COVID-19
កីឡាជាតិ
ជាតិ
NOCC រៀបចំ Sport for All ដើម្បីបំផុសយុទ្ធនាការប្រជាជនម្នាក់លេងកីឡាមួយមុខ 17, Nov 2020 , 8:29 pm
× ខេត្តកំពង់ធំបានក្លាយជាទីតាំង សម្រាប់រៀបចំកម្មវិធីកីឡាដើម្បីទាំងអស់គ្នា(Sport for All) ដែលជាគម្រោងរបស់គណៈកម្មាធិការជាតិអូឡាំពិកកម្ពុជា(NOCC)ក្នុងដំណើរឆ្ពោះទៅត្រៀមធ្វើជាម្ចាស់ផ្ទះការប្រកួតកីឡាស៊ីហ្គេមនៅឆ្នាំ២០២៣។ ក្រៅពីបំផុសឲ្យយុវជនចូលរួមលេងកីឡា កម្មវិធីនេះ ក៏បានបញ្ជ្រាបពីវិធានការបង្ការ និងការពារការឆ្លងជំងឺកូវីដ-១៩ ផងដែរ។
Sport for All ជាឈ្មោះកម្មវិធីមួយរបស់គណៈកម្មាធិការជាតិអូឡាំពិកកម្ពុជា ដែលរៀបចំឡើងដើម្បីបំផុសការលេងកីឡាដល់យុវជន និងផ្សព្វផ្សាយពីយុទ្ធនាការ«ប្រជាជនម្នាក់លេងកីឡា១មុខ»។ យុទ្ធនាការនេះ ត្រូវបានរាជរដ្ឋាភិបាលកម្ពុជា បង្កើតឡើងក្នុងគោលបំណង ដើម្បីបំផុសឲ្យប្រជាពលរដ្ឋចូលរួមលេង និងហាត់កីឡា ដើម្បីពង្រឹងសុខភាពផ្លូវកាយ និងផ្លូវចិត្ត។
ការអភិវឌ្ឍវិស័យកីឡាឲ្យកាន់មានភាពផុសផុល និងរីកចម្រើន និងបណ្តុះធនធានកីឡាករក្នុងដំណើរឆ្ពោះទៅធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣២ឆ្នាំ២០២៣ ក៏ស្ថិតក្នុងគោលបំណងនៃយុទ្ធនាការ«ប្រជាជនម្នាក់លេងកីឡាមួយមុខ»ផងដែរ។ «គោលបំណងសំខាន់មានពីរ គឺដើម្បីបំផុសការចូលរួមលេងកីឡាឲ្យស្របតាមគុណតម្លៃនៃចលនាអូឡាំពិក និងផ្សព្វផ្សាយពីយុទ្ធនាការប្រជាជនម្នាក់លេងកីឡាមួយមុខ ដើម្បីត្រៀមឆ្ពោះទៅធ្វើម្ចាស់ផ្ទះកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣»។ នេះជាការលើកឡើងរបស់លោក ប៊ុយ សុភ័ណ្ឌ អនុប្រធានគម្រោងនៃ NOCC។
ក្រៅពីកម្មវិធីសំណួរចំឡើយពាក់ព័ន្ធគុណតម្លៃអូឡាំពិក និងស៊ីហ្គេមឆ្នាំ២០២៣ សិស្សានុសិស្ស ដែលចូលរួមកម្មវិធីកីឡាដើម្បីទាំងអស់គ្នា បានចូលរួមលេងល្បែងកម្សាន្ត និងកីឡាជាច្រើនប្រភេទ។ ល្បែងកម្សាន្ត និងកីឡាទាំងនោះរួមមានទាត់បាល់១១ម៉ែត្រ រត់ប្រណាំង បាល់ទាត់ បាល់ទះ ជិះកង់ ចងជើងដើរជាក្រុម លោកឆ្លងកងអូឡាំពិក សំហាត់ប្រាណបែបអាអេរ៉ូប៊ិក បង្វិលកងរត់ជាក្រុម ល្បែងអប់រំសាមគ្គីជាក្រុម និងសកម្មភាពសំបរិស្ថាន។
ការបញ្ជ្រាបការយល់ដឹងពាក់ព័ន្ធជំងឺកូវីដ-១៩ ដែលកំពុងរាតត្បាតទូទាំងពិភពលោក ក៏ត្រូវបានដាក់បញ្ចូលក្នុងរបៀបវារនៃកម្មវិធីកីឡាដើម្បីទាំងអស់គ្នាដែរ។ ជាក់ស្តែងក្រុមការងារនៃចលនានេះ បាននាំគ្នាជិះកង់ជាមួយសិស្សានុសិស្សជុំវិញភូមិមួយចំនួនក្នុងខេត្តកំពង់ធំ ដើម្បីផ្សព្វផ្សាយពីវិធានការណែនាំរបស់ក្រសួងសុខាភិបាល ក្នុងការបង្ការ និងទប់ស្កាត់ការឆ្លងរីករាលដាលនៃជំងឺកូវីដ-១៩។
បើតាមលោក ញ៉ាន សុខវិសាល ប្រធាននាយកដ្ឋានទំណាក់ទំនងអន្តរជាតិនៃ NOCC កម្មវិធី Sport for All បានប្រព្រឹត្តទៅក្រោមការរឹតបណ្តឹងផ្នែកសុវត្ថិភាព និងអនុវត្តតាមគោលការណ៍របស់ក្រសួងសុខាភិបាល តាមរយៈការវាស់កម្តៅ ពាក់ម៉ាស់ រក្សាគម្លាតសុវត្ថិភាព បាញ់អាល់កុល និងលាងដៃជាមួយសាប៊ូ ជែល និងអាល់កុលជាដើម។
កម្មវិធីកីឡាដើម្បីទាំងអស់គ្នា ដែលធ្វើឡើងកាលពីថ្ងៃទី១៣ ខែវិច្ឆិកា ឆ្នាំ២០២០ នៅសាលាបឋមសិក្សា-អនុវិទ្យាល័យបណ្តុះវិជ្ជាមានសិស្សានុសិស្សជាង១ពាន់នាក់ចូលរួម។ ពួកគេទាំងនេះមកពីសាលាបឋម អនុវិទ្យា និងវិទ្យាល័យនានា ដែលនៅក្បែរនោះ៕
មន្ត្រី NOCC និងសិស្សានុសិស្សនាំគ្នាជិះកង់ ដើម្បីផ្សព្វផ្សាយពីពិធីបង្ការ និងទប់ស្កាត់ការឆ្លងនៃជំងឺកូវីដ-១៩
សកម្មភាពបាញ់អាល់កុលលាងដៃដល់សិស្សានុសិស្ស
សកម្មភាពរើសសំរាមរបស់មន្ត្រីរៀបចំកម្មវិធី Sport for All និងសិស្សានុសិស្ស
Tag:
NOCC
ប៊ុយ សុភ័ណ្ឌ
ញ៉ាន សុខវិសាល
© រក្សាសិទ្ធិដោយ thmeythmey.com