ភ្នំពេញ៖ យុវជនសោម សីហា ផលិតបានម៉ាស៊ីនភ្លើងដែលអាចដំណើរបានរហូតដល់១៥ម៉ោងក្នុងមួយថ្ងៃ ដោយមិនប្រើប្រេងឥន្ទនៈ(សាំង,ម៉ាស៊ូត) និងចរន្តអគ្គិសនី។ យុវជនវ័យ២៦ឆ្នាំ មានកំណើតនៅខេត្តកំពង់ឆ្នាំងរូបនេះ បានបញ្ជាក់ថា គោលបំណងបង្កើតម៉ាស៊ីនភ្លើងនេះឡើង គឺដើម្បីជួយលើកកម្ពស់វិស័យកសិកម្មកម្ពុជា ពិសេសផ្នែកវារីវប្បកម្ម ដោយជួយកាត់បន្ថយការចំណាយរបស់កសិករ និងមិនបំពុលដល់បរិស្ថាន។
យុវជនសោម សីហា បានចំណាយពេលពេលវេលាជិត៥ឆ្នាំ(ចាប់ពីឆ្នាំ២០១៦មក) និងចំណាយថវិកាអស់ប្រមាណ៧០០០ដុល្លារ ដើម្បីសម្រេចបានជោគជ័យនៃការបង្កើតម៉ាស៊ីនភ្លើងដើរដោយថាមពលខ្លួនឯងនេះ។
សូមស្តាប់កិច្ចសម្ភាសរវាងកញ្ញា អ៊ូ សុខមាន អ្នកសារព័ត៌មានថ្មីៗ ជាមួយ យុវជន សោម សីហា អ្នកបង្កើតម៉ាស៊ីនភ្លើងដែលបង្កើតថាមពលដោយខ្លួនឯង ដូចតទៅ៖
យុវជនដែលបញ្ចប់បរិញ្ញាបត្រផ្នែកវិទ្យាសាស្ត្រអេឡិចត្រូនិក នៅវិទ្យាស្ថានជាតិពហុបច្ចេកទេសកម្ពុជា(NPIC)រាជធានីភ្នំពេញ បានអះអាងប្រាប់សារព័ត៌មានថ្មីៗ(ThmeyThmey)ថា ម៉ាស៊ីនភ្លើងបង្កើតថាមពលដោយខ្លួនឯងនេះ គឺដំណើរឡើងដោយមិនឮសំឡេង និងមិនបញ្ចេញផ្សែងឡើយ។ សីហា បានរៀបចំ និងកំណត់ម៉ាស៊ីនភ្លើងនេះឱ្យដំណើរការតែ១៥ម៉ោងទេក្នុងមួយថ្ងៃ ដើម្បីរក្សាគុណភាពម៉ាស៊ីនសម្រាប់ប្រើប្រាស់បានយូរ និងមិនឆាប់ខូច។ ប៉ុន្តែ ម៉ាស៊ីនភ្លើងនេះ ក៏អាចប្រើប្រាស់២៤ម៉ោង លើ២៤ម៉ោងបានដែរ ។
ប្រព័ន្ធភ្លើងរបស់ម៉ាស៊ីនភ្លើងដើរដោយថាមពលខ្លួនឯង។ រូបថត៖ សោម សីហា
បើតាមលោក សីហា ម៉ាស៊ីនភ្លើងប្រភេទនេះ គឺអាចប្រើប្រាស់បានគ្រប់វិស័យ ពិសេសលើវិស័យកសិកម្មសម្រាប់ប្រជាកសិករដែលរស់នៅតំបន់ដាច់ស្រយាល ដែលមិនមានប្រព័ន្ធផ្គត់ផ្គង់អគ្គិសនីសាធារណទៅដល់។ «ចំពោះម៉ាស៊ីនប្រភេទនេះ យើងអាចប្រើវាបាននៅក្នុងវិស័យអ្វីក៏បានដែរ។ សូម្បីតែវិស័យសុខាភិបាល ក៏ត្រូវ ហើយប្រើក្នុងវិស័យកសិកម្ម គឺរឹតតែពិសេស»។ នេះជាលើកឡើងរបស់លោក សោម សីហា ដោយបន្តថា ការចិញ្ចឹមបង្កង ក្នុងវិស័យកសិកម្មបច្ចុប្បន្ន គឺត្រូវការម៉ូទ័រអុកស៊ីសែនដើរដោយថាមពលអគ្គិសនី ប៉ុន្តែសម្រាប់អ្នកតំបន់ដាច់ស្រយាល ឬគ្មានអគ្គិសនីប្រើប្រាស់ គឺអាចប្រើម៉ាស៊ីនភ្លើងបង្កើតថាមពលដោយខ្លួនឯងនេះបាន សម្រាប់ការអាជីវកម្មចិញ្ចឹមបង្កងនោះ។
ម៉ាស៊ីនភ្លើងដំណើរការដោយថាមពលខ្លួនឯង។ រូបថត៖ សោម សីហា
ក្រៅពីនេះ ម៉ាស៊ីនភ្លើងដំណើរការដោយមិនប្រើថាមពលអគ្គិសនី និងប្រេងឥន្ទនៈនេះ ក៏អាចប្រើនៅក្នុងអាជីវកម្មភ្ញាស់កូនមាន់ក្នុងទូបានដែរ។ លោក សីហា បានបញ្ជាក់ថា កសិករឬអាជីវករ ដែលប្រើប្រាស់ម៉ាស៊ីនភ្លើងប្រភេទនេះ នឹងជួយកាត់បន្ថយថ្លៃចំណាយ ឬថ្លៃដើម នៅក្នុងមុខរបររបស់ខ្លួនហើយ ថែមទាំងចូលរួមសម្អាតបរិស្ថានទៀត។
បន្ទាប់ពីបង្កើតម៉ាស៊ីនភ្លើងដែលដំណើរការដោយមិនប្រើប្រេងឥន្ទនៈនិងចរន្តអគ្គិសនីនេះ បានជោគជ័យនៅចុងខែសីហា ឆ្នាំ២០២០ហើយនោះ បច្ចុប្បន្នយុវជនកំព្រាឪពុកម្តាយរូបនេះ កំពុងស្វែងរកជំនួយផ្នែកហិរញ្ញវត្ថុ ដើម្បីបង្កើតរ៉ូបូតដែលមានមុខងារចំនួន៤ ដែលអាចដំណើរការបានព្រមគ្នា(4 in1 GPS Robot) នៅក្នុងផលិតកម្មដាំដុះស្រូវ។ សោម សីហា បន្តរៀបរាប់ថា 4 in1 GPS Robot នេះមួយ គឺមានមុខងារបាចគ្រាប់ពូជ, បាច, បាញ់ថ្នាំ និងជ្រោយដីឱ្យដីធូរ។ « GPS Robotនេះ គឺយើងកំណត់វាដំណើរការឡើងដោយគ្មានមនុស្សទៅបើក[នៅលើវាលស្រែនោះទេ] គឺយើងបញ្ជាវាតាមតេលេបញ្ជា»។ នេះបើតាមលោក សោម សីហា៕
ម៉ាស៊ីនភ្លើងដំណើរការដោយថាមពលខ្លួនឯង។ រូបថត៖ សោម សីហា