COVID-19
អន្តរជាតិ
អត្តឃាតនៅថៃកើនឡើង២២ភាគរយ ខណៈ COVID-19 ជាហេតុផលចម្បងមួយ
11, Sep 2020 , 12:04 pm
ប្រជាជនថៃអំឡុងពេល COVID-19។ រូបភាព៖ AFP
×![]()
ចំនួនអ្នកធ្វើអត្តឃាត នៅថៃត្រឹមពាក់កណ្តាលឆ្នាំនេះ បានកើនដល់២២ភាគរយធៀបទៅនឹងរយៈពេលដដែលកាលពីឆ្នាំមុន។ មន្ត្រីសុខាភិបាលថៃ អះអាងថា ករណីអត្តឃាតទាំងនេះកើនឡើងដោយសារ COVID-19 ដែលនេះជារឿងដែលគួរឲ្យបារម្ភ។ 
នៅថ្ងៃទី១០ កញ្ញា ដែលជាទិវាពិភពលោកបង្ការការធ្វើអត្តឃាត នាយកដ្ឋានសុខភាពផ្លូវចិត្តថៃ បានបង្ហាញពីការកើនឡើងនៃតួលេខអ្នកធ្វើអត្តឃាតត្រឹមពាក់កណ្តាលឆ្នាំ២០២០នេះ។ ទិន្ន័យនេះ បានបង្ហាញថា ៦ខែដើមឆ្នាំ២០២០ អ្នកធ្វើអត្តឃាតមានចំនួន២,៥៥១ករណី ដែលមានការកើនឡើង២២ភាគរយធៀបទៅនឹងឆ្នាំមុនដែលមាន២,០៩២ករណី។ បញ្ហាផ្ទាល់ខ្លួន ជំងឺធ្លាក់ទឹកចិត្ត សម្ពាធសេដ្ឋកិច្ច និងគ្រឿងស្រវឹងសុទ្ធតែជាហេតុផលនៃការធ្វើអត្តឃាត។
បើតាមកាសែតបាងកកប៉ុស្តិ៍ លោក Kiattiphum Wongrajit អគ្គនាយកនៃអគ្គនាយកដ្ឋានសុខភាពផ្លូវចិត្តបានលើកឡើងថា កំណើនករណីអត្តឃាតដោយសារតែជំងឺ COVID-19 គឺជារឿងដែលគួរឲ្យបារម្ភដែរ។ លោកKiattiphum បញ្ជាក់ថា ការវាយតម្លៃពីមូលហេតុនៃកើនឡើងករណីអត្តឃាត គឺស្របគ្នាទៅនឹងការសិក្សាដទៃទៀតនៅបរទេស។
កាលពីខែមីនា ការសិក្សាមួយរបស់សាកលវិទ្យាល័យឈៀងម៉ៃ រកឃើញថា ករណីអត្តឃាត២៨ ក្នុងចំណោម៣៨ មានជាប់ពាក់ព័ន្ធដោយសារការបិទប្រទេស។ កាលនោះ ថៃ ស្ថិតក្នុងក្រោមវិធានការបិទប្រទេស បណ្តាលឲ្យរោងចក្រ និងក្រុមហ៊ុនជាច្រើនផ្អាកការរកស៊ីជាបណ្តោះអាសន្ន។ ចំណែកការសិក្សារបស់សាកលវិទ្យាល័យ Oxford វិញ បានបង្ហាញថា COVID-19 ដើរតួនាទីមួយផ្នែកក្នុងករណីអត្តឃាត។ ការសិក្សានោះក៏ព្រមានផងដែរ ថា បញ្ហានេះអាចនឹងបន្ត ទោះជំងឺឆ្លងនេះចប់ក៏ដោយ។
ក្នុងន័យកាត់បន្ថយ ករណីអត្តឃាត មន្ត្រីសុខាភិបាលថៃ បានស្វះស្វែងរកការសហការពីភ្នាក់ងារបង្ក្រាបបទល្មើសថៃ ដោយស្នើឲ្យជួយពិនិត្យតាមបណ្តាញសង្គមនានា ត្បិតអ្នកដែលប៉ុនប៉ងធ្វើអត្តឃាតខ្លះបង្ហាញសញ្ញាទុក្ខព្រួយ ឬបង្ហោះរូបភាព និងវីដេអូយំសោកនៅក្នុងបណ្តាញសង្គមដើម្បីស្វែងរកជំនួយពីអ្នកដទៃ។ នេះបើតាមប្រភពព័ត៌មានដដែល។
លោក Jirabhop Bhuridej ប្រធានទីភ្នាក់ងារបង្ក្រាបបទល្មើសរបស់ថៃ បញ្ជាក់ថា ប៉ូលិសនឹងធ្វើការយ៉ាងជិតស្និទ្ធជាមួយនាយកដ្ឋានសុខភាពផ្លូវចិត្ត ក៏ដូចជាក្រុមហ៊ុនបណ្តាញសង្គមដើម្បីស្វែងរកមនុស្សដែលចង់បញ្ចប់ជីវិតរបស់ពួកគេ ដែលសរសេរសារលើ Facebook ឬបណ្តាញសង្គមផ្សេងទៀត។ ប៉ូលិសថៃ ក៏ត្រូវបានអនុញ្ញាតឲ្យចូលទៅរារាំងសកម្មភាពធ្វើអត្តឃាត រហូតដល់ពេលមន្ត្រីសុខាភិបាលមកដល់ដែរ។
នៅក្នុងតំបន់អាស៊ីអាគ្នេយ៍ មិនមែនមានតែថៃទេដែលឃើញមានករណីអត្តឃាតកើនឡើង។ ករណីអត្តឃាតរបស់យុវជនសិង្ហបុរីក៏មានការកើនឡើងផងដែរ៕
Tag:
ថៃ
អត្តឃាត
COVID-19
© រក្សាសិទ្ធិដោយ thmeythmey.com
