ជាតិ
សង្គមជាតិ
ចម្លាក់ក្រោមដីរបស់ក្រុម YouTube មួយនៅស្រុកសូទ្រនិគមកំពុងទាក់ទាញអ្នកទៅទស្សនា 15, Sep 2020 , 4:39 pm
រូបភាពផ្តល់ដោយ លោក អេង យូ
× សៀមរាប៖ សាធារណជនកំពុងផ្ទុះការចាប់អារម្មណ៍ ទៅនឹងចម្លាក់ក្រោមដីរបស់ក្រុមផលិតវីដេអូf YouTube មួយ ស្ថិតក្នុងស្រុកសូទ្រនិគម ខេត្តសៀមរាប។ ទម្លាក់ក្រោមដី ដែលកើតចេញពីការច្នៃម៉ូដដ៏ទាក់ទាញ ដោយអ្នករកស៊ីលើប្រព័ន្ធ YouTube មួយ តាមរយៈសកម្មភាពជីករណ្ដៅដី និងឆ្លាក់ជាចម្លាក់ផ្សេងៗនៅក្នុងនោះ។
ចម្លាក់ក្រោមដី ដែលមានរាងជាបន្ទប់គេង មានគ្រែ សាឡុង តុ និងចម្លាក់តាមជញ្ជាំង មួយចំនួនទៀត កំពុងទាញការចាប់អារម្មណ៍ពីទេសចរជាតិជិតឆ្ងាយ ឱ្យទៅទស្សនា។ ភាពទាក់ទាញទាំងនោះ ដោយសារជាចម្លាក់កម្រ និងមិនធ្លាប់បានឃើញផ្ទាល់នាពេលកន្លងមក ដែលក្រុមអ្នកផលិតវីដេអូ YouTube ដ៏ល្បីឈ្មោះមួយ បង្កើតឡើងសម្រាប់ថតផ្សព្វផ្សាយក្នុងបណ្ដាញ YouTube។
លោក ពាញ ស៊ីថា ស្ថាបនិកនិងជាអ្នករចនាម៉ូដចម្លាក់ក្រោមដី លើកឡើងថា ដើមឡើយលោកគ្មានបំណងធ្វើឱ្យចម្លាក់ក្រោមដីនេះ មានការផ្សព្វផ្សាយទូលំទូលាយយ៉ាងដូច្នេះឡើយ គឺការរៀបចំនេះសម្រាប់ថតបញ្ចូលក្នុងគណនី YouTube តែប៉ុណ្ណោះ។ តាមការបញ្ជាក់របស់លោក ស៊ីថា កន្លងមកក្រុមលោកធ្លាប់រៀបចំជាចម្លាក់ក្រោមដីនេះបានប៉ុន្មានលើកមកហើយ តែជាចម្លាក់ផ្ទះក្រោមដីសម្រាប់សត្វ ទើបតែពេលថ្មីៗនេះបានកែច្នៃជាចម្លាក់ផ្ទះសម្រាប់មនុស្សម្ដង។
តាមការបញ្ជាក់ពីអ្នករកស៊ីលើតាមប្រព័ន្ធ YouTube លោក ស៊ីថា បន្ថែមថា ក្រុមលោកមានគ្នា៥នាក់ បានចំនាយពេលជិត២ខែ ដើម្បីច្នៃចម្លាក់ផ្ទះក្រោមដីនេះឡើង ដោយចម្លងគំនិតមួយផ្នែកពីវីដេអូបរទេស រួមនិងការបន្ថែមគំនិតដោយខ្លួនឯង។ ទន្ទឹមនឹងការសប្បាយរីករាយជាមួយនឹងការគាំទ្រពីសាធារណជន លោក ស៊ីថា ក៏បង្ហាញការព្រួយបារម្ភផងដែរ នៅពេលដែលទីតាំងចម្លាក់ក្រោមដីរបស់លោក មានអ្នកចូលមកទស្សនាច្រើន ដ្បិតថា ក្បូរក្បាច់ចម្លាក់ដែលក្រុមលោករចនាឡើង គឺទៅតាមចំណេះនិងគំនិតតិចតួចដែលខ្លួនមាន និងមិនមែនជាអ្នកជំនាញសិល្បៈអ្វីឡើយ។ បន្ថែមពីនោះ លោកបារម្ភថា អាចមានខុសទម្រង់សិល្បៈណាមួយផងដែរ។
យ៉ាងណាក៏ដោយ លោក ស៊ីថា បង្ហាញអារម្មណ៍រីករាយជាខ្លាំងដែលចម្លាក់ក្រោមដីរបស់លោកទទួលបានការចាប់អារម្មណ៍ខ្លាំងពីសំណាក់អាជ្ញាធរមូលដ្ឋាន រួមនិងសាធារណជន ដែលបានលើកទឹកចិត្ត និងជំរុញឱ្យក្រុមរបស់លោកបន្តធ្វើទៀត។ សិល្បៈចម្លាក់ក្រោមដីខាងលើនេះស្ថិតនៅភូមិ គោកតឹង ឃុំចាន់ស ស្រុកសូទ្រនិគម ខេត្តសៀមរាប៕
© រក្សាសិទ្ធិដោយ thmeythmey.com