លោក ដូណាល់ ត្រាំ ប្រធានាធិបតីអាមេរិក និងស្ត្រីទី១ Melania ប្រើប្រាស់រថយន្ត Cadillac ដែលមានឈ្មោះថា «The Beast» សម្រាប់មុខតំណែងរបស់ខ្លួន។ រថយន្តប្រធានាធិបតីអាមេរិក គ្រប់គ្រងដោយភ្នាក់ងារសម្ងាត់អាមេរិក ដែលត្រូវបានបំពាក់ដោយបច្ចេកវិទ្យាសុវត្ថិភាពដ៏ខ្ពស់។ តាមកំណត់ត្រារបស់ The Quint រថយន្ត Lincoln K Sunshine Special គឺជារថយន្តទី១សម្រាប់ប្រធានាធិបតីអាមេរិក បើគិតចាប់តាំងពីឆ្នាំ១៩៣៩មក។
លោក Franklin D.Roosevelt ប្រធានាធិបតីទី៣២របស់សហរដ្ឋអាមេរិក មានរថយន្តប្រធានាធិបតីប្រើប្រាស់ផ្លូវការដំបូងគេបំផុត គឺ Lincoln K Sunshine Special ពីឆ្នាំ១៩៣៩ ដល់ឆ្នាំ១៩៤២។ ក្រោយព្រឹត្តិការណ៍វាយប្រហារ Pearl Harbour នៅឆ្នាំ១៩៤១ រថយន្តដើម្បីបំពាក់ឧបករណ៍ការពារបន្ថែម ជាមួយនឹងទ្វារពាសដែក និងសំបកកង់ការពារគ្រាប់។
នៅឆ្នាំ១៩៤២ រថយន្ត Lincoln Custom ក្លាយជារថយន្តទីពីរសម្រាប់ប្រធានាធិបតីដែលត្រូវបានផលិតឡើងនាសម័យសង្គ្រាមលោកលើកទី២ ដែលត្រូវបានប្រើប្រាស់ដោយលោក Franklin D.Roosevelt ហើយបន្ទាប់មកគឺលោក Harry Truman ប្រធានាធិបតីទី៣៣របស់អាមេរិក។
ឈានដល់ឆ្នាំ១៩៥០ លោក Harry Truman បន្តជ្រើសរើស Lincoln ជំនួស Ford។ រថយន្ត Lincoln Cosmopolitan ត្រូវបានបំពាក់ឧបករណ៍ជាច្រើន ជាពិសេសនៅផ្នែកខាងលើ ដើម្បីឲ្យពលរដ្ឋមើលឃើញពីភាពអស្ចារ្យនៃរថយន្តសម្រាប់ប្រធានាធិបតី។
ចន្លោះពីឆ្នាំ១៩៦១ ដល់ឆ្នាំ១៩៧២ រថយន្ត Lincoln Continental ក្លាយជារថយន្តទី៤សម្រាប់ប្រធានាធិបតីអាមេរិក ជាមួយនឹងកូដ SS-100-X ដែលផ្តល់ដោយក្រុមភ្នាក់ងារសម្ងាត់ ហើយក៏ជារថយន្តតែមួយដែលត្រូវបានប្រើប្រាស់នៅពេលដែលលោកប្រធានាធិបតី John F. Kennedy ត្រូវបានបាញ់សម្លាប់នៅឆ្នាំ១៩៦៣។
លោក Ronald Reagan ក្លាយជាប្រធានាធិបតីអាមេរិកដែលបានប្រើប្រាស់រថយន្ត Cadillac Fleetwood សម្រាប់មុខតំណែងខ្លួននៅឆ្នាំ១៩៨៣។ វាជាប្រភេទរថយន្តពាសដែក ដែលមានកញ្ចក់ការពារគ្រាប់ និងប្រព័ន្ធហ្វ្រាំងទំនើប មិនចាញ់ម៉ូដែល Lincoln នោះឡើយ។
នៅឆ្នាំ១៩៨៩ ម៉ូដែល Lincoln បានវិលត្រឡប់មកវិញសម្រាប់ប្រធានាធិបតីអាមេរិក ហើយ Lincoln Town Car ក៏ជារថយន្តផ្លូវការចុងក្រោយផងដែរ។ រថយន្តនេះ ត្រូវបានប្រើប្រាស់នៅក្នុងរជ្ជកាលលោក George H.W. Bush។
ឈានដល់អណត្តិលោក Bill Clinton នៅឆ្នាំ១៩៩៣ រថយន្ត Cadillac Fleetwood ក៏បានវិលត្រឡប់មកវិញផងដែរ ជាមួយនឹងការបន្ទាន់សម័យបន្ថែម ជាពិសេសការតម្លើងម៉ាស៊ីន V8 ៧.៤ លីត្រ ពីម៉ូដែលរថយន្ត Chevrolet។ វាត្រូវបានចាត់ទុកជារថយន្តដែលបំពាក់បច្ចេកវិទ្យាទំនើបផងដែរ ដែលអាចភ្ជាប់ទូរសព្ទ អ៊ីនធ័រណិត និងប្រព័ន្ធផ្កាយរណប។
នៅឆ្នាំ២០០៥ រថយន្ត Cadillac DTS ត្រូវច្នៃដោយផ្ទាល់ដៃពីក្រុមភ្នាក់ងារសម្ងាត់។ រថយន្តនេះ ត្រូវបានប្រើប្រាស់ឆ្លងពីលោក George W.Bush បន្តទៅលោក Barack Obama។ ព័ត៌មានសម្ងាត់ជាច្រើនទៀតទាក់ទងនឹង Cadillac DTS Presidential State Car នេះ មិនត្រូវបានទម្លាយឲ្យដឹងនោះឡើយ។
ប៉ុន្តែសម្រាប់ការសម្ពោធតំណែងក្នុងអណត្តិទី១របស់ខ្លួននៅឆ្នាំ២០០៩ លោក Barack Obama បានប្រើប្រាស់រថយន្ត Cadillac One ហើយត្រូវបានប្រើប្រាស់បន្តក្នុងអណត្តិរបស់លោកប្រធានាធិបតី Donald Trump នាពេលបច្ចុប្បន្ន។ រថយន្តនេះ អាចរារាំងការវាយប្រហារដោយអាវុធគីមី។
នៅឆ្នាំ២០១១ លោក អូបាម៉ា មានប្រភេទរថយន្តក្រុងមួយទៀត គឺ Ground Force One ដែលយកឈ្មោះតាមយន្តហោះប្រធានាធិបតី Air Force One។ រថយន្តពណ៌ខ្មៅដ៏ទំនើបដែលមានប្រវែងជិត១៤ម៉ែត្រនេះ ប្រើប្រាស់សម្រាប់លោកប្រធានាធិបតីផ្ទាល់ រួមទាំងសហសេវិករបស់លោកនៅសេតវិមាន។
បច្ចុប្បន្ននេះ The Beast គឺជារថយន្តផ្លូវការរបស់លោក ដូណាល់ ត្រាំ ដែលជាផលិតផលរបស់ក្រុមហ៊ុន Cadillac The Beast មានតម្លៃមួយលានដុល្លារកន្លះ ផលិតដោយយ៉ាងពិសេសដោយបំពាក់បច្ចេកវិទ្យាទំនើប ពាសដែកដែលអាចទប់ស្កាត់ការវាយប្រហារគ្រាប់កាំភ្លើង និងគ្រាប់បែកមួយចំនួនផង ព្រមទាំងការវាយប្រហារអាវុធគីមី និងជីវសាស្ត្រដែរ។ កញ្ចក់រថយន្តនេះ មានកម្រាស់ជិត៧សង់ទីម៉ែត្រ ឯតួខ្លួនវិញមានបន្ទះការពារកម្រាស់២០សង់ទីម៉ែត្រឯណោះ។
នៅខាងក្នុង The Beast ក៏មានបំពាក់ប្រព័ន្ធទំនាក់ទំនងល្អពិសេស ប្រព័ន្ធអុកស៊ីសែន និងការផ្គត់ផ្គង់ឈាមសម្រាប់ប្រធានាធិបតី។ និយាយពីទម្ងន់វិញ រថយន្តនេះ មានទម្ងន់ដល់ទៅ៩ពាន់គីឡូក្រាម ហើយអាចផ្ទុកមនុស្សបាន៧នាក់ផងដែរ។ ក្នុងលក្ខខណ្ឌសន្តិសុខ គេតែងឃើញ The Beast ចំនួនពីរបើកបន្តបន្ទាប់គ្នា ដោយមួយដឹកប្រធានាធិបតីអាមេរិក៕