កីឡាអន្តរជាតិ
អន្តរជាតិ
Nations League៖ បែលហ្ស៊ិក និងអ៊ីតាលី ឡើងទៅជួបបារាំង និងអេស្ប៉ាញ វគ្គបន្ទាប់ 19, Nov 2020 , 10:33 am
× បែលហ្ស៊ិក និងអ៊ីតាលី បានឈានទៅវគ្គ៤ក្រុមចុងក្រោយក្នុងការប្រកួតពានរង្វាន់ UEFA Nations League បន្ទាប់ពីយកឈ្នះគូប្រកួតក្នុងជំនួបតាមពូលចុងក្រោយរៀងៗខ្លួន។ បែលហ្ស៊ិក អ៊ីតាលី បារាំង និងអេស្ប៉ាញ នឹងត្រូវជួបគ្នានៅវគ្គផ្តាច់ព្រ័ត្រពានអឺរ៉ុបនៅខែតុលា ឆ្នាំ២០២១។
តាមរយៈជ័យជម្នះ ៤-២ លើក្រុមដាណឺម៉ាកនាការប្រកួតចុងក្រោយពូល A2 នៅរាត្រីថ្ងៃទី១៨ ខែវិច្ឆិកា បែលហ្ស៊ិកទទួលបានកៅអីទៅវគ្គពាក់៤ក្រុមចុងក្រោយ Nations League។ ៤គ្រាប់របស់ក្រុមរហស្សនាមបិសាចក្រហមធ្វើបានដោយ Youri Tielemans, Romelu Lukaku (២គ្រាប់) និង Kevin De Bruyne ខណៈពីរគ្រាប់របស់ដាណឺម៉ាកសម្រេចបានដោយ Jonas Wind និង Nacer Chadli ធ្វើឲ្យចូលទីខ្លួនឯង។
ឆ្លងកាត់ការប្រកួតទាំង៦លើក បែលហ្ស៊ិកមាន១៥ពិន្ទុឈរកំពូលតារាង នាំមុខក្រុមលេខ២ដាណឺម៉ាកចំនួន៥ពិន្ទុ។ អង់គ្លេសដែលយកឈ្នះអ៊ីស្លង់ទទួលបានចំណាត់ថ្នាក់លេខ៣រកបាន១០ពិន្ទុ ឯអ៊ីស្លង់នៅបាតតារាងគ្មានពិន្ទុរាប់។
អ៊ីតាលី ក៏ស្ថិតក្នុងចំណោម៤ក្រុមដែលមានសិទ្ធិទៅវគ្គ៤ក្រុមផ្តាច់ព្រ័ត្រផងដែរ បន្ទាប់ពីយកឈ្នះប៊ូស្នី ២-០ ក្នុងជំនួបចុងក្រោយពូល A1។ អ៊ីតាលីមានពិន្ទុនាំមុខគូប្រជែងហូឡង់តែ១ពិន្ទុប៉ុណ្ណោះក្រោយបញ្ចប់ការប្រកួតទាំង៦លើករៀងខ្លួន។
អ៊ីតាលីឈរកំពូលតារាងពូល A1 មាន១២ពិន្ទុ ឯហូឡង់ដែលឈ្នះប៉ូឡូញ ២-១ ទទួលបាន១១ពិន្ទុឈរលេខពីរ ហើយប៉ូឡូញ និងប៊ូស្នីឈរលេខរៀងបន្តបន្ទាប់។
ដោយតម្រូវឲ្យយកតែមួយក្រុមដែលមានពិន្ទុនាំមុខគេចាប់ពីពូលពី A1 ដល់ A4 ដូច្នេះអ៊ីតាលីលេខ១ពូល A1 បែលហ្ស៊ិកលេខ១ពូល A2 ត្រូវទទួលបានកៅអីទៅវគ្គ៤ក្រុមចុងក្រោយពាន Nations League ជាមួយបារាំងដែលបានលេខ១ពូល A3 និងអេស្ប៉ាញលេខ១ពូល A4៕
© រក្សាសិទ្ធិដោយ thmeythmey.com