ជាតិ
ម្ចាស់ចម្ការផ្កាស្បៃរឿងជើងភ្នំសំពៅ បានចំណូលច្រើនជាងមុនក្រោយប្រែក្លាយចម្ការទៅជាសួនទេសចរណ៍
29, Sep 2020 , 11:59 pm
ចម្ការផ្កាស្បៃរឿងជើងភ្នំសំពៅ
×![]()
ចម្ការផ្កា ក្នុងខេត្តបាត់ដំបង កំពុងទទួលបានការចាប់អារម្មណ៍យ៉ាងខ្លាំងពីអ្នកទេសចរ ដែលចូលចិត្តថតរូបកម្សាន្ត។ ចម្ការផ្កាទាំងនោះ សុទ្ធតែប្រែក្លាយពីចម្ការផ្កាដែលចាំទុកលនក់ ជាទីតាំងសម្រាប់ទេសចរ ចូលសម្រាកកម្សាន្ត។ ថ្វីដ្បិតការថែទាំចម្ការសម្រាប់ទេសចរ នឿយហត់ជាងការដាំផ្កាទុកសម្រាប់តែលក់ ប៉ុន្តែម្ចាស់ចម្ការផ្កា អះអាងថាពួកគេមានចំណូលច្រើនជាងពីការកែច្នៃនេះ។
លោក យឿន ភា ម្ចាស់ចម្ការផ្កាស្បៃរឿងជើងភ្នំសំពៅ ខេត្តបាត់ដំបង ដែលធ្លាប់តែដាំផ្កាលក់សម្រាប់រដូវបុណ្យទានផ្សេងៗ បានច្នៃចម្ការផ្ការបស់ខ្លួន ទៅជាកន្លែងទេសចរណ៍មួយ ប្រហែល១ឆ្នាំកន្លះហើយ។ ចម្ការផ្ការបស់លោក យឿន ភា មានផ្កាចម្រុះពណ៌ប្រមាណ៣០ប្រភេទ ដូចជាផ្កាស្បៃរឿង, សិរមាន់,កេសរកូល និងផ្កាអមតៈជាដើម។ ក្រៅពីមានផ្កាច្រើនប្រភេទហើយ លោក ភា ក៏បានសង់ផ្ទះស្នាក់ពីដើមឫស្សី ទីតាំងថតរូបច្រើនកន្លែង និងកែច្នៃផ្លូវនៅក្នុងចម្ការបន្ថែមទៀត ដើម្បីឲ្យទេសចរងាយស្រួលក្នុងការដើរទស្សនាចម្ការផ្ការបស់ខ្លួន។
ម្ចាស់ចម្ការរូបនេះ រៀបរាប់ប្រាប់សារព័ត៌មាន ThmeyThmey25 ថា លោកមានចំណូលច្រើនជាងមុន ក្រោយកែប្រែចម្ការរបស់ខ្លួនទៅជាកន្លែងទេសចរណ៍។ លោក យឿន ភា បញ្ជាក់ដូច្នេះ៖«ជីវភាពរបស់ខ្ញុំ មានភាពរីកចម្រើនជាងមុន ដោយទទួលបានចំណូលច្រើនជាងមុន គ្រាន់តែមានភាពនឿយហត់ជាងមុនឆ្ងាយណាស់ ព្រោះត្រូវប្រើគំនិតកែច្នៃរហូត។ បើកាលដាំផ្កាលក់ អត់ចាំបាច់គិតច្រើនទេ»។
លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង
លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង
ម្ចាស់ចម្កាផ្កាមួយកន្លែងទៀត នៅក្នុងសង្កែ ខេត្តដំបងដដែល ក៏កំពុងទាក់ទាញទេសចរយ៉ាងកុះករ ឲ្យទៅលេងកម្សាន្តដែរ នោះគឺសួនផ្ការីករាយ។ អ្នកនាង ទៀង កណិការ ដែលជាម្ចាស់សួនផ្កានេះ ប្រាប់ ThmeyThmey25 ថា ខ្លួនបានច្នៃចម្ការផ្ការបស់ម្ដាយ ទៅជាទីទេសចរណ៍ បានប្រមាណ៣ឆ្នាំហើយ ប៉ុន្តែអ្នកស្គាល់ភាគច្រើន គឺអ្នកបាត់ដំបង។ ក្រៅពីសម្រស់ផ្ការីកចម្រុះពណ៌មានពណ៌លឿង ក្រហម និងសជាដើម នៅលើផ្ទៃដីប្រមាណ១ហិកតា ទេសចរដែលចូលកម្សាន្តនៅទីនោះ ក៏អាចជួលសម្លៀកបែបបុរាណ ដើម្បីថតរូបបានផងដែរ។
ម្ចាស់សួនផ្ការីករាយ រៀបរាប់បន្តថា ការច្នៃចម្ការផ្កាជាកន្លែងទេសចរណ៍ ក៏អាចឲ្យគ្រួសារខ្លួនមានជីវភាពប្រសើរជាងមុនដែរ បើទោះត្រូវចំណាយមើលថែទាំចម្ការច្រើនជាក្តី។ អ្នកនាងទៀង កណិការ រៀបរាប់ថា៖ «កាលដាំផ្កាលក់ យើងដាំក្នុងស្មៅក៏បានដែរ ប៉ុន្តែបើយើងដាំផ្កាសម្រាប់ឲ្យគេមើល គឺយើងត្រូវការថែច្រើន និងច្នៃប្រឌិតច្រើន។ ការដាំបែបទេសចរណ៍ អាចមានការលំបាកច្រើន តែអាចរកចំណូលបានច្រើនជាងមុន»។
អ្នកនាង_ទៀង_កណិការ_ម្ខាស់សួនផ្ការីករាយ
ប្រធានមន្ទីរទេសចរណ៍ខេត្តបាត់ដំបង លោក អ៊ុចអ៊ុំ ភីនីស្សារ៉ា បានប្រាប់សារព័ត៌មានThmeyThmey25 ថា បច្ចុប្បន្នប្រជាជន ក្នុងខេត្តបាត់ដំបង បានយល់ដឹងពីអត្ថប្រយោជន៍នៃកំណើនទេសចរ ទើបធ្វើឲ្យមានការកែច្នៃចម្ការផ្កា ទៅជាតំបន់ទេសចរណ៍។ លោកបានថ្លែងដូច្នេះថា ៖ « ការបង្កើតទៅជាកន្លែងកសិ-ទេសចរណ៍ អាចធ្វើឲ្យពួកគាត់ទទួលបានផលជាច្រើន ដោយមិនត្រឹមតែទទួលបានកសិផល ដែលយកទៅលក់ទេ អាចឲ្យភ្ញៀវចូលទស្សនា និងទទួលបានចំណូលដល់កន្លែងដោយផ្ទាល់ ថែមទាំងអាចកាត់បន្ថយការចំ ណាកស្រុកផងដែរ»។
ប្រធានមន្ទីរទេសចរណ៍ខេត្តបាត់ដំបង បញ្ជាក់ថា បច្ចុប្បន្នខេត្តនេះមានចម្ការផ្កាដែលកំពុងទាក់ទាញទេសចរ ចំនួន៥កន្លែង ហើយចម្ការផ្កាទាំង៥នេះ បានក្លាយទីតាំងទេសចរ៍ទាក់ទាញទីពីរ បន្ទាប់ពីការជិះឡូរី៕
Tag:
ចម្ការផ្កា
បាត់ដំបង
កសិ-ទេសចរណ៍
© រក្សាសិទ្ធិដោយ thmeythmey.com
