ជាតិ
សេដ្ឋកិច្ច
ឯកអគ្គរដ្ឋទូតរុស្ស៊ី ថា ក្រុមហ៊ុនជាច្រើន កំពុងចាប់អារម្មណ៍វិនិយោគនៅកម្ពុជា 05, Nov 2020 , 10:59 pm
លោក Anatoly Borovik ឯកអគ្គរដ្ឋទូតរុស្ស៊ីប្រចាំកម្ពុជា នៅក្នុងជំនួបលោក អូន ព័ន្ធមុន្នីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី៣ វិច្ឆិកា ២០២០
× ភ្នំពេញ៖ ក្រុមហ៊ុនរុស្ស៊ីជាច្រើន ចាប់អារម្មណ៍លើការវិនិយោគនៅកម្ពុជា ។ នេះជាការលើកឡើងរបស់លោក Anatoly Borovik ឯកអគ្គរដ្ឋទូតរុស្ស៊ីប្រចាំកម្ពុជា នៅក្នុងជំនួបលោក អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី៣ វិច្ឆិកា។
បំណងដែលអ្នកវិនិយោគរុស្ស៊ី ចង់ទុនរកស៊ីនៅកម្ពុជា ដោយសារពួកគេមើលឃើញពីសក្ដានុពលសេដ្ឋកិច្ចកម្ពុជា។ ក្រសួងសេដ្ឋកិច្ច បានស្រង់សម្តីលោក Anatoly Borovik យ៉ាងដូច្នេះថា៖«មានក្រុមហ៊ុនជាច្រើន ទាំងក្រុមហ៊ុនធំ និងមធ្យម កំពុងមានចំណាប់អារម្មណ៍ និងស្វែងរកកាលានុវត្តភាព ក្នុងការដាក់ទុនវិនិយោគ និងប្រកបធុរកិច្ចនៅកម្ពុជា។ នាពេលខាងមុខទំហំពាណិជ្ជកម្មទ្វេភាគីរវាងប្រទេសទាំងពីរ នឹងមានការកើនឡើងជាបន្តបន្ទាប់»។
លោក អូន ព័ន្ធមុន្នីរ័ត្ន អះអាងថា រដ្ឋាភិបាលកម្ពុជា បានត្រៀមខ្លួនជាស្រេច ក្នុងការជំរុញកិច្ចសហប្រតិបត្តិការទាំងនេះ ឱ្យកាន់តែសកម្មថែមទៀត។ «ស្វាគមន៍វិនិយោគពីរុស្ស៊ី មកដាក់ទុនវិនិយោគបន្ថែមទៀតនៅកម្ពុជា ដើម្បីបង្កើនទំហំពាណិជ្ជកម្មទ្វេភាគី និងជំរុញកំណើនសេដ្ឋកិច្ច»។ នេះជាការបញ្ជាក់របស់រដ្ឋមន្ត្រីក្រសួងសេដ្ឋកិច្ច។
បើតាមលោក អូន ព័ន្ធមុន្នីរ័ត្ន ទោះបីជាក្នុងបរិបទកូវីដ-១៩ ក្តី ក៏កិច្ចសហប្រតិបត្តិការរវាងប្រទេសទាំងពីរ កម្ពុជា-រុស្ស៊ី នៅតែដំណើរការទៅមុខដោយរលូន ជាពិសេសក្នុងវិស័យសេដ្ឋកិច្ច ពាណិជ្ជកម្ម វិនិយោគ អប់រំ សុខាភិបាល និងវប្បធម៌។
លោក Anatoly Borovik ឯកអគ្គរដ្ឋទូតរុស្ស៊ីប្រចាំកម្ពុជា បានអះអាងថា រដ្ឋាភិបាលខ្លួន នឹងបន្តជួយកម្ពុជា ជាពិសេសក្នុងវិស័យអប់រំ និងសុខាភិបាល ក៏ដូចជាផ្ដល់អាហារូបករណ៍ដល់និស្សិតទៅសិក្សានៅរុស្ស៊ី ក្នុងការបណ្ដុះបណ្ដាលជំនាញ និងជំនួយបច្ចេកទេសជាដើម។
គួរបញ្ជាក់ថា ទំហំពាណិជ្ជកម្មរវាងកម្ពុជា-រុស្ស៊ី មានជាង៥៥លានដុល្លារអាមេរិក នៅឆ្នាំ២០១៩។ ភាគីទាំងពីរ រំពឹងថា ទំហំពាណិជ្ជកម្ម នឹងកើនឡើងទៀត នៅឆ្នាំ២០២០៕
Tag:
សេដ្ឋកិច្ច
ពាណិជ្ជកម្ម
© រក្សាសិទ្ធិដោយ thmeythmey.com