ជាតិ
ទេសចររៀបរាប់អារម្មណ៍ពេលឡើងប្រាសាទព្រះវិហារតាម«ជណ្ដើរឈើ» 06, Sep 2020 , 9:59 am
× ព្រះវិហារ៖ «ជណ្ដើរឈើ»នៅប្រាសាទព្រះវិហារ មានប្រវែង១៤៥៦ម៉ែត្រ ឬចំនួន២ ២៤២ កាំត្រូវបានសង់នៅអំឡុងឆ្នាំ២០០៩។ ជណ្តើរនេះ ត្រូវបានសង់អម«ជណ្ដើរបុរាណ» ដែលស្ថិតនៅផ្នែកខាងកើត ភ្ជាប់ពីជើងភ្នំដងរែក ឡើងទៅគោបូរៈទី៥ នៃប្រាសាទព្រះវិហារ។ អ្នកទេសចរ ដែលបានធ្វើដំណើរថ្មើរជើងតាមជណ្ដើរនេះ ត្រូវចំណោយពេលប្រមាណ២ម៉ោង ដើម្បីឡើងទៅដល់ប្រាសាទព្រះវិហារ។ ដ្បិតនឿយហត់ និងចំណាយពេលយូរ តែទេសចរ អះអាងថាពួកគេទទួលបានអារម្មណ៍ប្លែក តាមរយៈទេសភាពដ៏ស្រស់ស្អាតតាមផ្លូវ និងសំឡេងបក្សាបក្សីជាដើម។
ដើម្បីជ្រាបច្បាស់សូមអញ្ជើញលោក-អ្នកនាង ទស្សនាបទសម្ភាសរវាង កញ្ញា អ៊ុត រស្មី អ្នកសារព័ត៌មានថ្មីៗ ជាមួយភ្ញៀវទេសចរដែលបានធ្វើដំណើរតាមជណ្ដើរឈើ ដូចតទៅ៖
កញ្ញា សារ៉េន ជាភ្ញៀវទេសចរម្នាក់ក្នុងចំណោម ភ្ញៀវទេសចរជិត៥០នាក់ ដែលបានធ្វើដំណើរថ្មើរជើងតាមជណ្ដើរឈើ ចុះពីប្រាសាទព្រះវិហារ។ នេះជាលើកទីមួយ ដែលកញ្ញា សារ៉េន បានធ្វើដំណើរចុះតាមជណ្ដើរឈើនេះ។ និយាយក្នុងសម្ដីហត់បន្តិច យុវតីរូបនេះបានបង្ហាញអារម្មណ៍របស់ខ្លួនប្រាប់សារព័ត៌មាន Thmeythmey25 ដូច្នេះថា៖«សម្រាប់ខ្ញុំ មានអារម្មណ៍រំភើបមែនទែន មុនដំបូងអត់គិតថានឹងមានជណ្ដើរបែបហ្នឹង គិតថាប្រហែលជាជម្រាលភ្នំ ឬក៏ផ្ទាំងថ្ម ប៉ុន្តែពេលដែលយើងចុះមកតាមជណ្ដើរនេះ វាមានរូបភាពផ្សេងៗគ្នាដែលយើងនឹកស្មានមិនដល់ ។ អាចនិយាយបានថាហត់តិច ប៉ុន្តែ យើងទទួលបាននូវភាពស្រស់ស្អាត» ។
អ្នកទេសចរម្នាក់ទៀត គឺលោក ង៉ុយ រិទ្ធីឌីម៉ង ក៏បានធ្វើដំណើរតាមជណ្តើរចុះពីប្រាសាទព្រះវិហារនេះដែរ។ លោក រិទ្ធីឌីម៉ង បានបញ្ជក់ថា ទោះបីធ្វើដំណើរតាមជណ្ដើរឈើនេះ ហត់បន្តិច និងត្រូវចំណាយពេលយូរក្ដី ប៉ុន្តែលោកបានមើលឃើញទេសភាពយ៉ាងស្រស់ស្អាត ដើមឈើតូចធំ ខ្យល់ត្រជាក់ ដែលធ្វើឱ្យរំសាយអស់ទុកកង្វល់។ មិនត្រឹមតែចាត់ទុកដាក់ថាជាបទពិសោធន៍ដំណើរកម្សាន្តថ្មីសម្រាប់នោះទេ តែទេសចររូបនេះ អះអាងថានឹងធ្វើដំណើរឡើងនិងចុះតាមជណ្ដើរឈើនេះទៀត នៅពេលមកលេងប្រាសាទព្រះវិហារនៅឱកាសក្រោយ។
សម្រាប់កញ្ញា ច័ន្ទម៉ូលី វិញ នេះជាលើកទី២ ដែលនាងបានមកកម្សាន្តនៅប្រាសាទព្រះវិហារ ប៉ុន្តែវាជាលើកដំបូងដែល កញ្ញា បានធ្វើដំណើរចុះតាមជណ្ដើរឈើ។ បើតាមកញ្ញា ម៉ូលី ការធ្វើដំណើរតាមជណ្ដើរឈើ ជាង២ពាន់កាំនេះ ធ្វើឱ្យខ្លួនទទួលបានអារម្មណ៍ប្លែក ខុសពីធ្វើដំណើរតាមរថយន្ត។ កញ្ញា ច័ន្ទម៉ូលីរៀបរាប់ដូច្នេះ៖«យើងអាចមើលឃើញទេសភាពពីលើភ្នំដោយផ្ទាល់ភ្នែក ឃើញសត្វស្វាតាមផ្លូវជាច្រើន និងដើមឈើតូចធំ ដុះអមជណ្ដើរ ផ្ដល់ម្លប់ដល់ត្រជាក់»។
សូមបញ្ជាក់ថា កាលពីថ្ងៃទី១៦-១៨ ខែសីហា កន្លងទៅក្រុមកម្សាន្ត Cambodia Amazing Trip Planner បានរៀបចំជំរំតង់ «សួគ៌ាបព៌ត» នាជួរភ្នំដងរែកនៅខេត្តឧត្តរមានជ័យ និងខេត្តព្រះវិហារ ដែលមានអ្នកចូលរួមជិត៥០នាក់។ ដំណើរកម្សាន្តនេះ ធ្វើឡើងក្នុងគោលបំណង លើកស្ទួយវិស័យទេសចរណ៍ក្នុងស្រុក ចូលរួមប្រើប្រាស់សេវាកម្មក្នុងស្រុក ជាពិសេសឱ្យភ្ញៀវទេសចរ ស្គាល់ពីសក្ដានុពលទេសចរណ៍ដ៏អស្ចារ្យក្នុងស្រុក។ Cambodia Amazing Trip Planner បានសហការជាមួយសារព័ត៌មានថ្មីៗ២៥ រាជធានី-ខេត្ត ដើម្បីផ្សព្វផ្សាយពីតំបន់ទេសចរណ៍ ក្នុងប្រទេសកម្ពុជា៕
Tag:
ជណ្ដើរឈើ
ព្រះវិហារ
© រក្សាសិទ្ធិដោយ thmeythmey.com