ជាតិ
វីដេអូ
៨០០ ឆ្នាំក្រោយមក អាជ្ញាធរជាតិអប្សរាជួសជុលកំពែងក្រុងអង្គរធំ
01, Nov 2020 , 11:59 am
×![]()
ក្នុងឆ្នាំ ១១៨១ នៅពេលដែលព្រះបាទជ័យវរ្ម័នទី៧ បានច្បាំងឈ្នះកងទ័ពចាម ហើយបានរៀបចំព្រះរាជពិធីរាជាភិសេកជាក្សត្រគ្រប់គ្រងអាណាចក្រខ្មែរ ព្រះអង្គបានរៀបចំរាជធានី យសោធរបុរៈ អង្គរធំឡើងវិញ ដោយបានសាងសង់ប្រាសាទបាយ័ននៅចំកណ្តាលផ្ទៃរាជធានី និងសង់កំពែង៤ជ្រុងស្មើព័ទ្ធជុំវិញ។ កំពែងក្រុងអង្គរធំមានប្រវែងសរុប១២គីឡូម៉ែត្រ ដោយសារតែ ជ្រុង ឬមុខនៃកំពែងនីមួយៗមានប្រវែង៣គីឡូម៉ែត្រ។
ជញ្ជាំងកំពែងមានកម្ពស់៧ម៉កន្លះ។ ផ្នែកខាងក្នុងនៃកំពែង មានលើកដីជាបង្អែក រហូតដល់កំពស់ស្មើនឹងកំពែង បង្កើតបានជាខ្នងកំពែង។ នៅលើខ្នងកំពែង ក៏ត្រូវបានរៀបជាថ្នល់ក្រវាត់ក្រុង ដែលមានទទឹងប្រហែល១០ម៉ បន្ទាប់មកគឺជាជម្រាលដីចុះក្រោមដែលមានចំងាយប្រមាណ១០០ម៉។ ជម្រាលនេះ ក៏ជាជន្ទល់ទប់កំពែងដែរ។
សំណង់បុរាណរបស់ដូនតាខ្មែរបានឈរបង្អួតកូនចៅជំនាន់ក្រោយរាប់រយពាន់ឆ្នាំយ៉ាងមោទនៈ។ ប៉ុន្តែ សង្គ្រាម ការបោះបង់ចោល ធម្មជាតិ បានធ្វើឱ្យប្រាសាទរាប់រយ រួមទាំងកំពែងក្រុងអង្គរធំនេះផង រលំ បាក់បែក ដួលដល់ដីដោយអន្លើ។ មានការដួលរលំកំពែងចំនួន២២កន្លែង ដោយបូករួមទាំងកាលដួលរលំចំនួន៤កន្លែងចុងក្រោយ នៅក្នុងឆ្នាំ២០១១ ដោយសារតែខ្យល់ព្យុះ។
រហូតដល់ឆ្នាំ២០២០នេះ មានការដ្ឋានជួសជុលកំពែងបាក់បែកឡើងវិញ ចំនួន៧កន្លែងហើយ ដែលត្រូវបានបញ្ចប់។ ហើយគម្រោងការដ្ឋានថ្មីៗទៀត នឹងបន្តនៅឆ្នាំ២០២១ ជាបន្តបន្ទាប់។
ការជួសជុលកំពែង និងខ្នងកំពែងក្រុងអង្គរធំឡើងវិញ គឺជាកាតព្វកិច្ច និងជាការងារចាំបាច់។ ជាង៨០០ឆ្នាំមុន កំពែង និងខ្នងកំពែងត្រូវបានសាងសង់ ដើម្បីការពារទីក្រុងអង្គរធំ។ ជាង៨០០ឆ្នាំក្រោយ កំពែង និងខ្នងកំពែងនៅតែបម្រើផលប្រយោជន៍ដល់កូនចៅខ្មែរ។ យើងទាំងអស់គ្នា មានចំណែកស្មើគ្នាក្នុងការថែរក្សាកេរដំណែលទាំងនេះ ដើម្បីជាប្រយោជន៍កូនចៅយើងរាប់រយពាន់ឆ្នាំទៅមុខទៀត។
សារព័ត៌មានថ្មីៗ សូមអរគុណក្រុមហ៊ុនកូកាកូឡាកម្ពុជា សណ្ឋាគារវិរតន៍ និងក្រុមហ៊ុនស្តាអូតូកម្ពុជា ដែលបានគាំទ្រកម្មវិធី លើសពីអង្គរ ឬ Angkor and Beyond ដែលជាកម្មវិធីសហប្រតិបត្តិការរវាងសារព័ត៌មានថ្មីៗ និងអាជ្ញាធរជាតិអប្សរា ក្នុងផលិតឯកសារដែលទាក់ទងនឹងប្រាសាទ ជីវិតមនុស្ស សត្វ ធម្មជាតិ នៅក្នុងតំបន់ឧទ្យានជាតិអង្គរ៕
Tag:
អង្គរធំ
កំពែង
បាយ័ន
អាជ្ញាធរជាតិ Apsara
© រក្សាសិទ្ធិដោយ thmeythmey.com
