COVID-19
ជាតិ
ព្រះសង្ឃជិត៥០អង្គនៅវត្តស្វាយដង្គំ ស្រុកឯកភ្នំ ឆ្លងផ្តាសាយតគ្នា មន្ទីរសុខាភិបាលយកសំណាកទៅធ្វើតេស្ត 14, Sep 2020 , 9:21 am
សកម្មភាពក្រុមគ្រូពេទ្យកំពុងតែយកសំណាករបស់ព្រះអង្គដែលគង់នៅវត្តស្វាយដង្គំ ខេត្តបាត់ដំបង ទៅធ្វើតេស្តរកជំងឺកូវីដ-១៩ រូបភាពពីមន្ទីរសុខាភិបាលខេត្តបាត់ដំបង
× មន្ទីរសុខាភិបាលខេត្តបាត់ដំបងនាថ្ងៃទី១៤ ខែកញ្ញា បានបញ្ជាក់ឲ្យដឹងថាមានករណីក្តៅខ្លួន ក្អក និងហៀរសំបោរលើព្រះសង្ឃចំនួន៤៦អង្គដែលគង់នៅក្នុងវត្តស្វាយដង្គំ ស្រុកឯកភ្នំ ខេត្តបាត់ដំបង អស់រយៈពេល៦ថ្ងៃមកហើយ។ បើតាមលោក វឿង ប៊ុនរ៉េត ប្រធានមន្ទីរសុខាភិបាលខេត្តបាត់ដំបង ខាងអ្នកជំនាញបានយកសំណាកព្រះអង្គចំនួន២១អង្គ និងបន្តយកសំណាកព្រះអង្គចំនួន២៥អង្គទៀតនាថ្ងៃនេះ ទៅត្រួតពិនិត្យរកជំងឺកូវីដ-១៩។
លោក វឿង ប៊ុនរ៉េត បានបញ្ជាក់ប្រាប់អ្នកសារព័ត៌មានថ្មីៗតាមទូរសព្ទថា ព្រះសង្ឃចំនួន៤៦អង្គកំពុងតែគង់សម្រាកព្យាបាលនៅក្នុងវត្តស្វាយដង្គំ ដើម្បីតាមដាន និងរង់ចាំលទ្ធផលជំងឺកូវីដ-១៩។ បើតាមលោក វឿង ប៊ុនរ៉េត កាលណាសំណាករបស់ព្រះសង្ឃទាំងនោះមានវិជ្ជមានកូវីដ-១៩ ខាងមន្ទីរសុខាភិបាលខេត្តបាត់ដំបងនឹងបញ្ជូនសម្រាកព្យាបាលនៅក្នុងមណ្ឌលសុខាភិបាលខេត្តភ្លាម។
បើតាមលោក វឿង ប៊ុនរ៉េត ព្រះអង្គទាំង៤៦អង្គនោះមិនមានអាការធ្ងន់ធ្ងរឡើយ ដោយមានព្រះអង្គខ្លះទ្រង់បានធូរស្បើយជាបណ្តើរៗហើយ។
លោក វឿង ប៊ុនរ៉េត បានបញ្ជាក់ថា ដំបូងឡើយព្រះអង្គមួយចំនួនបាននិមន្តមកពីបណ្តាខេត្តនានា ហើយក៏មានអាការឆ្លងតៗគ្នា។ លោក បានរៀបរាប់ដូច្នេះថា៖«មិនមានអ្វីចម្លែកទេ តែមានម្នាក់ផ្តាសាយ ហើយនៅជុំគ្នា អ៊ីចឹងបានឆ្លងតគ្នា ដោយព្រះអង្គទ្រង់ឈឺអស់រយៈពេល៦ថ្ងៃមកហើយ»។
បើតាមលោក វឿង ប៊ុនរ៉េត មន្ទីរសុខាភិបាលខេត្តក៏កំពុងតែស្រាវជ្រាវរកអ្នកប៉ះពាល់បន្ថែមទៀតផងដែរ៕
Tag:
ជំងឺ
ផ្តាសាយ
ព្រសង្ឃ
© រក្សាសិទ្ធិដោយ thmeythmey.com