ជាតិ
ទឹកធ្លាក់បុស្សស្បូវ ប្រែពីតំបន់ប្រយុទ្ធ ទៅជាតំបន់ទេសចរណ៍ដ៏ទាក់ទាញនៅព្រំដែនខ្មែរ-ថៃ 31, Oct 2020 , 7:59 am
× ព្រះវិហារ៖ ទឹកធ្លាក់ «បុស្សស្បូវ» ជារមណីយដ្ឋានទេសចរណ៍ដ៏ទាក់ទាញមួយ ដែលលាក់ខ្លួននៅជើងភ្នំដងរែក ខេត្តព្រះវិហារ។ ទឹកធ្លាក់ដែលមានធម្មជាតិស្រស់បំព្រង អមព្រៃឈើតូចធំ លាយឡំជាមួយនឹងផ្ទាំងថ្ម តូច-ធំ នេះ មានទីតាំងនៅភូមិតេជោបុស្សស្បូវ ឃុំស្រអែម ស្រុកជាំក្សាន្ត ខេត្តព្រះវិហារ។ លោកធៀម ធាន មេបញ្ជាការរងប្រចាំតំបន់ប្រតិបត្តិការខេត្តព្រះវិហារ បញ្ជាក់ថា៖ «តំបន់ទឹកធ្លាក់តេជោបុស្សស្បូវ បានប្រែជាតំបន់ទេសចរណ៍ ដែលពីមុន តំបន់នេះ ជាតំបន់សង្គ្រាមរវាងទ័ពកម្ពុជា-ថៃ»។
ចាប់តាំងពីបង្កើតជាតំបន់ទេសចរណ៍ «ទឹកធ្លាក់បុស្សស្បូវ» ត្រូវបានគ្រប់គ្រងដោយកងទ័ពតំបន់ប្រតិបត្តិការសឹករងព្រះវិហារ។ ទឹកធ្លាក់បុស្សស្បូវ ជាកន្លែងដែលភ្ញៀវទេសចរអាចអង្គុយទទួលទានអាហារ និងងូតទឹកត្រជាក់ ក្រោមម្លប់ ដើមឈើ យ៉ាងរីករាយ។ ភ្ញៀវទេសចរអាចធ្វើដំណើរ ចូលតាមផ្លូវក្រួសក្រហម មានចម្ងាយប្រមាណ ១៦ គីឡូម៉ែត្រផ្លូវជាតិនៅត្រង់ចំណុចកណ្តាលនៃផ្លូវបំបែកឆ្ពោះទៅតំបន់ប្រាសាទព្រះវិហារ និងទៅកាន់ទីប្រជុំជនស្រុកជាំក្សាន្តនៃខេត្តព្រះវិហារ។
សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន Thmey Thmey 25 ជាមួយលោកវរសេនីយ៍ឯក ធៀម ធាន មេបញ្ជាការរងប្រចាំតំបន់ប្រតិបត្តិការខេត្តព្រះវិហារដូចតទៅ៖
លោក ធៀម ធាន មេបញ្ជាការរងប្រចាំតំបន់ប្រតិបត្តិការខេត្តព្រះវិហារ លើកឡើងថា៖ «ក្រោយបង្កើតជាតំបន់ទេសចរណ៍ ទឹកធ្លាក់បុស្សស្បូវ បានផ្ដល់ប្រាក់ចំណូលដល់គ្រួសារកងទ័ព និងប្រជាពលរដ្ឋរស់នៅតំបន់នេះ តាមរយៈការមកកម្សាន្តរបស់ភ្ញៀវទេសចរ»។ បើតាមលោកមេបញ្ជាការរង ទឹកធ្លាក់បុស្សស្បូវនេះ អំណោយផលនៅក្នុងរដូវវស្សា ដែលមានទឹកធ្លាក់សម្រាប់ភ្ញៀវទេសចរលេងកម្សាន្ត៕
Tag:
ទឹកធ្លាក់បុស្សស្បូវ
ព្រះវិហារ
ទេសចរណ៍
© រក្សាសិទ្ធិដោយ thmeythmey.com