អន្តរជាតិ
អាមេរិកសង្កត់ធ្ងន់ថា ខ្លួនមិនមែនកំពុងធ្វើសង្គ្រាមជាមួយរុស្ស៊ីនោះទេ
27, May 2023 , 10:29 pm
រដ្ឋមន្ត្រីការពារជាតិសហរដ្ឋអាមេរិក លោក Lloyd Austin និងលោកឧត្ដមសេនីយ៍ Mark Milley ប្រធានសេនាធិការកងទ័ពរួមសហរដ្ឋអាមេរិក ថ្លែងនៅក្នុងសន្និសីទសារព័ត៌មានមួយ
×![]()
ដោយ: VOA
មេដឹកនាំយោធាសហរដ្ឋអាមេរិកកាលពីថ្ងៃព្រហស្បតិ៍កន្លងមក បានធ្វើការបកស្រាយដោយប្រុងប្រយ័ត្ននូវភាពខុសគ្នារវាងការបន្តការគាំទ្ររបស់រដ្ឋាភិបាលសហរដ្ឋអាមេរិកទៅលើការប្រយុទ្ធរបស់អ៊ុយក្រែនប្រឆាំងរុស្ស៊ី ហើយថា សហរដ្ឋអាមេរិកមិនស្ថិតក្នុងសង្គ្រាមជាមួយរុស្ស៊ីនោះឡើយ។
នៅក្នុងសន្និសីទសារព័ត៌មានមួយ ក្រោយកិច្ចប្រជុំតាមអនឡាញជាមួយក្រុមប្រទេសមួយចំនួនដែលកំពុងជួយគាំទ្រអ៊ុយក្រែននោះ រដ្ឋមន្ត្រីការពារជាតិសហរដ្ឋអាមេរិក លោក Lloyd Austin បានឆ្លើយតបទៅនឹងក្តីបារម្ភ ដែលថា ក្រុមជីវពលមួយត្រូវបានគេរាយការណ៍ថា បានប្រើប្រាស់រថយន្តយោធាអាមេរិក ក្នុងការវាយប្រហារទៅក្នុងទឹកដីរុស្ស៊ីកាលពីថ្ងៃចន្ទកន្លងទៅ ហើយដែលអាចនឹងត្រូវបានរដ្ឋាភិបាលក្រុងមូស្គូប្រើធ្វើជាលេស ដើម្បីទាញសហរដ្ឋអាមេរិកឱ្យចូលពាក់ព័ន្ធដោយផ្ទាល់ទៅក្នុងសង្គ្រាមនៅក្នុងប្រទេសអ៊ុយក្រែននោះ។
លោក Lloyd Austin ថ្លែងដូចនេះថា៖ «យើងមិនស្ថិតនៅក្នុងការធ្វើសង្គ្រាមជាមួយរុស្ស៊ីនោះ`ទេ។នេះជាការប្រយុទ្ធរបស់អ៊ុយក្រែន។ គោលបំណងសំខាន់របស់យើង គឺដើម្បីធានាថា យើងកំពុងធ្វើអ្វីៗគ្រប់យ៉ាង ដែលយើងអាចធ្វើបាន ដើម្បីជួយអ៊ុយក្រែនឱ្យទទួលបានជោគជ័យ» ប៉ុណ្ណោះ។
ដោយឡែកលោកឧត្ដមសេនីយ៍ Mark Milley ប្រធានសេនាធិការកងទ័ពរួមសហរដ្ឋអាមេរិកក៏បាននិយាយនៅថ្ងៃព្រហស្បតិ៍នេះផងដែរថា សហរដ្ឋអាមេរិក ធ្លាប់បានស្នើដល់អ៊ុយក្រែនជាយូរមកហើយ មិនឱ្យប្រើប្រាស់អាវុធដែលអាមេរិកផ្តល់ឱ្យ ដើម្បីធ្វើការវាយប្រហារទៅក្នុងទឹកដីរុស្ស៊ីនោះទេ។
លោក Mark Milley បញ្ជាក់បន្ថែមថា៖ «ខ្ញុំអាចនិយាយថា យើងបានស្នើសុំដល់អ៊ុយក្រែនមិនឱ្យប្រើប្រាស់ឧបករណ៍យោធា ដែលអាមេរិកផ្តល់ឱ្យ ដើម្បីធ្វើការវាយប្រហារដោយផ្ទាល់ទៅលើទឹកដីរុស្ស៊ីនោះឡើយ។ នេះជាសង្គ្រាមអ៊ុយក្រែន។ វាមិនមែនជាសង្គ្រាមរវាងសហរដ្ឋអាមេរិកនិងរុស្ស៊ីនោះទេ។ វាក៏មិនមែនជាសង្គ្រាមរវាងអង្គការអូតង់និងរុស្ស៊ីនោះដែរ។
ក្នុងរឿងដាច់ដោយឡែកមួយទៀត ទីភ្នាក់ងារសារព័ត៌មាន AP រាយការណ៍ថា ប្រទេសជប៉ុននៅថ្ងៃសុក្រនេះ បានអនុម័តយល់ព្រមដាក់ទណ្ឌកម្មជាថ្មីទៀតប្រឆាំងទៅលើប្រទេសរុស្ស៊ី ជុំវិញសង្គ្រាមនៅក្នុងប្រទេសអ៊ុយក្រែន ដែលក្នុងនោះរួមមានការបង្កកទ្រព្យសម្បត្តិរបស់បុគ្គលនិងក្រុមមួយចំនួនផងដែរ និងបានហាមប្រាមការនាំចេញទៅកាន់ស្ថាប័នឬអង្គការនានាដែលជាប់ពាក់ព័ន្ធនឹងក្រុមយោធារុស្ស៊ី។ ជប៉ុនក៏បានរិះគន់ចំពោះកិច្ចព្រមព្រៀងរវាងរុស្ស៊ីនិងបេឡារុសដើម្បីស្តុកទុកអាវុធនុយក្លេអ៊ែរកម្រិតស្រាលនៅក្នុងទឹកដីបេឡារុស ថាអាចបង្កើនភាពតានតឹងថែមទៀត៕
© រក្សាសិទ្ធិដោយ thmeythmey.com
