អន្តរជាតិ
វៀតណាម នឹងកាត់បន្ថយការនាំចេញអង្ករប្រចាំឆ្នាំ៤៤ភាគរយត្រឹមឆ្នាំ២០៣០ 27, May 2023 , 8:29 pm
× រដ្ឋាភិបាលវៀតណាម មានគោលបំណងកាត់បន្ថយការនាំចេញអង្កររបស់ខ្លួនដល់៤លានតោនក្នុងមួយឆ្នាំត្រឹមឆ្នាំ២០៣០ ខណៈកាលពីឆ្នាំមុនអង្ករនាំចេញមានដល់៧,១លានតោន។
យោងតាមឯកសាររបស់រដ្ឋាភិបាលចុះថ្ងៃទី២៦ ខែឧសភា វៀតណាមសម្រេចលើចំណាត់ការដែលមានបំណងជំរុញការនាំចេញអង្ករដែលមានគុណភាពខ្ពស់ ធានាសន្តិសុខស្បៀងក្នុងស្រុក ការពារបរិស្ថាន និងសម្របខ្លួនទៅនឹង ការប្រែប្រួលអាកាសធាតុ។ វៀតណាមជាប្រទេសនាំចេញអង្ករធំទីបីរបស់ពិភពលោកបន្ទាប់ ពីឥណ្ឌា និងថៃបាន។
របាយការណ៍ដដែល សម្គាល់ពីប្រាក់ចំណូលនាំចេញអង្ករដែលនឹងធ្លាក់ចុះមកនៅត្រឹម២,៦២ ពាន់លានដុល្លារក្នុងមួយឆ្នាំនៅឆ្នាំ២០៣០ ដែលធ្លាក់ចុះពី៣,៤៥ពាន់លានដុល្លារក្នុងឆ្នាំ ២០២២។
ឯកសារខាងលើដដែលបង្ហាញទៀតថា វៀតណាមនឹងធ្វើពិពិធកម្មទីផ្សារនាំចេញអង្កររបស់ខ្លួនដើម្បីកាត់បន្ថយការពឹងផ្អែកលើប្រទេសតែមួយ។ ក្នុងនោះហ្វីលីពីនគឺជាអ្នកទិញអង្ករដ៏ធំបំ ផុតរបស់វៀតណាមជាយូរមកហើយដែលស្មើនឹង៤៥ភាគរយនៃការនាំចេញកាលពីឆ្នាំមុន។ នាយករដ្ឋមន្ត្រីវៀតណាម Pham Minh Chinh បានប្រាប់ប្រធានាធិបតីហ្វីលីពីន Ferdinand Marcos Jr ក្នុងកិច្ចប្រជុំនៅឥណ្ឌូណេស៊ីក្នុងខែនេះថា វៀតណាមមាន ឆន្ទៈក្នុងការផ្គត់ផ្គង់អង្ករដល់ហ្វីលីពីនសម្រាប់រយៈពេលវែងក្នុងតម្លៃសមរម្យ។
គួរបញ្ជាក់ថា នៅឆ្នាំ ២០២៥ ការនាំចេញអង្កររបស់វៀតណាម៦០ភាគរយ នឹងត្រូវដឹកជញ្ជូន ទៅកាន់ទីផ្សារអាស៊ីចំនួន ២២ភាគរយទៅអាហ្វ្រិក ៧ភាគរយទៅអាម៉េរិក ៤ភាគរយទៅកាន់មជ្ឈិមបូព៌ា និង ៣ភាគរយទៅអឺរ៉ុប។ បើយោងតាមទិន្នន័យគយរបស់រដ្ឋាភិបាល ការនាំចេញអង្ករពីវៀតណាមក្នុងរយៈពេល៤ខែដំបូងនៃឆ្នាំនេះបានកើនឡើង៤០,៧ ភាគរយធៀបនឹងឆ្នាំមុនដែល២,៩លានលានតោន៕
© រក្សាសិទ្ធិដោយ thmeythmey.com