ជាតិ
សង្គមជាតិ
កសិករខេត្តបាត់ដំបងចំនួន២៥៥គ្រួសារ ទទួលបានពូជបន្លែ និងកូនត្រី ពីក្រសួងកសិកម្ម 30, Oct 2020 , 7:59 pm
រូបភាពពីក្រសួងកសិកម្ម រុក្ខាប្រមាញ់ និងនេសាទ
× ភ្នំពេញ៖ ក្រោយជួបវិបត្តិនៃគ្រោះទឹកជំនន់ ក្រសួងកសិកម្ម រុក្ខាប្រមាញ់ និងនេសាទ បានផ្ដល់ពូជបន្លែ កូនត្រី ចំណីត្រី និងតង់ ទៅគ្រួសារចំនួន២៥៥គ្រួសារ ដែលរងគ្រោះដោយទំនន់នេះ។ នេះបើតាមក្រសួងកសិកម្ម រុក្ខាប្រមាញ់ និងនេសាទ។
ពលរដ្ឋចំនួន២៥៥គ្រួសារ ក្នុងស្រុករុក្ខគិរី ខេត្តបាត់ដំបង ទទួលបានពូជបន្លែ-ពូជម្នាស់ កូនត្រីអណ្ដែង ចំណីត្រី និងតង់ ពីក្រសួងកសិកម្ម រុក្ខាប្រមាញ់ និងនេសាទ ដែលមានការចុះចាយជូន ដោយលោក វេង សាខុន រដ្ឋមន្ត្រីក្រសួងកសិកម្ម។
ក្នុងនោះ កសិករចំនួន២០០គ្រួសារ ទទួលបានពូជបន្លែចំនួន៦មុខ ដោយមួយគ្រួសារទទួលបានពូជបន្លែចំនួន១ឃីដ។ ចំណែកឯ ពលរដ្ឋចំនួន៥គ្រួសារផ្សេងទៀតទទួលបាន អង្ករចំនួន២៥គីឡូក្រាម និងពូជផ្លែម្នាស់ចំនួន២ពាន់ដើម ក្នុងមួយគ្រួសារ។ រីឯពលរដ្ឋចំនួន៥០គ្រួសារទៀត ទទួលបានពូជកូនត្រីអណ្ដែងពីក្រសួងកសិកម្មផងដែរ។
សូមបញ្ជាក់ថា ការចុះចាយពូជដំណាំ និងពូជកូនត្រី ដល់ពលរដ្ឋក្នុងខេត្តបាត់ដំបងនេះ គឺជាយុទ្ធនាការស្ដារដំណាំស្រូវ និងដំណាំកសិកម្មឡើងវិញរបស់ក្រសួងកសិកម្ម រុក្ខាប្រមាញ់ និងនេសាទ ដែលអនុវត្តឡើងក្នុងខេត្តគោលដៅចំនួន៤គឺ ខេត្តសៀមរាប បន្ទាយមានជ័យ ពោធិ៍សាត់ និងបាត់ដំបង។ កន្លងមកនេះ ក្រសួងកសិកម្ម បានចុះចាយជូនពូជស្រូវ និងពូជដំណាំ ដល់ពលរដ្ឋក្នុងខេត្តសៀមរាប និងបន្ទាយមានជ័យរួចមកហើយ៕
© រក្សាសិទ្ធិដោយ thmeythmey.com