ឋានថ្មីចំនួន ៥ ត្រូវបានដំឡើងរួចជាស្រេចនៅតាមបណ្តោយផ្លូវល្បឿនលឿនភ្នំពេញ-ព្រះសីហនុ ហើយក្រុមហ៊ុនក៏មានគម្រោងបន្ថែមចំនួនស្ថានីយអង់តែនមូលដ្ឋានចំនួន ១៨​ ទីតាំងទៀតនៅតាមដងផ្លូវល្បឿនលឿនក្នុងពេលឆាប់ៗនេះ។ បន្ថែមពីនេះផងដែរ ក្រុមហ៊ុន Smart ក៏បានពង្រីកសេវាបណ្តាញរបស់ខ្លួន សម្រាប់តំបន់អភិវឌ្ឍន៍ថ្មីជាច្រើនផងដែរ រួមមានភូមិអភិវឌ្ឈន៍ថ្មី រុនតាឯក ក្នុងខេត្តសៀមរាប ដែលស្ថានីយ៍អង់តែនថ្មីចំនួន២ ត្រូវបានតម្លើងនាពេលថ្មីៗនេះ ដើម្បីធានាបាននូវគុណភាពនៃសេវាកម្ម និងការទំនាក់ទំនងឌីជីថលសម្រាប់ប្រជាជនដែលរស់នៅទីនោះ។
 

លើសពីនេះទៅទៀត ក្រុមហ៊ុន Smart ក៏បានបង្កើនចំនួនស្ថានីយ៍អង់តែនមូលដ្ឋានចំនួន៤ បន្ថែមទៀតនៅក្នុងបរិវេណប្រាសាទអង្គរវត្ត ដើម្បីផ្តល់នូវបទពិសោធន៍ល្អបំផុតដល់ភ្ញៀវទេសចរជាតិ និងអន្តរជាតិ ជាពិសេសស្របពេលនឹងឱកាសព្រឹត្តិការណ៍អង្គរសង្ក្រាន្ត និងពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងប្រព្រឹត្តទៅនាពេលឆាប់ៗនេះ។ ក្នុងការរៀបចំ ការប្រកួតស៊ីហ្គេម និងប៉ារ៉ាហ្គេមឆ្នាំ ២០២៣ ដែលកាន់តែខិតជិតមកដល់នោះ ស្ថានីយ៍អង់តែនមូលដ្ឋានចំនួន ១៤ ទៀត រួមទាំងស្ថានីយ៍អង់តែនបណ្តោះអាសន្ននៅក្នុងបរិវេណប្រកួតត្រូវបានតម្លើងជាស្ថាពរដាក់ឲ្យប្រើប្រាស់ផងដែរ។ ស្ថានីយ៍អង់តែនមូលដ្ឋានជាច្រើនកន្លែងបន្ថែមទៀតគ្រោងនឹងបញ្ចប់ មុនពេលព្រឹត្តិការណ៍ប្រវត្តិសាស្រ្តនេះចាប់មានដំណើរការនៅក្នុងខែឧសភា។
 

នាយកប្រតិបត្តិក្រុមហ៊ុន Smart លោក Ziad Shatara បានមានប្រសាសន៍ថា «ក្រុមហ៊ុន Smart តែងតែចាត់ទុកអតិថិជនជាគុណតម្លៃស្នូលនៃអាជីវកម្មរបស់យើងជានិច្ច។ យើងយល់ច្បាស់ថា ពួកគាត់ពឹងផ្អែកលើក្រុមហ៊ុនរបស់យើងដើម្បីរក្សាទំនាក់ទំនង ដែលនេះហើយជាមូលហេតុធ្វើឲ្យយើងប្តេជ្ញាចិត្តយ៉ាងមុតមាំ់ក្នុងការផ្តល់ជូននូវបទពិសោធន៍ល្អបំផុតតាមរយៈផលិតផល និងសេវាកម្មរបស់ក្រុមហ៊ុន រួមជាមួយនឹងការវិនិយោគលើបច្ចេកវិទ្យាចុងក្រោយបំផុត ដើម្បីរក្សា និងអភិវឌ្ឍនូវហេដ្ឋារចនាសម្ព័ន្ធរបស់យើងឲ្យកាន់តែប្រសើរឡើង។ ក្រុមហ៊ុនរបស់យើងកំពុងខិតខំប្រឹងប្រែងឥតឈប់ឈរដើម្បីកែលម្អគុណភាពបណ្តាញ ដោយសារយើងជឿជាក់ថាបណ្តាញទំនាក់ទំនងដ៏រឹងមាំគឺជាមូលដ្ឋានគ្រឹះសម្រាប់ៃការទំនាក់ទំនងដែលកាន់តែប្រសើរឡើងសម្រាប់ប្រទេសកម្ពុជានាពេលអនាគត»។

 

ការខិតខំប្រឹងប្រែង និងយកចិត្តទុកដាក់របស់ Smart ក្នុងការផ្តល់នូវបណ្តាញអ៊ីនធឺណេតចល័តលឿនបំផុត ក្នុងតម្លៃសមរម្យ ដែលអតិថិជនអាចប្រើបានយ៉ាងទូលំទូលាយបំផុតក្នុងប្រទេស ឆ្លុះបញ្ចាំងពីការវិនិយោគរបស់ក្រុមហ៊ុន Smart ពីមួយឆ្នាំទៅមួយឆ្នាំ ដើម្បីពង្រីកហេដ្ឋារចនាសម្ព័ន្ធបណ្តាញរបស់ខ្លួន។ ការវិនិយោគទាំងនេះក៏គាំទ្រដល់ក្របខណ្ឌគោលនយោបាយសេដ្ឋកិច្ច និងសង្គមឌីជីថលរបស់រាជរដ្ឋាភិបាលកម្ពុជាឆ្នាំ ២០២១-២០៣៥ ផងដែរ។

 

គួរកត់សម្គាល់ផងដែរថាក្នុងឆ្នាំ ២០២១ ក្រុមហ៊ុន Smart បានធ្វើការវិនិយោគលើហេដ្ឋារចនាសម្ព័ន្ធបណ្តាញ ជាទឹកប្រាក់សរុបចំនួន ៨១​លានដុល្លាអាមេរិក។​ ជារៀងរាល់ឆ្នាំ​ក្រុមហ៊ុនក៏បានរួមចំណែកជាទឹកប្រាក់ចំនួនាំ ២% នៃប្រាក់ចំណូលរបស់ខ្លួនដល់មូលនិធិកាតព្វកិច្ចសេវាសកល ដែលមានបំណងផ្តល់លទ្ធភាពទទួលបានសេវាទូរស័ព្ទ និងឌីជីថលប្រកបដោយគុណភាព និងតម្លៃសមរម្យនៅក្នុងតំបន់ដាច់ស្រយាលនៃប្រទេសកម្ពុជា។

 

ដោយមានការគាំទ្រពីមូលនិធិកាតព្វកិច្ចសេវាសកល ក្រុមហ៊ុនបានបង្កើតស្ថានីយ៍មូលដ្ឋាននៅតំបន់ដាច់ស្រយោល ដែលមានទីតាំងជាង ៣៨៨ ភូមិទូទាំងប្រទេសកម្ពុជា ដែលបន្តលើកកម្ពស់ការផ្តល់សេវាប្រកបដោយគុណភាពដល់ប្រជាពលរដ្ឋជនបទជាងរាប់ពាន់នាក់៕