រដ្ឋបាលខេត្តព្រះសីហនុ នឹងចាប់ផ្តើមពង្រីកផ្លូវ និងដាក់បណ្តាញលូទឹក នៅតាមបណ្តោយផ្លូវ៧០១-៩ និងបណ្តាផ្លូវ ស្ថិតត្រង់ចំណុចភូមិ១ ភូមិ២ និងភូមិ៣ សង្កាត់លេខ១ ក្រុងព្រះសីហនុ។ ការ​ជួសជុលនេះ រដ្ឋបាលខេត្ត តម្រូវ​ឱ្យ​ពលរដ្ឋរុះរើតូប ស្តង់លក់ដូរទំនិញ របង និងសំយាបផ្ទះនៅតាមចិញ្ចើមផ្លូវ ដោយ​ទុកពេល៧ថ្ងៃ។
 

បើតាម​រដ្ឋបាលខេត្ត​ ករណីពលរដ្ឋណាមិនអនុវត្តតាមបម្រាមនេះ រដ្ឋបាលខេត្ត នឹងអនុវត្តតាមវិធានការរដ្ឋបាល ដោយមិនទទួលខុសត្រូវចំពោះការបាត់បង់ទ្រព្យសម្បត្តិ ឬខូចខាតសម្ភារឡើយ។ រដ្ឋបាលខេត្ត​ព្រះសីហនុ អះអាងថា បញ្ហាផ្ទះពលរដ្ឋនៅលើដីរដ្ឋនេះ បានកើតឡើងយូរមកហើយ តែដោយសារមិនទាន់ចាប់ផ្ដើមសាងសង់ទើបសាលាក្រុងមិនបញ្ជាឱ្យរុះរើ។ ប៉ុន្តែបច្ចុប្បន្នផ្លូវនេះ នឹងត្រូវសាងសង់ ដូច្នេះតម្រូវឱ្យ​រុះរើឱ្យរួចមុនថ្ងៃកំណត់។
 

សូមបញ្ជាក់ដែរ អាជ្ញាធរក្រុងព្រះសីហនុ សហការជាមួយមន្ទីរ-អង្គភាពពាក់ព័ន្ធ នឹងឈូសឆាយសំណង់ ដែលសង់លើចំណីផ្លូវ និងដាក់ខ្សែបណ្តាញអគ្គិសនី ទុយោទឹកស្អាត និងខ្សែទឹកក្រោមដី៕