ជាតិ
ផ្លូវមួយចំនួនក្នុងខេត្តបន្ទាយមានជ័យ ត្រូវផ្អាកចរាចរណ៍បណ្ដោះអាសន្ន 18, Oct 2020 , 3:20 pm
បន្ទាយមានជ័យ រូបភាព៖ កងពលតូចថ្មើរជើងលេខ៥១
× រដ្ឋបាលខេត្តបន្ទាយមានជ័យ បានចេញសេចក្ដីជូនដំណឹងនៅថ្ងៃទី ១៨ ខែតុលានេះ ស្ដីពីការផ្អាកចរាចរណ៍ជាបណ្ដោះអាសន្ន មិនឲ្យរថយន្តធុនធំគ្រប់ប្រភេទធ្វើដំណើរឆ្លងកាត់ផ្លូវជាតិលេខ៥៦,៥៨ ផ្លូវខេត្តលេខ ១៥៦ដេ,២៥៦៣ ក្នុងភូមិសាស្រ្តខេត្តបន្ទាយមានជ័យ។
យោងតាមសេចក្ដីជូនដំណឹង ការផ្អាកចររាចរណ៍បណ្ដោះអាសន្ននេះក៏ព្រោះតែផ្លូវមួយចំនួនក្នុងខេត្តបន្ទាយមានជ័យជន់លិច ប្រឈមការខូចខាត និងអាចបង្កឲ្យមានគ្រោះថ្នាក់ដល់អ្នកធ្វើដំណើរ។ ដូច្នេះត្រូវផ្អាកចរាចរណ៍បណ្ដោះអាសន្នផ្លូវជាតិលេខ៥៦ ចាប់ពីក្រុងសិរីសោភ័ណ ដល់បន្ទាយឆ្មារ ព្រំប្រទល់ខេត្តឧត្តរមានជ័យ។ ដោយឡែកផ្លូវជាតិលេខ៥៨ ចាប់ពីក្រុងប៉ោងប៉ែត ដល់ភូមិផ្អុង ព្រំប្រទល់ខេត្តឧត្តរមានជ័យ។
ផ្អាកចរាចរណ៍បណ្ដោះអាសន្នផ្លូវខេត្ត១៥៦ដេ ចាប់ពីរង្វង់មូលយាយជី ស្រុកមង្គលបូរី ដល់ស្រុកព្រះនេត្រព្រះ។ រីឯផ្លូវខេត្ត២៥៦៣ ចាប់ពីថ្មពួក ដល់ឃុំគោករមៀត បឹងត្រកួន។ ការផ្អាកចរាចរណ៍ខាងលើនេះ រហូតមានការជូនដំណឹងជាថ្មីពីរដ្ឋបាលខេត្ត ដើម្បីឲ្យបើកចរាចរណ៍ឡើងវិញ ដើម្បីការពារការបាក់ស្រុត ក៏ដូចជាថែរក្សា ផ្លូវ ស្ពាន និងធានាដល់ការធ្វើដំណើររបស់ពលរដ្ឋឲ្យមានសុវត្ថិភាព។
ទាក់ទងនឹងទឹកជំនន់ក្នុងខេត្តបន្ទាយមានជ័យនេះ លោក អ៊ុំ រាត្រី អភិបាលខេត្តបន្ទាយមានជ័យ បានប្រាប់សារព័ត៌មានថ្មីៗថា មានក្រុង-ស្រុកចំនួន៦ បានរងការជន់លិច ក្នុងនោះមាន ក្រុងសិរីសោភ័ណ ក្រុងប៉ោយប៉ែត ស្រុកមង្គលបូរី ស្រុកអូរជ្រៅ ស្រុកថ្មពួក និងស្រុកម៉ាឡៃ។ ស្រុកចំនួន៣ទៀត មានស្រុកភ្នំស្រុក ,ស្វាយចេក និងស្រុកព្រះនេត្រព្រះមិនទាន់មានផលប៉ះពាល់ខ្លាំង តែយ៉ាងណាក៏ដោយ បើមានភ្លៀងធ្លាក់បន្ត នោះទូទាំងខេត្តបន្ទាយមានជ័យ នឹងរងផលប៉ះពាល់។
តាមលោក អ៊ុំ រាត្រី មូលហេតុដែលធ្វើឲ្យខេត្តមានការជន់លិច គឺដោយសារមានភ្លៀងធ្លាក់ជាបន្តបន្ទាប់ គួបផ្សំប្រភពទឹកដែលបានហូរពីខេត្តខាងលើ និងទឹកដែលហូរធ្លាក់ពីប្រទេសថៃផងដែរ។ លោកអភិបាលខេត្ត នៅតែអំពាវនាវឲ្យពលរដ្ឋមានការប្រុងប្រយ័ត្នខ្ពស់ ចំពោះគ្រោះធម្មជាតិនេះ និងឲ្យមន្ត្រីចុះជាប់ជានិច្ចតាមមូលដ្ឋានរបស់ខ្លួន ដើម្បីត្រៀមជួយសង្គ្រោះពលរដ្ឋឲ្យបានទាន់ពេលវេលា។
គិតត្រឹមថ្ងៃទី១៧ ខែតុលា គ្រោះទឹកជំនន់បានធ្វើឲ្យផ្ទះពលរដ្ឋក្នុងខេត្តបន្ទាយមានជ័យជាង ១ម៉ឺនខ្នងជន់លិច ប៉ះពាល់ផ្លូវជាតិ-ខេត្ត ប្រមាណ ៣ពាន់មែត្រ ដំណាំកសិកម្មជាង ២ពាន់ហិកតាត្រូវជន់លិច និងមនុស្សចំនួន ១២នាក់បានបាត់បង់ជីវិត។ បើតាមរបាយការណ៍គណកម្មាធិការជាតិគ្រប់គ្រងគ្រោះមហន្តរាយ៕
© រក្សាសិទ្ធិដោយ thmeythmey.com