COVID-19
ជាតិ
នយោបាយជាតិ
លើសពីអាពាហ៍ពិពាហ៍ សាលារៀន សារមន្ទីរ រោងភាពយន្ត ក៏បើកឡើងវិញដែរ ក្រោយបញ្ចប់ព្រឹត្តិការណ៍៣ វិច្ឆិកា
18, Nov 2020 , 10:30 pm
×![]()
ភ្នំពេញ៖ សម្ដេច ហ៊ុន សែន បានប្រកាសបិទបញ្ចប់ព្រឹត្តិការណ៍ ៣ វិច្ឆិកាហើយ ក្រោយមនុស្សជាង១ពាន់នាក់ អវិជ្ជមានកូវីដ-១៩ នៅពេលធ្វើតេស្តសុខភាពចុងក្រោយនេះ។ «ព្រឹត្តិការណ៍ ៣ វិច្ឆិកា» គឺសំដៅលើដំណើរទស្សនកិច្ចនៅកម្ពុជារបស់លោក Peter Szijjarto រដ្ឋមន្ត្រីការបរទេស និង ពាណិជ្ជកម្មហុងគ្រី ។ លោក Peter Szijjarto ត្រូវបានគេរកឃើញមានកូវីដ-១៩ នៅពេលទៅដល់ប្រទេសថៃ។
ក្រោយប្រកាសបិទបញ្ចប់ព្រឹត្តិការណ៍នេះ សម្ដេច ហ៊ុន សែន ក៏បញ្ជាឲ្យក្រសួង ក៏ដូចជាអាជ្ញាធរ បើកសាលារៀន សារមន្ទីរ រោងភាពយន្ត កន្លែងសាសនា និងរៀបអាពាហ៍ពិពាហ៍ឡើងវិញ។ បើតាមសារសំឡេងសម្ដេច ហ៊ុន សែន សាលារៀន នឹងបើកនៅថ្ងៃទី២៣ វិច្ឆិកា តាមសំណើក្រសួងអប់រំ ខណៈសកម្មភាពៀផ្សេងៗ នឹងអាចបើកដំណើការជាបន្តបន្ទាប់ នៅសប្ដាហ៍ក្រោយ ប៉ុន្តែត្រូវអនុវត្តតាមវិធានការរបស់ក្រសួងសុខាភិបាល។
ត្រង់ចំណុចនេះ សម្ដេច ហ៊ុន សែន បានសង្កត់ធ្ងន់ថា ទោះបីទប់ស្កាត់ជំងឺកូវីដ-១៩ ក៏ត្រូវរក្សាទ្រទ្រង់សេដ្ឋកិច្ច និងសង្គមផងដែរ។ ដ្បិតជោគជ័យលើការទប់ស្កាត់ព្រឹត្តិការណ៍ ៣ វិច្ឆិកាក្តី ក៏នាយករដ្ឋមន្ត្រី ហ៊ុន សែន នៅតែអំពាវនាវឲ្យពលរដ្ឋបន្តយកចិត្តទុកដាក់ការពារខ្លួន ពីជំងឺកូវីដ-១៩ផង។
ក្នុងព្រឹត្តិការណ៍ ៣ វិច្ឆិកានេះ មានមនុស្ស៤នាក់ប៉ុណ្ណោះ វិជ្ជមានកូវីដ-១៩ រួមមានលោក សួស យ៉ារ៉ា តំណាងរាស្ត្រគណបក្សប្រជាជនកម្ពុជា, លោក ស ចិត្រា អគ្គលេខាធិការរងក្រសួងកសិកម្ម និងទូតហុងគ្រីប្រចាំកម្ពុជា និងវៀតណាម រួមទាំងអង្គរក្សម្នាក់។ ប៉ុន្តែលោក សួស យ៉ារ៉ា បានជាសះស្បើយពីកូវីដ-១៩ហើយ កាលពីថ្ងៃទី១៦ វិច្ឋិកា។
គិតត្រឹមថ្ងៃទី១៨វិច្ឆិកា ឆ្នាំ២០២០ កម្ពុជា រកឃើញអ្នកឆ្លងជំងឺកូវីដ-១៩ចំនួន៣០៤នាក់ ដោយក្នុងនោះ មាន៣០៤នាក់ បានជាសះស្បើយ និង១៣នាក់ទៀត កំពុងព្យាបាល៕
Tag:
COVID-19
© រក្សាសិទ្ធិដោយ thmeythmey.com
