អន្តរជាតិ
ដើម្បីស្នាមញញឹមភរិយាដែលពិការភ្នែក បុរសម្នាក់កែកសិដ្ឋានទៅជាសួនផ្កា
27, Feb 2016 , 6:59 pm
×![]()
ដោយ: ធីតា
ជាមួយនឹងក្តីស្រឡាញ់ដ៏បរិសុទ្ធ បុរសចំណាស់ជនជាតិជប៉ុនម្នាក់ បានចំណាយពេល២ឆ្នាំដើម្បីរៀបចំសួនផ្កាដ៏ស្រស់បំព្រងមួយ ហើយបំណងដ៏ធំរបស់គាត់គឺចង់ឃើញស្នាមញញឹមរបស់ភរិយាដែលពិការភ្នែក។ នេះបើតាមការផ្សាយរបស់សារព័ត៌មានអនឡាញ Rocket News 24 ។
ចំណងស្នេហ៍របស់លោក និងអ្នកស្រី Kuroki បានឈានទៅដល់អាពាហ៍ពិពាហ៍ដ៏អធិកអធមមួយកាលពីឆ្នាំ១៩៥៦ ។ ពួកគាត់បានរស់នៅយ៉ាងរីករាយក្នុងកសិដ្ឋានមួយនៅក្រុង Shintomi តំបន់ Miyazaki ប្រទេសជប៉ុនអស់រយៈពេល៣០ឆ្នាំដោយមានកូន២នាក់។ ពួកគាត់បានចិញ្ចឹមគោជាង៦០ក្បាល ជាមួយនឹងក្តីសង្ឃឹមថា អាចមានថវិកាសម្រាប់ធ្វើដំណើរទេសចរណ៍ជុំវិញប្រទេសជប៉ុន។
ជារឿងដ៏គួរឲ្យសោកស្តាយ កាលពីឆ្នាំ១៩៨៦ នៅពេលដែលអ្នកស្រី Kuroki ឈានដល់៥២ឆ្នាំ គាត់ស្រាប់តែមានបញ្ហាភ្នែក។ រួមផ្សំជាមួយជំងឺទឹកនោមផ្អែម និងជំងឺផ្សេងៗ ស្ត្រីរូបនេះ បានងងឹតភ្នែកមើលអ្វីៗលែងឃើញទាំងអស់។ នេះបើយោងតាម Rocket News 24 ។
ក្តីសង្ឃឹមថាបានមើលឃើញទិដ្ឋភាពស្រស់បំព្រងក្នុងប្រទេសជប៉ុន បានរលាយ ហើយអ្នកស្រី Kuroki មានអារម្មណ៍កណ្តោចកណ្តែង។ ទីបំផុតលោក Kuroki បានផុសចេញនូវគំនិតវិជ្ជមានមួយដើម្បីឲ្យភរិយាមានក្តីសង្ឃឹមក្នុងជីវិត និងពោរពេញទៅដោយភាពញញឹមឡើងវិញ។
ក្នុងរយៈពេល២ឆ្នាំ ពោលគឺផ្តើមឡើងនៅឆ្នាំ២០០០ លោក Kuroki បានប្រែក្លាយកសិដ្ឋានរបស់ខ្លួនឲ្យទៅជាសួនផ្កាសាធារណៈដ៏ស្រស់បំព្រងមួយ។ លោកបានកាប់ដើមឈើធំៗចេញ ហើយដាំជំនួសដោយផ្កា Shinbazakura ពណ៌ផ្កាឈូក និងផ្កាកុលាប ដែលក្លិនក្រអូបភាយខ្លាំង។ នារយៈពេលប្រមាណ១៥ឆ្នាំកន្លងមកនេះ មនុស្សប្រមាណ៧០០០នាក់ បាននាំគ្នាទៅទស្សនាសួនផ្ការបស់លោក Kuroki រាល់ថ្ងៃ ជាពិសេសគឺចុងខែមិនា និងក្នុងខែមេសា។
សំឡេងមនុស្សអ៊ូអរ និងក្លិបដ៏ក្រអូបរបស់ផ្កាក្នុងសួន នាំឲ្យអ្នកស្រីលែងមានអារម្មណ៍ឯកោ ហើយបញ្ចេញនូវស្នាមញញឹមរៀងរាល់ថ្ងៃ៕
Tag:
ប្លែក
© រក្សាសិទ្ធិដោយ thmeythmey.com
