ជាតិ
នយោបាយជាតិ
លទ្ធផលចុងក្រោយ សម្ដេច ហ៊ុន សែន និងភរិយា អវិជ្ជមានកូវីដ-១៩
18, Nov 2020 , 11:08 am
×![]()
ដោយ: ធឿន បញ្ញាឬទិ្ធ
ភ្នំពេញ៖ សម្ដេចនាយករដ្ឋមន្រ្តី ហ៊ុន សែន និងភរិយា នៅតែអវិជ្ជមានកូវីដ-១៩ នៃការតេស្តសុខភាពលើកចុងក្រោយ នៅថ្ងៃទី១៨ វិច្ឆិកានេះ។ នេះជាការអះអាងរបស់សម្ដេច ហ៊ុន សែន នៅលើហ្វេសប៊ុក ដោយបានបន្ថែមថា សម្ដេចនឹងចេញទៅធ្វើការ ឬហាត់ប្រាណនៅខាងក្រៅឡើងវិញ នាថ្ងៃទី១៩ វិច្ឆិកា ។
ដ្បិតលទ្ធផលសម្ដេច ហ៊ុន សែន និងភរិយា អវិជ្ជមានកូវីដ-១៩ ក្តី ប៉ុន្តែកម្ពុជាក៏នៅតែរង់ចាំអ៊ុតលទ្ធផលមនុស្ស១៨០២នាក់ទៀត ដែលជាប់ពាក់ព័ន្ធនឹងព្រឹត្តិការណ៍ ៣ វិច្ឆិកា ដោយផ្ទាល់និងប្រយោលដែរ។ បើតាមសម្ដេច ហ៊ុន សែន ការបិទបញ្ចប់ព្រឹត្តិការណ៍ ៣ វិច្ឆិកា នៃការទប់ស្កាត់ជំងឺកូវីដ-១៩ នេះ នឹងអាចប្រកាសជាផ្លូវការនៅថ្ងៃទី២៥ វិច្ឆិកា។
ចំពោះពេលវេលានៃការបិទបញ្ចប់នេះ គឺរង់ចាំលទ្ធផលតាមដំណាក់កាលនីមួយៗ ដោយក្នុងនោះលទ្ធផលអ្នកធ្វើតេស្តនៅភ្នំពេញ ១៥៦៩នាក់ (មានជនជាតិហុងគ្រីចំនួន៥នាក់) ,ខេត្តកណ្តាល ៦៧នាក់ ,ខេត្តពោធិសាត់ ៤០នាក់ ,ខេត្តព្រៃវែង ២៣នាក់ និងខេត្តកំពង់ធំ ៣នាក់ ដែលក្រសួងសុខាភិបាលនឹងត្រូវប្រកាសនៅថ្ងៃទី១៩ វិច្ឆិកា ។ លទ្ធផលអ្នកធ្វើតេស្តនៅខេត្តកំពង់ឆ្នាំង១១នាក់ នឹងត្រូវប្រកាស ថ្ងៃទី២១ វិច្ឆិកា ។ ចំណែកអ្នកធ្វើតេស្តនៅខេត្តកែប ១៨នាក់ ,ខេត្តព្រះសីហនុ ៤០នាក់ ខេត្តកំពង់ចាម១នាក់ នឹងត្រូវបង្ហាញលទ្ធផលនៅថ្ងៃទី២៣ វិច្ឆិកា។ រីឯលទ្ធផលអ្នកធ្វើតេស្តនៅខេត្តព្រះវិហារ ២០នាក់ ខេត្តរតនគិរី១០នាក់ នឹងត្រូវប្រកាសនាថ្ងៃទី២៥ វិច្ឆិកា។
ប្រមុខរដ្ឋាភិបាល បានសង្កត់ធ្ងន់ដូច្នេះថា៖«ការដែលយើងអាចប្រកាសបិទបញ្ចប់បាន គឺនៅត្រង់យើងគ្រប់គ្រងបានចំនួនមនុស្សរហូត១៨០២នាក់នៅតាមរាជធានី ខេត្តចំនួន១១ ដែលមានការពាក់ព័ន្ធការធ្វើតេស្តនិងការធ្វើចត្តាឡីស័កបានត្រឹមត្រូវរយៈពេល១៤ថ្ងៃ ដែលបញ្ហានេះ។ ខ្ញុំបានពិភាក្សាយ៉ាងហ្មត់ចត់ជាមួយរដ្ឋមន្ត្រី និងថ្នាក់ដឹកនាំនៃក្រសួងសុខាភិបាល»។
ជាមួយគ្នានេះលោកនាយករដ្ឋមន្ត្រី ក៏ប្រាប់ឲ្យពលរដ្ឋ និងអ្នកពាក់ព័ន្ធព្រឹត្តិការណ៍ ៣ វិច្ឆិកា ដែលមិនទាន់បញ្ចប់ការធ្វើចត្តាឡីស័កនោះ ត្រូវបន្តអនុវត្តឲ្យបានត្រឹមត្រូវ ដើម្បីកុំឲ្យមានបញ្ហាប្រឈម និងការបារម្ភនានា។ មិនតែប៉ុណ្ណោះសម្ដេច ក៏បញ្ជាឲ្យអាជ្ញាធរតាមដានមើលអ្នកធ្វើចត្តាឡីស័កឲ្យបានតឹងរឹងផងដែរ។
«ព្រឹត្តិការណ៍ ៣ វិច្ឆិកា» គឺសំដៅលើដំណើរទស្សនកិច្ចនៅកម្ពុជារបស់លោក Peter Szijjarto រដ្ឋមន្ត្រីការបរទេស និង ពាណិជ្ជកម្មហុងគ្រី ។ លោក Peter Szijjarto ត្រូវបានគេរកឃើញមានកូវីដ-១៩ នៅពេលទៅដល់ប្រទេសថៃ។ ក្រោយពីទទួលបានព័ត៌មានថា លោក Peter Szijjarto មានជំងឺកូវីដ-១៩ នេះ រដ្ឋាភិបាល បានប្រកាសឲ្យអ្នកពាក់ព័ន្ធផ្ទាល់ធ្វើតេស្តសុខភាពភ្លាមៗ។ លើសពីនេះសម្ដេច ក៏បញ្ជាឲ្យមន្ត្រីជំនាញសុខាភិបាល និងអាជ្ញាធរបន្តស្វែងរកពាក់ព័ន្ធដោយប្រយោលពិនិត្យសុខាភាព និងធ្វើចត្តាឡីស័កផង។
«ប្រតិបត្តិការនៃព្រឹត្តិការណ៍៣វិច្ឆិកា ពិតជាធំធេងនឹងស្មុគ្រស្មាញក្នុងការស្វែងរកអ្នកជាប់ពាក់ព័ន្ធព្រោះវាទាក់ទងដល់មនុស្សច្រើននឹងរាជធានីខេត្ត ស្រុក ខ័ណ្ឌ ក្រុង ឃុំ សង្កាត់ និងភូមិជាច្រើនដែលលំបាកដល់ការស្វែងរក។ ប៉ុន្តែដោយការដឹកនាំត្រឹមត្រូវ មានការខិតខំ មានសាមគ្គីភាពនិងសហការណ៍ល្អយើងអាចធ្វើបានដោយរកឃើញគ្រប់មនុស្សពាក់ព័ន្ធមិនឱ្យបាត់ដានដែលជាមូលហេតុឆ្លងចូលសហគមន៍បង្កជាគ្រោះមហន្តរាយសម្រាប់ប្រជាជនយើង»។ នេះជាការអះអាងរបស់សម្ដេច ហ៊ុន សែន។
សម្រាប់ប្រមុខរដ្ឋាភិបាល ការគ្រប់គ្រងស្ថានការណ៍នេះបាន ដោយសារតែមានការសហការយ៉ាងល្អពីគ្រប់ភាគីពាក់ព័ន្ធ។ លោកនាយករដ្ឋមន្ត្រី បានបន្ថែមថា៖«បទពិសោធន៍ជោគជ័យរបស់យើងនៅពេលនេះក៏ដូចជាពេលកន្លងមកគឺស្ថិតនៅលើល្បឿននៃការគ្រប់គ្រងសភាពការណ៍ទាន់ពេលនឹងមានកិច្ចសហការពីគ្រប់តួអង្គពាក់ព័ន្ធដើម្បីស្វែងរកមុខសញ្ញាដែលមានការពាក់ព័ន្ធទាំងផ្ទាល់ ទាំងប្រយោលយកសំណាកមកធ្វើតេស្ត និងធ្វើចត្តាឡីស័ករយៈពេល១៤ថ្ងៃ»។
ការធ្វើតេស្ត៣លើកកន្លងមក គឺមានមនុស្ស៤នាក់ប៉ុណ្ណោះ វិជ្ជមានកូវីដ-១៩ រួមមានលោក សួស យ៉ារ៉ា តំណាងរាស្ត្រគណបក្សប្រជាជនកម្ពុជា, លោក ស ចិត្រា អគ្គលេខាធិការរងក្រសួងកសិកម្ម និងទូតហុងគ្រីប្រចាំកម្ពុជា និងវៀតណាម រួមទាំងអង្គរក្សម្នាក់។ ប៉ុន្តែលោក សួស យ៉ារ៉ា បានជាសះស្បើយពីកូវីដ-១៩ហើយ កាលពីថ្ងៃទី១៦ វិច្ឋិកា។
គិតត្រឹមថ្ងៃទី១៨វិច្ឆិកា ឆ្នាំ២០២០ កម្ពុជា រកឃើញអ្នកឆ្លងជំងឺកូវីដ-១៩ចំនួន៣០៤នាក់ ដោយក្នុងនោះ មាន៣០៤នាក់ បានជាសះស្បើយ និង១៣នាក់ទៀត កំពុងព្យាបាល៕
Tag:
COVID-19
© រក្សាសិទ្ធិដោយ thmeythmey.com
