ដោយ៖ ប៉ូ សុភា
ភ្នំពេញ៖ ពិព័រណ៍តាំងបង្ហាញផលិតផលខ្មែររដូវកាលទី៥ នៅខេត្តសៀមរាប និងខេត្តព្រះវិហារ ត្រូវបានផ្អាកសិន ដើម្បីទប់ស្កាត់ការរីករាលដាលជំងឺកូវីដ១៩ ។ នេះបើតាមសេចក្តីជូនដំណឹងរបស់ក្រសួងពាណិជ្ជកម្ម ។
ក្រសួងពាណិជ្ជកម្ម ប្រកាសលើកពេលរៀបចំពិព័រណ៍ផលិតផលនេះ ទៅពេលក្រោយជំងឺកូវីដ-១៩ មានសភាពថមថយសិន មុននឹងក្រសួងចេញការសម្រេចរៀបចំការតាំងបង្ហាញផលិតផលជាថ្មី។
ការរៀបចំពិព័រណ៍នៅខេត្តសៀមរាប ចាប់ពីថ្ងៃទី ២១ ដល់២៤ ខែវិច្ចិកា និងនៅខេត្តព្រះវិហារ ថ្ងៃទី២៣ដល់២៦ខែ វិច្ចិកា ឆ្នាំ២០២០ ប៉ុន្តែដោយសារស្ថានភាពជំងឺកូវីដ-១៩ បន្តគំរាមកំហែងនោះ ទើបក្រសួងសម្រេចផ្អាកសិន។
កម្ពុជាមានអ្នកជំងឺកូវីដ-១៩ ចំនួន៣០២នាក់ ក្នុងនោះជាសះស្បើយចំនួន២៨៩ ខណៈអ្នកជំងឺ១៣នាក់ កំពុងសម្រាកនៅមន្ទីរពេទ្យមិត្តភាពខ្មែរ-សូវៀត។
ដោយឡែកមនុស្សជាង១ពាន់នាក់ កំពុងធ្វើចត្តាឡីស័កខ្លួនឯង។ ពួកគេទាំងនោះ ជាអ្នកប្រាស្រ័យនឹងលោករដ្ឋមន្ត្រីការបរទេសហុងគ្រី Peter Szijjarto ដែលមកទស្សនកិច្ចនៅកម្ពុជា កាលពីថ្ងៃទី៣ វិច្ឆិកា។លោក Peter Szijjarto ត្រូវបានគេរកឃើញមានកូវីដ-១៩ នៅប្រទេសថៃ ក្រោយចប់ទស្សនកិច្ចនៅកម្ពុជា។
មនុស្សជាង១ពាន់នាក់ ដែលត្រូវធ្វើចត្តាឡីស័កនោះ រួមមានសម្ដេចនាយករដ្ឋមន្ត្រី ហ៊ុន សែន និងភរិយា ,លោកប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ, លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ , លោក ប៉ាន់ សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក លឹម គានហោ រដ្ឋមន្ត្រីក្រសួងធនធានទឹក, ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល, លោកស្រីជា សិរី អគ្គនាយកបច្ចេកទេស ធនាគារជាតិនៃកម្ពុជា រួមទាំងមន្រី្តជាន់ខ្ពស់តាមស្ថាប័ននានា, ក្រុមអង្គរក្ស និងក្រុមអ្នកសារព័ត៌មានជាតិ-អន្តរជាតិជាដើម។ មិនតែប៉ុណ្ណោះបុគ្គលិកតាមគ្រឹះស្ថានសិក្សា មាតាបិតាសិស្ស ក៏ត្រូវតាមដានពិនិត្យសុខភាពរកជំងឺកាចសាហាវនេះដែរ។
អ្នកទាំងនោះ បានធ្វើបានតេស្តសុខភាព៣លើកមកហើយ គឺអវិជ្ជមានកូវីដ-១៩ លើកលែងតែមនុស្ស៤នាក់ប៉ុណ្ណោះ មានកូវីដ-១៩ ក្នុងនោះរួមមានលោក សួស យ៉ារ៉ា តំណាងរាស្ត្រគណបក្សប្រជាជនកម្ពុជា, លោក ស ចិត្រា អគ្គលេខាធិការរងក្រសួងកសិកម្ម និងទូតហុងគ្រីប្រចាំកម្ពុជា និងវៀតណាម រួមទាំងអង្គរក្សម្នាក់។
ជុំវិញព្រឹត្តិការណ៍ ៣ វិច្ឆិកា នេះដែរ សម្ដេចនាយករដ្ឋមន្ត្រី ហ៊ុន សែន បានអំពាវនាវឱ្យមន្ត្រី ក៏ដូចជាអ្នកពាក់ព័ន្ធបន្តការធ្វើចត្តាឡីស័ក បន្តអនុវត្តតាមសេចក្តីណែនាំរបស់ក្រសួងសុខាភិបាលឱ្យត្រឹមត្រូវ ដើម្បីបង្ការហានិភ័យ និងឆ្លងចូលសហគមន៍៕