ពីនេះ ពីនោះ
ព័ត៍មានសុខភាព
អាការៈជំងឺរលាកសួតលើកុមារទើបតែចេះដើរតេសតាស 31, May 2021 , 6:59 am
× ជំងឺរលាកសួតលើកុមារតូចៗ ជាពិសេសកុមារដែលទើបតែចេះដើរតេសតាសគឺជាមូលហេតុដ៏ធំមួយដែលធ្វើឲ្យឪពុកម្តាយភាគច្រើនព្រួយបារម្ភ។ យ៉ាងណាមិញ កុមារដែលមានសុខភាពល្អច្រើនតែស្រួលបួលមកវិញតាមរយៈការព្យាបាលពីគ្រូពេទ្យ ហើយក៏គ្មានផលវិបាកនៃជំងឺនេះផងដែរ។ បើយោងទៅតាមមេរោគដែលធ្វើឲ្យកើតជាជំងឺនេះ វាអាចធ្វើឲ្យកុមារមិនមានផាសុកភាពក្នុងខ្លួនច្រើន ព្រមទាំងមានរយៈពេលរហូទដល់ពីរសប្តាហ៍ឯណោះ។
ជំងឺរលាកសួតត្រូវបានគេចែកជាពីរគឺ បង្កឡើងដោយបាក់តេរី និងវីរុស។ ករណីដែលជំងឺនេះបង្កឡើងដោយបាក់តេរី កុមារនឹងមានអាការៈភ្លាមៗដូចជា ពិបាកដកដង្ហើម ក្តៅខ្លួនខ្លាំង និងក្អក។ កុមារអាចនឹងមិនចង់ញ៉ាំអ្វីទាំងអស់ និងឈឺធ្ងន់ធ្ងរ។ គេក៏ពិបាកនឹងដកដង្ហើម ឬដកដង្ហើមញ៉ាប់ដែរ។ ករណីខ្លះ អ្នកអាចនឹងមើលឃើញក្រចកគេឡើងពណ៌ស្វាយ និងជីពចរដើរញ៉ាប់។ ចំពោះការក្អកវិញ អាចនឹងមានរយៈពេលពី ៣ ទៅ៤សប្តាហ៍ ហើយពេលខ្លះអាចមានកំហាក់ជាឈាមតិចៗទៀតផង។ អាការៈផ្សេងៗទៀតមានដូចជា ឡើងកន្ទួលលើស្បែក ឈឺសាច់ដុំ ដកដង្ហើមលឺសូរដូចហួច និងមានស្នាមប្រេះលើទ្រូង គ្រុន ឈឺទ្រូង ហើមកូនកណ្តុរ និងរាករូស។
ករណីជំងឺរលាកសួតបង្កឡើងដោយវីរុសវិញ គឺចាប់ផ្តើមចេញពីមានអាការៈដូចគ្នានឹងផ្តាសាយ ប៉ុន្តែអាការៈជំងឺនេះមានការវិត្តយឺត។ គេអាចនឹងមានអាការៈក្តៅខ្លួនស្ទិញ ដកដង្ហើមញ៉ាប់ ក្អក ក្អួត សម្លេងស្អក ខ្សោយ រាករូស ឬក្អកកាន់តែខ្លាំង។
ទោះបីជាយ៉ាងណាក៏ដោយ ចូរនាំកូនទៅជួបពេទ្យភ្លាមបើសិនជាគេចេញជាអាការៈជំងឺរលាកសួតដូចខាងក្រោមនេះ៖
• លឺសម្លេងខ្លាំងក្នុងពេលគេដកដង្ហើម
• មុខ ឬបបូរមាត់ទៅជាស្វាយ (ជាសញ្ញាដែលត្រូវសង្គ្រោះបន្ទាន់)
• ដកដង្ហើមញ៉ាប់ខ្លាំង ឬពិបាកដកដង្ហើម
• ជំងឺរលាកសួតអាចកំណត់រោគវិនិច្ឆ័យបានតាមរយៈការពិនិត្យលើរោគសញ្ញា ពិនិត្យរាងកាយ និងការថតកាំរស្មីអ៊ិច៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com