អន្តរជាតិ
នយោបាយអន្តរជាតិ
បក្សប្រឆាំងមីយ៉ាន់ម៉ា ដាក់ពាក្យបណ្តឹង៦៣០ ជុំវិញការបោះឆ្នោតថ្ងៃទី៨ ខែវិច្ឆិកា
18, Nov 2020 , 3:54 pm
លោក U Khin Yi អនុប្រធានបក្សសាមគ្គី និងអភិវឌ្ឍសហភាព។ រូបភាព៖ Facebook
×![]()
ដោយ: ធៀន ភារិន្ទ
បក្សសាមគ្គី និងអភិវឌ្ឍសហភាព (USDP) បានដាក់ពាក្យបណ្តឹង៦៣០ករណី ទៅសមត្ថកិច្ច និងគណៈកម្មការរៀបចំការបោះឆ្នោតជុំវិញភាពមិនប្រក្រតីនៅក្នុងដំណើរការបោះឆ្នោត ដែលពួកគេអះអាងថា មិនយុត្តិធម៌។ នេះបើតាមការចុះផ្សាយរបស់សារព័ត៌មាន Irrawady នៅថ្ងៃទី១៧ ខែវិច្ឆិកា។ ការអះអាងរបស់បក្ស USDP បែបនេះ ខុសពីអ្នកអង្កេតការណ៍ជាតិ និងអន្តរជាតិ ដែលថា ការបោះឆ្នោតនៅមីយ៉ាន់ម៉ា គ្មានភាពមិនប្រក្រតីធំដុំអ្វីឡើយ។ 
លទ្ធផលបោះឆ្នោតមីយ៉ាន់ម៉ាថ្មីៗនេះបង្ហាញថា បក្សសម្ព័ន្ធជាតិដើម្បីប្រជាធិបតេយ្យ (NLD) បានកាន់កាប់កៅអីសភាសហភាពភាគច្រើនជាមួយកៅអីចំនួន ៣៩៦ ខណៈបក្សសាមគ្គី និងអភិវឌ្ឍសហភាព ដែលជាបក្សប្រឆាំងធំជាងគេរបស់មីយ៉ាន់ម៉ា មានសំឡេងក្នុងសភាសហភាពត្រឹមតែ ៣៣ ប៉ុណ្ណោះ។ សំឡេងគាំទ្ររបស់បក្សប្រឆាំងនេះ មានចំនួនតិចជាង កាលពីបោះឆ្នោតឆ្នាំ២០១៥ទៅទៀត ដែលមានចំនួន ៤១កៅអី។
បក្សសាមគ្គី និងអភិវឌ្ឍសហភាព បានដាក់ពាក្យតវ៉ាដោយអះអាងថា ការបោះឆ្នោតមានភាពមិនប្រក្រតីមួយចំនួន។ លោក U Khin Yi អនុប្រធានបក្ស USDP បាននិយាយក្នុងវីដេអូបង្ហោះលើ Facebook ថា បក្សសាមគ្គី និងអភិវឌ្ឍសហភាព បានដាក់ពាក្យបណ្តឹងទាក់ទិននឹងការប្រព្រឹត្តកំហុសក្នុងអំឡុងពេលបោះឆ្នោតចំនួន ៨០ករណី ទៅប៉ូលិសមីយ៉ាន់ម៉ា និង ៥៥០ករណីផ្សេងទៀត ទៅគណៈកម្មការរៀបចំការបោះឆ្នោតសហភាពមីយ៉ាន់ម៉ា (UEC) ។
បើតាមការបញ្ជាក់របស់អនុប្រធានបក្សរបស់នេះ ភាពមិនប្រក្រតីទាំងនោះមានដូចជា ការបោះឆ្នោតពីរដង, អ្នកបោះឆ្នោតមិនទាន់គ្រប់អាយុ និងការក្លែងអត្តសញ្ញាណរបស់អ្នកបោះឆ្នោតជាដើម។ នៅក្នុងច្បាប់បោះឆ្នោតមីយ៉ាន់ម៉ា គណបក្សទាំងអស់ អាចដាក់ពាក្យបណ្តឹង និងតវ៉ាបានក្នុងរយៈពេល ៤៥ថ្ងៃ បន្ទាប់ពីលទ្ធផលបោះឆ្នោតត្រូវបានប្រកាស។
ការតវ៉ារបស់បក្សប្រឆាំង រងការរិះគន់ និងឌឺដងពីសំណាក់ប្រជាជនមីយ៉ាន់ម៉ា។ ប្រជាជនមួយចំនួន បានឌឺដងថា បក្សប្រឆាំងនឹងមិនទទួលស្គាល់លទ្ធផលចាញ់ឆ្នោតនេះឡើយ។ ប៉ុន្តែលោក Khin Yi បានអះអាងថា ជាការពិត បក្សរបស់លោកមិនពេញចិត្តលទ្ធផលនេះទេ ព្រោះវាមិនដូចការរំពឹងទុក ហើយការដាក់ពាក្យបណ្តឹងនេះ ដើម្បីធ្វើឲ្យលទ្ធផលមានភាពស្របច្បាប់ និងយុត្តិធម៌។ អតីតមន្ត្រីយោធារូបនេះ បានបន្តទៀតថា បក្ស USDP ទទួលស្គាល់លទ្ធផលឆ្នាំ២០១៥ ដោយសារពេលនោះ ការបោះឆ្នោតមានភាពយុត្តិធម៌ និងសេរី។
នៅក្នុងការបោះឆ្នោតឆ្នាំ២០១៥ គណៈកម្មការរៀបចំការបោះឆ្នោតសហភាពមីយ៉ាន់ម៉ា គ្រប់គ្រងដោយរដ្ឋាភិបាលបក្ស USDP ។
សូមបញ្ជាក់ថា កន្លងមក UEC ក៏បានដោះស្រាយបណ្តឹងប្រមាណ ២០ករណីផងដែរទាក់ទងការបោះឆ្នោតថ្ងៃទី៨ ខែវិច្ឆិកា ដែលក្នុងនោះមានទាក់ទិននឹងការបោះឆ្នោតពីរដង ការផ្តល់ត្រាបោះឆ្នោតក្លែងក្លាយ និងការបោះឆ្នោតជំនួសជាដើម៕
Tag:
មីយ៉ាន់ម៉ា
បោះឆ្នោត
© រក្សាសិទ្ធិដោយ thmeythmey.com
