«ពៀរ» មានន័យថា ចំណងចិត្តក្រោធដែលចងដោយព្យាបាទបម្រុងនឹងសងសឹកវិញ, ចំណងចិត្តជាសត្រូវ។ ចងពៀរ, ស្រាយពៀរ, មនុស្សមានពៀរ ។

 

ពាក្យប្រៀនប្រដៅក្នុងសាសនា៖ រួចចាកពៀរ ព្រោះស្រាយពៀរ កាលបើបានជាចងពៀររួចទៅហើយ ដែលបានរួចរំដោះចាកពៀរលែងមានតទៅទៀតព្រោះស្រាយចំណងពៀរនោះឲ្យជ្រះស្រឡះចេញ បើមិនស្រាយចេញទេ ពៀរក៏ចេះតែមានតៗទៅទៀត។

 

ពាក្យកាព្យ៖ ទីឃាវុកុមារ មានវិចារណ៍ចៀសពៀរបាន ទើបមានសុខក្សេមក្សាន្ត បានសោយរាជ្យគ្រងរដ្ឋពីរ ។ (រឿងទីឃាវុកុមារនិងព្រះបាទព្រហ្មទត្ត ក្នុងទីឃាវុកុមារជាតកជាពុទ្ធភាសិត ) ។

 

រីឯពាក្យ «ពារ» វិញ ជាកិរិយាសព្ទ មានន័យថា ប៉ះលើ ឬប៉ះត្រូវទាំងស្រុង ពាររបង, ដើរពារ គល់ឈើ ។ ពារលើគ្រោះកាច ប្រទះលើគ្រោះកាច ។ ការពារ រារាំង ។

 

បើជានាម «ពារ» ដែលចេញភាសាបាលី-សំស្ក្រឹត «វារ» មានន័យថា ថ្ងៃ។ ពារពុធ គឺថ្ងៃពុធ ដែលជាពាក្យប្រើក្នុងក្បួនហោរាសាស្ត្រ៕