ជាតិ
សង្គមជាតិ
សម្តេច ហ៊ុន សែន ចង់បង្កើតសមាគម ការពារកុំឲ្យមានការប្រមាថលើជនពិការ
21, Oct 2020 , 11:53 am
សម្តេច ហ៊ុន សែន ចុះសួរសុខទុក្ខយុវជនពិការ នៅអង្គការសម្ព័ន្ធនារីពិការ ក្នុងក្រុងព្រៃវែង ខេត្តព្រៃវែង កាលពីអំឡុងខែកុម្ភៈ ឆ្នាំ២០១៧។ រូបពីគេហទំព័រ httpsamdechhunsen.gov.kh
×![]()
ដោយ: សារព័ត៌មានថ្មីៗ
សម្តេចនាយករដ្ឋមន្ត្រី ហ៊ុន សែន អាចនឹងបង្កើតសមាគមថ្មីមួយ ដើម្បីការពារសេចក្តីថ្លៃថ្នូររបស់ជនពិការ។ សម្តេច ប្រកាសពីបំណងនេះ ក្នុងឱកាសដែលសម្តេច ចុះទៅចែកអំណោយនិងពិនិត្យមើលដោយផ្ទាល់ពីប្រជាជនរងគ្រោះដោយទឹកជំនន់ ក្នុងខេត្តបន្ទាយមានជ័យ នាព្រឹកថ្ងៃទី២០ ខែតុលា ឆ្នាំ២០២០។ 
នៅចំពោះមុខប្រជាជន ដែលទៅទទួលអំណោយ ដោយមានទាំងជនពិការដែរនោះ ប្រមុខរដ្ឋាភិបាល ថ្លែងថា៖«ដោយសារខ្ញុំជាជនពិការដែរ អ៊ីចឹង ខ្ញុំ ប្រហែលជាអាចឈានទៅបង្កើតសមាគមការពារសេចក្តីថ្លៃថ្នូរសម្រាប់ជនពិការ ដើម្បីជៀសវាងការប្រមាថ»។
ប្រមុខរដ្ឋាភិបាល ទទូចសុំ កុំឲ្យមានការប្រមាថកាតទានលើជនពិការ ដូចជា ហៅថា អាខ្វាក់ [ភ្នែក] អាកំបុតដៃ អាកំបុតជើង អាខ្វេរអាខ្វង់ ជាដើម។ ប្រមុខរដ្ឋាភិបាល ចាត់ទុកការប្រើពាក្យទាំងនេះ ថាជាការធ្វើឲ្យប៉ះទង្គិចយ៉ាងធ្ងន់ធ្ងរដល់សតិអារម្មរណ៍របស់ជនពិការ។
សម្តេចនាយករដ្ឋមន្ត្រី បានលើកករណីរបស់ខ្លួនមកធ្វើជាឧទាហរណ៍។ សម្តេច មានប្រសាសន៍ថា៖«ខ្លួនខ្ញុំ ទទួលការឈឺចាប់ធ្ងន់ធ្ងរណាស់ នៅពេលគេជេរខ្ញុំថា អាខ្វាក់ ហើយខ្ញុំ មិនអត់ឱនឲ្យទេជាមួយអ្នកណាក៏ដោយ ដែលហៅខ្ញុំថាអាខ្វាក់ ព្រោះខ្ញុំខូចភ្នែកម្ខាង ខូចដើម្បីជាតិមាតុភូមិ មិនគួរណាមានការប្រមាថរបៀបនេះទេ។ ខ្លះពិការពីកំណើត តែយើង ត្រូវឲ្យតម្លៃលើជនពិការ»។
សម្តេចនាយករដ្ឋមន្ត្រី បន្ថែមថា ពេលជួបជនពិការ សម្តេច តែងតែជួយឧបត្ថម្ភថវិកា៕
Tag:
ហ៊ុន សែន
សមាគមការពារជនពិការ
© រក្សាសិទ្ធិដោយ thmeythmey.com
