សៀមរាប ៖ ប្រជាពលរដ្ឋរស់នៅខេត្តសៀមរាបដែលប្រកបរបរពឹងផ្អែកលើវិស័យទេសចរណ៍កំពុងជួបការលំបាកជាខ្លាំង បន្ទាប់ពីភ្ញៀវទេសចរនៅក្នុងខេត្តនេះបានធ្លាក់ចុះនៅក្នុងឆ្នាំ២០១៩ កន្លងមកនេះ។
អ្នករស់នៅក្នុងខេត្តសៀមរាប ដែលមានមុខរបរដូចជាមគ្គុទេសក៍ទេសចរណ៍ ភោជនីយដ្ឋាន ផ្ទះសំណាក់ សណ្ឋាគារ អ្នករត់តាក់ស៊ី ម៉ូតូកង់បី អ្នកលក់វត្ថុអនុស្សាវរិ៍យ និយាយថា ការធ្លាក់ចុះនេះធ្វើឲ្យពួកគេបាត់បង់ប្រាក់ចំណូលប្រចាំថ្ងៃ ដើម្បីផ្គត់ផ្គង់គ្រួសារ បង់ធនាគារ និងការចំណាយចំបាច់ផ្សេងៗទៀត។
អ្នកស្រី ព្រាប យ៉ា អាយុ ៣១ឆ្នាំ ជាអាជីវករនៅមុខប្រាសាទអង្គរវត្ត។ អ្នកស្រីលក់ខោអាវ កន្សែង បង់ក មួក ស្បែកជើងសម្រាប់ភ្ញៀវជាតិនិងអន្តរជាតិអស់រយៈពេល១០ឆ្នាំកន្លងមកហើយ។ អ្នកស្រីប្រាប់វីអូអេថា នៅក្នុងឆ្នាំ២០១៩នេះទាំងភ្ញៀវជាតិនិងអន្តរជាតិមានការធ្លាក់ចុះយ៉ាងខ្លាំង ហើយប្រាក់ចំណូលប្រចាំថ្ងៃរបស់អ្នកស្រីបានមកពីការលក់ក៏បានធ្លាក់ចុះយ៉ាងច្រើនដែរ។
«ពីមុនចំណេញបាន១ថ្ងៃ ៤ម៉ឺន៥ម៉ឺន ឆ្នាំមុនៗ តែដល់ចូលឆ្នាំនេះមកធ្លាក់ភ្ញៀវមកអត់សូវចំណេញច្រើនទេ ចំណេញ១ថ្ងៃ២ម៉ឺន ២៥០០០ ពេលខ្លះធ្លាក់នៅ១៥០០០ប៉ះថ្ងៃខ្លះអត់បានកៅឆាយក៏មាន»។
អ្នកស្រី ព្រាប យ៉ា ជាប្រជាពលរដ្ឋម្នាក់ក្នុងចំណោមប្រជាពលរដ្ឋជាច្រើនអ្នកទៀត ដែលរងផលប៉ះពាល់ដោយសារតែការធ្លាក់ចុះនៃចំនួនភ្ញៀវទេសចរនេះជាហេតុធ្វើឲ្យពួកគេបាត់បង់ប្រាក់ចំណូលយ៉ាងច្រើនសម្រាប់ផ្គត់ផ្គង់ជីវភាពរស់នៅប្រចាំថ្ងៃ។
លោក ទៀ សីហា អភិបាលខេត្តសៀមរាប បានឲ្យដឹងថា នៅក្នុងឆ្នាំ២០១៩ ភ្ញៀវទេសចរចូលមកលេងខេត្តសៀមរាបមានការធ្លាក់ចុះ១៥ភាគរយ ពោលគឺស្មើប្រហែល៣សែននាក់ បើធៀបទៅឆ្នាំ២០១៨។
អ្នកស្រី ព្រាប យ៉ា ជាអាជីវករនៅមុខប្រាសាទអង្គរវត្ត នៅខេត្តសៀមរាប កាលពីថ្ងៃទី៩ ខែវិច្ឆិកា ឆ្នាំ២០១៩។ (ធីតា វីន/VOA)
អ្នកស្រី គឹម ណារីន ជាអាជីវករនៅមុខប្រាសាទអង្គរវត្ត នៅខេត្តសៀមរាប កាលពីថ្ងៃទី៩ ខែវិច្ឆិកា ឆ្នាំ២០១៩។ (ធីតា វីន/VOA)
នៅម្ខាងទៀតនៃផ្លូវមុខប្រាសាទអង្គរវត្ត តូបប្រក់ស្បូវប្រហែល៥ម៉ែត្រ បួនជ្រុងដែលមានលក់ខោអាវ គ្រឿងចម្លាក់ឈើ ថ្ម និងវត្ថុអនុស្សាវរីយ៍ជាច្រើនទៀត។ ក្នុងរយៈពេលប្រហែលជិត១ម៉ោង មានភ្ញៀវទេសចរខ្មែរតែម្នាក់ប៉ុណ្ណោះចូលទិញអាវនៅទីនេះ។
អ្នកស្រី គឹម ណារីន អាយុ៤១ ឆ្នាំ ជាម្ចាស់តូបនេះអស់រយៈពេលជិត២០ឆ្នាំមកហើយ។ អ្នកស្រីថា នៅក្នុងឆ្នាំ២០១៩កន្លងមកនេះ ប្រាក់ចំណេញរបស់អ្នកស្រីបានធ្លាក់ចុះប្រហែលជាង៥០ភាគរយ ហើយពេលនេះការលក់របស់អ្នកស្រីពឹងផ្អែកលើភ្ញៀវជាតិតែប៉ុណ្ណោះ។
«ថ្ងៃណាក៏បាន១០ទៅ២០[ដុល្លារ] ឆ្នាំមុនវាអាចបានលើសនេះ ៥០ ៦០ ៧០ [ដុល្លារ] អីចឹងទៅ ចំណូលវាបានលើសឆ្នាំនេះ ពួកខ្ញុំបានខ្មែរទេ ខ្ញុំអត់មានសង្ឃឹមបរទេសទេ ចាំបរទេស ទិញដាច់បាយហើយ»។
អាជីវករលក់របស់របរវត្ថុអនុស្សាវរីយ៍សម្រាប់ភ្ញៀវជាតិ និងអន្តរជាតិ នៅផ្សារចាស់ និងផ្សាររាត្រីនៅក្នុងខេត្តសៀមរាប ក៏បានត្អូញត្អែរពីការបាត់បង់ប្រាក់ចំណូលយ៉ាងខ្លាំងនៅក្នុងឆ្នាំ២០១៩នេះ ស្រដៀងៗគ្នាទៅនឹងអាជីវករលក់នៅមុខប្រាសាទអង្គរវត្តដែរ។ អាជីវករមួយចំនួនបានសម្រេចចិត្តបោះបង់មុខរបរនេះចោល បន្ទាប់ពីមិនអាចទ្រាំទ្រនឹងការបាត់បង់ប្រាក់ចំណូលក្រោយពីការធ្លាក់ចុះភ្ញៀវទេសចរនេះ។
នៅមិនឆ្ងាយប៉ុន្មានពីផ្សារចាស់ក្នុងខេត្តសៀមរាប លោក វ៉ន បូរាណ អាយុ៣២ឆ្នាំ កំពុងអង្គុយលើម៉ូតូកង់បីភ្នែកកំពង់រំពៃរកភ្ញៀវ។ លោកប្រាប់វីអូអេថា លោករត់ម៉ូតូកង់បីដឹកភ្ញៀវទេសចរជាង១០ឆ្នាំមកហើយ ក៏ប៉ុន្តែមិនដែលមានឆ្នាំណាភ្ញៀវទេសចរធ្លាក់ខ្លាំងដូចឆ្នាំ២០១៩នោះទេ។
«ពីរ បីឆ្នាំមុនដែលភ្ញៀវសម្បូរ ពេលនៅក្នុងរដូវសម្បូរភ្ញៀវនេះជាមធ្យម ខ្ញុំអាចរកបាន ១៥ដុល្លារ ក្នុងមួយថ្ងៃ តែឆ្នាំនេះក្នុងខែនេះដូចគ្នា មួយអាទិត្យ ខ្ញុំរកអត់បាន២០ដុល្លារទេ។ ចឹងវាយ៉ាប់មែនទែនលើការចាយវាយចំណាយទៅលើក្រុមគ្រួសារ គឺរាល់ខែខ្ចីលុយគេចាយរហូតដំណាក់កាលចុងក្រោយ ប្រហែលជាចំណាកស្រុក ពីព្រោះនៅក្នុងស្រុកអត់មានការងារធ្វើទេ»។
លោកបានឲ្យដឹងបន្តថា៖ «មើលទៅរដ្ឋាភិបាលដូចយកចិត្តទុកដាក់ តែដូចបានតែមាត់ ពីព្រោះការដឹកនាំទាំងអស់ដូចអត់ដែរបានទទួលកំហុសផង»។
លោក វ៉ន បូរាណ អ្នករត់ម៉ូតូកង់បីដឹកភ្ញៀវទេសចរណ៍ជាតិនិងអន្តរជាតិ ក្នុងខេត្តសៀមរាប កាលពីថ្ងៃទី៩ ខែវិច្ឆិកា ឆ្នាំ២០១៩។ (ធីតា វីន/VOA)
តូបលក់វត្ថុអនុស្សាវរីយ៍នៅមុខប្រាសាទអង្គរវត្តមានសភាពស្ងប់ស្ងាត់ នៅក្នុងខេត្តសៀមរាប កាលពីថ្ងៃទី៩ ខែវិច្ឆិកា ឆ្នាំ២០១៩។ (ធីតា វីន/VOA)
លោក ខៀវ ធី ជាប្រធានសមាគមមគ្គុសទេសក៍ទេសចរណ៍អង្គរ និងមគ្គុសទេសក៍ទេសចរណ៍ភាសាអង់គ្លេស។ លោកធ្វើការនេះអស់រយៈពេល២៥ឆ្នាំមកហើយ។ លោកបានឲ្យដឹងថា កត្តានយោបាយ សេដ្ឋកិច្ចពិភពលោក អាកាសធាតុឡើងកំដៅ អនាម័យ បរិស្ថាន សណ្តាប់ធ្នាប់ ចរាចរណ៍ និងសេវាកម្មប៉ូលីសអន្តោប្រវេសន៍នៅតាមច្រកព្រំដែន គឺសុទ្ធតែជាកត្តាដែលធ្វើឲ្យភ្ញៀវទេសចរធ្លាក់ចុះ។
លោកបានបន្ថែមថា រដ្ឋាភិបាលគួរតែយកចិត្តទុកដាក់លើវិស័យទេសចរណ៍នេះ បើមិនដូច្នោះទេ ប្រជាពលរដ្ឋនៅសៀមរាបភាគច្រើនដែលពឹងអាស្រ័យលើវិស័យទេសចរណ៍នឹងបន្តជួបបញ្ហាលំបាកផ្នែកជីវភាពកាន់តែខ្លាំងទៅៗ។
«ភ្ញៀវឆ្នាំ១៧ ១៨ យើងរកលុយបានច្រើន យើងបាន១៥ថ្ងៃក្នុងមួយខែ តែឆ្នាំនេះ យើងរកបានតែបួនឬប្រាំថ្ងៃ ចឹងអ្នកដែលជំពាក់ធនាគារ ជួនកាលគាត់ខ្ចីលុយធនាគារដើម្បីទិញឡានរត់តាក់ស៊ីដឹកភ្ញៀវ គាត់ខ្ចីលុយដើម្បីទិញផាស់អាប់(PassApp) ខ្ចីលុយដើម្បីទិញតុក តុក ចឹងគាត់រំពឹងថា នឹងបានលុយគាត់រកបានសងបណ្តោះទៅគេវិញ។ តែបើអត់ភ្ញៀវទេសចរតែដូចរបៀបឆ្នាំ២០១៩នេះ យើងបារម្ភថា វាអាចមានបញ្ហាភាពក្រីក្រកើតមានឡើង ហើយអាចមានបញ្ហាជាមួយនឹងធនាគារដែលគេរឹបអូសយកដីធ្លីទ្រព្យសម្បត្តិគាត់»។
ជាមួយគ្នានេះដែរ លោក គឹម ហាក់ ជាមគ្គុសទេសក៍ទេសចរណ៍ភាសាចិនជាង២០ឆ្នាំ បានឲ្យដឹងថា លោកបានដូរអាជីពទៅជាអ្នកបកប្រែជាបណ្តោះអាសន្នសិន បន្ទាប់ពីការធ្លាក់ចុះយ៉ាងគំហុកនៃភ្ញៀវទេសចរ។
លោកបានបន្តថា នៅក្នុងរយៈពេលខាងមុខនេះ លោកហាក់ដូចជាមិនមានសង្ឃឹមចំពោះកំណើនភ្ញៀវទេសចរនោះទេ ស្របពេលដែលស្ថានភាពនយោបាយកម្ពុជាកំពុងច្របូកច្របល់ថែមទៀតនោះ។
«ខែនេះម៉ោងនេះពេលនេះ ពួកខ្ញុំមគ្គុសទេសក៏ខ្លះគឺដេកស៊ីម៉ង អត់មានភ្ញៀវទេ ចឹងយើងសុខចិត្តលក់ម៉ូតូ លក់ឡាន ចងការ ដេញតុងទីន យកលុយមកដើម្បីបង្វិលក្នុងជីវភាព។ គ្រាន់តែមិត្តភ័ក្តិខ្ញុំ វាដេកអត់មានភ្ញៀវឡើងមួយខែ ខ្លះពីមុនវាដើរប្រាំក្រុម ២៥ថ្ងៃ។ ឥឡូវគាត់អត់មានផង ជួនកាលដើរបានមួយក្រុម គាត់ជាអ្នកនាំភ្ញៀវដែលល្អ ឆ្លាត យ៉ាងណាក៏ដើរបានតែមួយក្រុម»។
ខណៈចំនួនភ្ញៀវទេសចរណ៍ធ្លាក់ចុះ សណ្ឋាគារ ភោជនីយដ្ឋាន ហាងលក់វត្ថុអនុស្សាវរីយ៍ ត្រូវបានដាក់ជួល ឬលក់ នៅក្នុងខេត្តសៀមរាប កាលពីថ្ងៃទី៩ ខែវិច្ឆិកា ឆ្នាំ២០១៩។ (ធីតា វីន/VOA)
សារមន្ទីរអង្គរដែលបានបើកសម្ពោធជាផ្លូវការកាលពីឆ្នាំ២០១៥ ដែលវិនិយោគដោយក្រុមហ៊ុនរបស់កូរ៉េខាងជើងមានតម្លៃជាង ២០លានដុល្លារអាមេរិក និងសណ្ឋាគារអប្សរាអង្គរលំដាប់ផ្កាយ៤ ដែលបានបើកដំណើរការអស់រយៈពេលជិត២០ឆ្នាំ ក៏បានប្រកាសផ្អាកដំណើរការកាលពីថ្មីៗនេះដែរ ដោយសារវិបត្តិផ្នែកសេដ្ឋកិច្ច។
ក្រៅពីនេះសណ្ឋាគារ ផ្ទះសំណាក់ ភោជនីយដ្ឋាន ហាងលក់វត្ថុអនុស្សាវរីយ៍ មួយចំនួនទៀតក៏បានផ្អាកដំណើរការអាជីវកម្មរបស់ខ្លួនផងដែរ។
លោក កៅ ហ្វីលីព ( PHILIP KAO) ប្រធានសមាគមក្លឹបទេសចរណ៍សៀមរាបមានប្រសាសន៍ថា ទាំងវិស័យរដ្ឋនិងឯកជនគួរតែប្រឹងប្រែងរួមគ្នាដើម្បីធ្វើយ៉ាងណាទាក់ទាញភ្ញៀវទេសចរឲ្យមានការកើនឡើងវិញ។
លោកបញ្ជាក់ថា បើទេសចរណ៍នៅបន្តធ្លាក់ចុះបែបនេះទៀត មុខរបរដែលទាក់ទងនឹងទេសចរណ៍មួយចំនួនប្រឈមមុខនឹងការបិទទ្វារ។
«ការប្រកបអាជីវកម្មមួយតែម្តង ប្រសិនជាប្រឈមមុខនឹងការខាតរាប់ខែរាប់ឆ្នាំ ខ្ញុំគិតថា វាមិនអាចទ្រាំទ្រទៅមុខទៀតបាន ក្រៅពីបិទអាជីវកម្មទេ។ ដូចមិត្តភក្តិខ្ញុំខ្លះគាត់ធ្លាប់លើកថា ឥឡូវនេះប្រកបវិស័យសណ្ឋាគារនិងវិស័យទេសចរណ៍នៅខេត្តសៀមរាប ដើម្បីឲ្យមានដំណើរការនៃអាជីវកម្មរបស់ខ្លួនបាន ទាល់តែអាចប្រឹងទៅលក់ទ្រព្យសម្បត្តិខ្លួនឯង ដូចជាដី ដូចជាស្អីចឹងទៅ ដើម្បីយកមកទប់ចឹង»។
ភ្ញៀវទេសចរណ៍ដើរទស្សនាផ្សាររាត្រីមួយកន្លែងនៅខេត្តសៀមរាប កាលពីថ្ងៃទី៩ ខែវិច្ឆិកា ឆ្នាំ២០១៩។ (ធីតា វីន/VOA)
VOA សំឡេងសហរដ្ឋអាមេរិកព្យាយាមទាក់ទងលោក ងូវ សេងកាក់ ប្រធានមន្ទីរទេសចរណ៍ខេត្តសៀមរាបជាច្រើនដង តែលោកតែងតែឆ្លើយថាជាប់រវល់ប្រជុំ។ ទោះបីជាយ៉ាងណាក៏ដោយ លោក ទៀ សីហា អភិបាលខេត្តសៀមរាបបានមានប្រសាសន៍ឲ្យដឹងថា មន្ទីរទេសចរណ៍ និងក្រុមមន្ត្រីថ្នាក់ខេត្តដែលពាក់ព័ន្ធទាំងអស់កំពុងព្យាយាមរៀបចំតំបន់ទេសចរណ៍ធម្មជាតិបន្ថែមទៀត និងរៀបចំហេដ្ឋារចនាសម្ពន្ធ័ឲ្យបានល្អប្រសើរឡើងវិញ ដើម្បីទាក់ទាញភ្ញៀវទេសចរ។ លោកសង្ឈឹមថា ភ្ញៀវទេសចរនឹងមានការកើនឡើងវិញក្នុងឆ្នាំ២០២០នេះ។
«ជំរុញឲ្យមានភ្ញៀវទេសចរត្រឡប់មកខេត្តសៀមរាបយើងវិញ តែយើងត្រូវមានកត្តាមួយចំនួន គឺឥឡូវនេះបញ្ហាចម្បងធំគឺរឿងផ្លូវ មួយទៀតគឺយើងត្រូវតែធ្វើយ៉ាងណារៀបចំនៅតំបន់ទេសចរណ៍ផ្សេងៗឲ្យបានច្រើន គឺយើងព្យាយាមរៀបចំនូវតំបន់អេកូទេសចរណ៍។ ចឹងយើងមានដូចជាបឹងទន្លេសាប ភ្នំគូលេន ហើយនិងប្រហែលជាមានតំបន់ផ្សេងៗដែលយើងអាចទាក់ទាញបានជាវាលស្រែជាដើម នៅតាមជនបទ»។
ខេត្តសៀមរាបគឺជាខេត្តមួយដែលស្រូបទាញភ្ញៀវទេសចរជាតិ និងអន្តរជាតិច្រើនជាងគេ នៅក្នុងប្រទេសកម្ពុជា។ ជារៀងរាល់ឆ្នាំភ្ញៀវទេសចរប្រហែលជាង២លាននាក់ លេងខេត្តនេះ ដែលអាចផ្តល់ចំណូលប្រហែលជា១០០លានដុល្លារក្នុងមួយឆ្នាំ៕